In België weirdt et Federoal parlement om de 4 joar verkoozn. Ip 10 juni 2007 moetn olle Belgn were goan stemmn. 't Zyn de belangrykste verkiezingn van et land. Wie de mêerdereid oalt, mag de federoale regerienge vormn voo de volgende vier joar. Mêestal komt er een coaliesje an de macht, mè dikwyls vier partieën (2 an Vlamsche kant, 2 an Woalsche kant). Tripartites (me 6 partieën) bleekn in 't verleedn nie te succesvol. Te soamn met de federoale koamer weirdt ôok de senoat verkoozn. Er moet volgens kieskring gekoozn weirdn, wa da voo de koamer in West-Vloandern overêenkomt mè de provinciegrenzn. De kieskring voo de senoat koomt overêen mè hêel et gewest Vloandern.

Vôorgeschiedenisse

Het grôte speelpunt in de verkiezingn wos: goat de paarse mêerdereid (Open VLD en SP.a/Spirit) vervangn weirdn deur een nieuwe coaliesje, of goat er een tripartite koomn om de volgens olle Vlamsche partieëen nôodzoakelyke nieuwe stoatservormienge meuglik te moakn. Achter 2 regeriengsperioodn van paars (êest mè groen derbie, loater allêene mè VLD en SP.a/Spirit) lykt er een zekere metoalmoeheid ipgetreedn te zyn, wa da natuurlyk uutgespeeld weird deur de CD&V/N-VA. Ondertussn eit de VLD zyne noame veranderd noa open-VLD, moar da blykt nie vele te elpn. In de opiniepeiliengn verliezn de regerende partiën zwoar (SP.a/Spirit -3.6% in de peilienge van De Standaard en de VRT) tot stif zwoar (open-VLD, -8.6%), en stoat de CD&V/N-VA ip een peil dat ze lange nie mêer gehoald ein (29.9%). Het er dus noar uut da de CD&V/N-VA an zet goa zyn, en zyne geliefkoosdn partner goat meugn kiezn. Wie de debattn volgt, kan tussn de regels leezn da SP.a doarvôorn mêest in anmerkienge komt.

De verkiezingn stoan ôok voor het êest in het têekn van het premierschap. 't Es de êeste kêe dat de (Vlamsche) polletiekers mè drieën duudelyk gemakt ein da ze premier wildn koomn: Yves Leterme, Guy Verhofstadt en Johan Vande Lanotte ein zô iets loatn verstoan. Johan Vande Lanotte liet doarbie wel verstoan da zyn polletieke familie (woarmee dat ie de Woalsche PS en de Vlamsche SP.a/Spirit bedoelt) de grôotste van et land moe zyn.

Doarnoast zyn der nog een aantal kleindere vroagn die beantwoordt moetn weirdn:

• Komt de bevestigienge van de stagnoatie van het Vlaams Belang?
• Kan Groen!, na het desastreuze resultoat van 4 joar geleedn, weer in het parlement koomn?
• Gerakt de Lijst Dedecker over de verkieziengsdrempel of niet?

West-Vloandern

West-Vloandern speelt een belangryke rolle in de verkieziengn: mè twêe protagonistn (Yves Leterme en Johan Vande Lanotte) en de iprichter van een nieuwe, sproakmoaknde partie (Jean-Marie Dedecker). Vôors lôopn Vincent Van Quickenborne (redelyk goed rapport in de vôrige regerienge), Renaat Landuyt, Hendrik Bogaert en Geert Lambert in de kyker, terwyl da Stefaan De Clerck een nieuwe pogienge noar het nationale niveau ounderneemt.

Uutslag

Externe koppelienge

• Officieeln site van de overeid