Ta'n diwan (focklit magh myr [[Wikipedia:IPA|['diwɑ̃n]]], sheel ayns Britaanish) ny chumraagys jeh scoillyn Britaanish 'sy Vritaan, y Rank. Va ny scoillyn bunnit 'sy vlein 1977, as t'ad lhiggey da ny scollagyn Frangish as Britaanish y gynsaghey trooid thummey ayns ny çhengaghyn shen. Va eie ny diwanyn tayrn stiagh ennal gleashaght ny Gaelscoileanna ayns Nerin, ny gleashaght ny Ikastolak 'sy Çheer Vascagh, as gleashaght ny Ysgolion Meithrin ayns Bretyn.
As ny paitçhyn eddyr daa as shey bleeantyn d'eash, she Britaanish çhengey ynrican ynsee. Veih shiaght bleeantyn as lieh d'eash, ta'n Rangish currit stiagh 'sy vrastylyn er feie daa as ny 26 ooryn scoill. Tra t'ad jeih bleeantyn d'eash, ta'n Rangish (6 ooryn ass 23) ynsit er keim cheddin as ta'n Vritaanish ynsit. Ta'n skeim shen freilt 'sy cholaashtey, agh erskyn shen, ta Baarle ry ynsee ayn myrane lesh reih ass y Spaainish as y Ghermaanish.[1]
Shennaghys
Va'n chied diwan currit er bun ec paarantyn ennagh 'sy vlein 1977 ayns Lambaol-Gwitalmeze faggys da Brest, er yn oyr nagh row ny scoillyn steat laaraghey aarloo failt y chur er y Vritaanish 'sy choorse scoill. Chur ad shamyr chlienney er bun ec y toshiaght, as va'n chied vunscoill currit er bun ny yei 'sy vlein 1980. Va'n chied chollège currit er bun 'sy vlein 1988, as y chied lycée ayns 1994.
'Sy vlein 2003-2004 va 2,761 scollagyn ayns diwanyn er feie ny Britaan ec dagh keim veih'n roie-scoill dys y Vaccalauréat. Doshil roie-scoill Diwan ayns Paarys ayns Mee Vean Fouyir ny bleeaney 2004. Ec toshiaght ny bleeaney acadoil 2007, va'n ghleashaght goaill stiagh 35 bunscoillyn.
Va 30oo feailley bleeaney ny Diwanyn kelloorit er feie ny Britaan as va Ar Redadeg ("Y Ratçhal"), ratçhal gyn stad trooid y Vritaan as eh pohlldey ynsagh ny Britaanish ayns scoillyn, currit er bun.
Jeeagh er neesht
- Bunscoill Ghaelgagh - ynsagh cosoylagh trooid y Ghaelg ec keim ny bunscoill
- Gaelscoileanna - ynsagh cosoylagh trooid y Yernish
- Ikastolak - ynsagh cosoylagh trooid y Vascish
- Ysgolion Meithrin - ynsagh cosoylagh trooid y Vretnish
Imraaghyn
- ↑ (Frangish) L'immersion : une stratégie pour le bilinguisme
Kianglaghyn mooie
- (Britaanish) (Frangish) Ynnyd-eggey ny Diwanyn
- Caslys çheerey ta taishbyney Diwanyn
Çhengaghyn Celtiagh | |||||||||
---|---|---|---|---|---|---|---|---|---|
Mooarheeragh | Celtibeirish · Galatish · Gallaeshish · Goalish · Lepontish · Norish | ||||||||
Ellanagh |
|
||||||||
Çhengaghyn mestit | Beurla Reagaird · Sheltish | ||||||||
Ardjyn Celtish | Y Fro Gymraeg · Breizh-Izel · Eilean Cheap Bhreatainn · An Ghaeltacht · A' Ghàidhealtachd · Y Wladfa | ||||||||
Thum-ynsagh | Bunscoill Ghaelgagh · Diwan · Ynsagh trooid mean ny Gaelgey · Gaelscoil · Ynsagh trooid mean ny Bretnish | ||||||||
Ta ny çhengaghyn ayns clou iddaalagh nyn jengaghyn marroo |