Dä Artikel behandlet en Schwizer Politiker. Witeri Persone mit däm Name findt me under Ulrich Maurer.
de Ueli Maurer (2022)

De Ueli Maurer (* 1. Dezember 1950 z Wetzike, Kanton Züri; bürgerlich Ulrich Maurer[1], schwizertütsch Ueli Muurer) isch en Schwiizer Politiker (SVP). Er isch sit em 1. Jänner 2009 eine vo de sibe Bundesröt vo de Eidgnosseschaft.

Läbe

De Maurer het e kaufmännischi Lehr gmacht un s eidgnössisch Buchhalterdiplom gmacht. Vo 1994 bis 2008 isch er Gschäftsführer vom Zürcher Buureverband gsi. De Maurer wohnt z Wernetshuse (en Teil vo de Gmeind Hiwil), isch ghürate un het sechs Chind. Er isch Bürger vo Adelbode un Hiwil.

Politischi Karriere

Vo 1978 bis 1986 isch de Maurer Gmeindrot z Hiwil gsi. Im 1983i isch er i de Zürcher Kantonsrot gwählt worde un derte blibe bis zu sinere Wahl i de Nationalrot im 1991. Vo 1996 bis 2008 isch er Präsident vo de SVP Schwiiz gsi, wo unter sinere Führig zu de wählerschtärkschte Partei vo de Schwiiz worden isch. Am 10. Dezember 2008 isch er als Nachfolger vom Samuel Schmid i de Bundesrot gwählt worde un het am 1. Jänner 2009 sis Amt aaträtte un s Departement für Verteidigung, Bevölkerigsschutz un Sport (VBS) übernoh. Am 5. Dezember 2012 isch de Maurer mit 148 vo 237 mögliche und 202 gültige Stimme zum Bundespräsident für s Johr 2013 gwählt worde.[2][3] Uf de 1. Jänner 2015 hät er sis Departement, s VBS, an neue Bundesrot Guy Parmelin öberge und vo de zruggträtene Bundesröti Eveline Widmer-Schlumpf s Finanzdepartement (EFD) öberno. Im 2019 isch er (noch 2013) zum zweitemol Bundespräsident gsii.

Am 30. September 2022 hät de Ueli Maurer bekannt gee, as er uf Endi vom Johr us em Bundesrot zruggträte werdi.[4] Zu sim Nochfolger isch am 7. Dezember 2022 de Albert Rösti gwählt worde.

Wäblingg

Fuessnoote

  1. ↑ Eidgenössische Bundeskanzlei: Der Bund kurz erklärt, Site 63, erschine 2009
  2. ↑ Maurer ist der neue Bundespräsident. Artikel zur Tagesschau im Schwizer Färnseh vom 5. Dezember 2012
  3. ↑ Nur zwei Politiker erzielten ein schlechteres Resultat Artikel uf bazonline.ch vom 5. Dezember 2012
  4. ↑ Bundesrat Ueli Maurer gibt nach 13 Jahren im Amt seinen Rücktritt bekannt – die besten Zitate aus der Medienkonferenz Artikel uf nzz.ch vom 30. September 2022


This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.