聲母

梅縣話總共有17隻聲母（包括零聲母），其中 ŋ 在細音前會變成 ȵ。

韻母

梅縣話總共有78隻韻母，有兜韻母暫時尋毋倒本字，有兜嘅例字毋係好多。

聲調

梅縣話總共有6隻聲調，其中平聲入聲分陰陽、上去毋分陰陽。

語音特點

• 古全濁聲母字，毋理平仄，逢今下讀塞音或者係塞擦音，今下讀做送氣清音。
• 古非組字在今日有[f v]齒唇音撈[p pʰ m]雙唇聲母兩種讀法。
• 古精、見曉組聲母分尖團。逢齊齒呼韻母，古精組字今日讀[ts tsʰ s]聲母，古見曉組字今日讀[k kʰ h]聲母。
• 古魚虞兩韻嘅精組字今日讀[i]韻，知組、章組字今日讀[u]韻；莊組字今日讀[ɿ]韻，模韻嘅精組字也讀[ɿ]。
• 古蟹攝一等開口字大部分讀[oi]，少部分讀[ai]。
• 古梗攝舒聲字文白讀音對立。當文讀係[ən ɛn]嘅時節，白讀往往係[aŋ]，爾文讀係[in]嘅時節，白讀就係[iaŋ]。
• 古平聲嘅次濁撈全濁聲母字有少數今日讀陰平。
• 古上聲次濁、全濁字有部分字今日讀陰平。
• 古入聲清聲母字今日讀陰入，全濁聲母字今日就讀陽入。次濁聲母則有部分字今日讀陰入，部分今日讀陽入。

內部差異

梅縣所管轄嘅三十二鎮嘅客家話差異毋大，只係有兜字在松口、松北、松東、松南一帶嘅讀音撈其他鎮有差別。如：

• 古效攝一等、二等字在多數鄉鎮韻母相同，都讀[au]。而松口等地一等字讀[o]韻，二等字讀[au]韻。
• 古效攝三等字多數鄉鎮讀[au iau]，松口一帶讀[ɛu iɛu]
• 古效攝四等端組字松口等地撈其他鄉鎮一樣，都係讀[iau]韻；毋過見組字其他多數鄉鎮讀[iau]，而松口一帶讀[iɛu]。