這邊 "客家語" 个頁面係漢字，有白話字連結 "Hak-kâ-ngî" 个頁面在這項點出。
客家語在中國嘅分佈[1]

　　客家語（白話字：Hak-kâ-ngî），又喊做客家話，簡稱客語，係漢語七大方言之一，有超過6000萬人使用。客家語在毋同地區有毋同特色，有兜地區還有“艾話”、“新民話”等等毋共樣个喊法。使用客語个人群集中居住在中國南方省份，包括 廣東、福建、江西、廣西、四川、湖南、貴州、海南摎台灣；在海外地區，有好多國家都分佈有會講客語个人群，包括英國等其他歐洲國家、美國、非洲、南太平洋、印度、菲律賓、馬來西亞、澳洲等。學術上，客家語以梅縣話做代表；在臺灣肚，四縣腔係客家語裏背過強勢个方言。

簡介

屬性

　　客家語係漢族客家人嘅母語 ，分布區域當廣泛，包括矣中國大陸東南沿海、南部、西部（例如四川）嘅省份、海南、香港新界、台灣，海外客家人移民地區（如毛里求斯、印度、馬來西亞等等）。比較集中嘅中心文化區係廣東省東北部（即粵東、粵北），江西嘅南部（贛南），福建嘅西部（即閩西），邇兜地區統稱做閩粵贛三角地帶，也喊做閩粵贛邊區。

別嘅喊法

　　因為“客家”邇隻喊法並毋流行於一兜地區，故所客家語有毋少別嘅喊法。列表如下背：

喊法
分佈地區
喊法由來
附註
客家話廣東東部、北部；福建西部、江西南部等先有“客家人”喊法，後有“客家語”喊法正式場合應稱爲客家語、客語
𠊎話粵西、桂南等地區因為第一人稱爲𠊎（ngài）而得名[2]
新民話廣西相對於壯族撈粵族人，客家人係新移民，所以當地人喊客家語做新民話
麼嘅話廣西因客家語特色詞“麼嘅”而得名[2]
懷遠話江西銅鼓縣等地，湖南瀏陽市等部分地區因清朝客籍人入籍懷遠都而得名[3]一般指嘅係客語銅鼓片
客姓話湖南源於其他民系對客家語嘅喊法浏陽當地客家人也自稱客姓人
粵東語台灣台灣日占時期，籍貫廣東省嘅台灣土民被記載做“粵籍”或者“粵東人”，所用語言分喊做“粵東語”，“粵東”即“廣東”現代台灣已少用邇種喊法
廣東話（土廣東話）四川、重慶、陝西、湖南某些地方撈舊時嘅台灣等因“湖廣填四川”或同時期嘅客家人多祖籍廣東並且自稱“廣東人”，故所得名[2]後加“土”字來區別當代世居廣東人（或廣府人）；現代台灣已少用邇種喊法
汀州話（汀州腔）浙江麗水、雲和等浙江等地嘅客家人係從古汀州遷過去嘅，故所有汀州話嘅喊法
惠州話廣西、台灣等從原惠州府遷到其他地區嘅群體，自稱惠州人，所使用語言分喊做“惠州話”

特殊作用

　　因為客家人分佈過廣泛，故所單一嘅地域認同無法度將客家人撈其他群體區分開來。在邇種情況底下，語言認同就顯得十分重要矣。客語嘅特殊作用，就在於其係客家民系嘅認同標志。

歷史

　　客家語源於古漢語，有人認為其在南宋時期定型[4]。

現狀

　　客家語在今下情況毋樂觀。有資料顯示，客家語分認爲係地球上衰落最快嘅語言之一[5]。

中國大陸

　　在中國大陸，由於各地區文化經濟交流嘅增加，人撈人之間廣泛使用普通話，傳統客家地區也一般毋使用客家語講課，年輕一代從細開始接受普通話教育。同時，由於電視媒體嘅普及，客家語又好少用在新聞傳媒撈大眾娛樂，進一步導致年輕一代客家人對客家語嘅冷落。以口頭方式流傳嘅傳統客家童謠撈山歌等，今下已經好少人做得完整誦唱。另一方面，在珠江三角洲地區以“方言島”形式存在嘅客家語，同時受普通話撈相對強勢嘅粵語影響，部分客家人家庭生活用語轉向普通話或粵語。

香港

　　在香港地區，20世紀70年代經濟起飛以後，客家語基本上在傳媒撈公共場合肚絕跡，恁樣一來，人們就錯誤認爲香港從來無有過客家語[6]。

臺灣

　　在臺灣，因客家人在清領前期一度受限於渡臺禁令，並且在人數上比毋過閩南移民，結果今日除國語外，閩南語也成為臺灣嘅強勢語言之一。因大眾傳播媒體嘅影響，即使平常毋以閩南語互相溝通嘅客家人，大多也做得略通閩南語。部份地區客家人集體轉用閩南語，成為福佬客；轉向使用國語嘅客家人更多，特別係年齡層越低者。根據中華民國行政院客家委員會在2004年所做嘅調查，30歲以下年輕客家人有3成做得聽解客語，單淨1成做得流利使用；在家庭語言方面，30歲以下約有60%使用國語，20%使用閩南語，毋超過10%使用臺灣客家語。
　　近年來，臺灣居民意識到保護母語嘅重要性，臺灣客家人也毋例外。政府成立矣專門嘅機構行政院客家委員會，制定《客家基本法》[7]，在學校推行台灣客家語教學，同時設立矣客家電視台撈客家廣播電台，舉辦客語認證，並立法規定火車、捷運等大眾運輸工具愛提供台灣客家語播音服務[8]。

海外

　　在海外地區，例如馬來西亞，華人肚也有毋少嘅客家人，除開沙巴州地區，目前在西馬嘅柔佛州客家語也依然廣為流傳。毋過，隨緊經濟全球化，客家人撈其他族群交流越來越密切，客家語在海外客家社區嘅傳播撈傳承也出現矣危機[9]。

方言

代表

　　語言學家一般將廣東梅縣話看做客家語嘅典型代表[10]。在台灣，則以四縣話為典型代表（撈梅縣話有當多相同），大眾運輸肚嘅客語廣播使用嘅大多係其。毋過並毋存在一隻公認嘅標準口音。雖然梅縣話係客家語代表，毋過，民間對“梅縣話作為客家語標準音”缺乏認同，多數使用非梅縣話嘅客家人一般毋會講梅縣話，甚至撈講梅縣話嘅人交流時還有一兜溝通障礙。

分片

　　客家語在《中國語言地圖冊》肚分劃分做八片：粵臺片、粵中片、惠州片、粵北片、汀州片、寧龍片、于桂片、銅鼓片；除開上片所講嘅八片，還有一兜毋分片嘅客家語方言，例如粵西、桂東南、四川等地區嘅客家語[1]。

分佈

中國漢語（橙色係客家語）

　　客家話主要分佈在：

  1. 中國大陸嘅粵東、閩西、贛南交界，廣西、湖南、粵西、贛西北（以銅鼓縣做中心）等也有較多分佈。
  2. 臺灣嘅桃園縣、新竹縣、苖栗縣、屏東縣、高雄縣、台東縣等縣[11]。
  3. 香港嘅新界大埔、元朗、上水等鄉鎮[6]。
  4. 海外一些華人社區如：馬來西亞等東南亞國家、印度、非洲、南印度洋島國（毛里求斯等）、美洲地區等[1]。

語音特點

  • 古全濁聲母撈次清聲母合流，毋論平仄多讀成送氣清塞音、塞擦音。
  • 古莊組撈精組洪音無分別，讀舌尖前音[ts ts' s]
  • 古泥、來母毋混。
  • 古曉、匣母逢合口字大部分讀做[f]。
  • 古非、敷、奉、微母部分字讀做重唇音p p' m。
  • 同攝（山、蟹、咸等攝）裡肚一二等字在不同範圍裡肚有毋同嘅讀音。
  • 梗攝字白讀多數讀做[aŋ iaŋ]或者係帶a的鼻化韻。
  • 山攝開口一等牙喉音字多撈合口一等齒音字混同，而韻腹多數係ɔ、o。
  • 宕攝開口一等唐韻撈江攝二等江韻字多數混同，讀做[ɔŋ]或[iɔŋ]。
  • 果假兩攝韻腹嘅區別普遍係 o、ɔ 撈 a、ɑ個分別。
  • 侵韻莊組字“森”、“蔘”多數撈其他聲母字讀音毋同。
  • 遇攝字“五”多數有[ŋ]嘅讀音。
  • 次濁入聲字有兩個走向，或撈清聲母同，或撈濁聲母同。
  • 保留入聲調類者，厥聲調多係短促調。
  • 多數地點知組聲母毋分二三等。
  • 多數地點知組三等撈章組個別字相當一致讀做[t t']。
  • 精組好少分洪細，見組分洪細嘅比較多，但係尖團多數毋混。
  • 微母字多數撈匣影雲以合口字混同做[v]聲母。
  • 影母洪音毋撈疑母混同。
  • 四等韻（如齊韻）字有讀洪音。
  • 宕攝一等字開撈合口字多數混同，一般讀作[ɔŋ]。
  • 曾攝開口一等字撈梗攝開口二等字（文讀）多毋分，讀作[ɛn]或ɛŋ]。
  • 多數地點無撮口呼。
  • 多數地點古陽聲韻 -m -n -ŋ 韻尾三分。
  • 多數地點入聲韻保留 -p -t -k 韻尾三分。
  • 多數地點聲調為六類，平入各分陰陽，上去雜為二調。
  • 古入聲字今聲調大多數按清濁分成兩調。
  • 多數地點將部分次濁去聲字讀成清聲母。
  • 古全濁、次濁部分上聲字除開少數地點外都有將常用字讀做陰平調。

注音撈書寫形式

參考文獻

  1. 1 2 3 李榮，熊正輝，張振興等．中國語言地圖集．香港：朗文出版（遠東）有限公司，1987．
  2. 1 2 3 孟萬春．陝西商洛“廣東話”語音研究[J]．延安大學學報(社會科學版)，2008，30(05)，100-103 ．
  3. ↑ 賴文峰．寧州懷遠人淵源稽考[J]． 宜春學院學報， 2005，(03)．
  4. ↑ 吳松弟．客家南宋源流說[J]．復旦學報（社會科學版），1995，(05)，108-113．
  5. ↑ 吳伯雄的客家情結．《南風窗》．
  6. 1 2 香港和客家話．廣西師範大學出版社網站[引用日期2013-05-20]．
  7. ↑ 《客家基本法》．中華民國司法院．
  8. ↑ 《大眾運輸工具播音語言平等保障法》．中華民國司法院．
  9. ↑ 僑民第三代不會客家話 客家文化海外傳播現危機．人民網．2010-12-02[引用日期2013-05-20]．
  10. ↑ 謝永昌．古漢語的“活化石”——客家話（——兼論客家方言以梅縣話爲代表的緣由）[J]．嘉應大學學報（社會科學），1997，(5)，102-107．
  11. ↑ 台灣客家人分布地區 ．中國國際廣播電台國際在線．2011-04-07[引用日期2013-05-20]．
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.