Тэарэтычная фізіка — раздзел фізікі, у якім у якасці асноўнага спосабу пазнання прыроды выкарыстоўваецца стварэнне матэматычных мадэляў з’яў і супастаўленне іх з рэальнасцю. У такой фармулёўцы тэарэтычная фізіка з’яўляецца самастойным метадам вывучэння прыроды. Аднак вобласць яе інтарэсаў, натуральна, фармуецца з улікам вынікаў эксперыментаў і назіранняў за прыродай. Блізкім аналагам з’яўляецца матэматычная фізіка, якая даследуе ўласцівасці гэтых матэматычных мадэляў на матэматычным узроўні строгасці, аднак не займаецца пытаннямі супастаўлення іх з рэальнасцю.