| Dialäkt: Markgräflerisch (Ebringe) |
Dr Trinational Eurodischtriggt Basel churz: TEB – en Erwiterig in alle Himmelsrichdige vo dr frienere Trinationale Agglomeration Basel, churz TAB – isch ä Organisation vu Gmeinde un Städte in dr Umgäbig vo dr Stadt Basel.
Si wott iber d Gränze vu dr Länder Dytschland, Frankriich un Schwyz hiwegg zämeschaffe und gmeinsami Plään mache. Säll isch wichtig, wil d Staatsgränze zum Deil zmitz dur Strossezüg verlaufe. Dr Agglomerationsruum isch ä schöns Bispiil defir, wie datsächlichs Stadtgebiet un politischi Gränze ussänanderfalle chänne.
Mit 830.000 Iwohner isch d TEB d Metropole fers Städtedrieck vo Basel bis uff Milhüse und Friburg im Brisgau in de «Rhinische Megalopole». 60 Prozänt vu dr Bevölkerig läbe in dr Schwyz, 30 Prozänt z Dytschland un 10 Prozänt z Frankriich.
Zum Trinationale Eurodischtriggt Basel ghöre z Dütschland dr Landkreis Lörrach plus d Gmeinde Bad Säckingen und Wehr, z Frankriich s Pays de Saint Louis und in dr Schwiiz die beide Kantön Basel-Stadt und Baselbiet), derzue s aargauische Fricktal und die soledurnische Gmeinde Witterswil und Bättwil.
S Ziil vu dr TEB isch e Verbesserig vu dr gränzyberschrittende Zämmearbet un d Koordination in dr Ruumplaanig. Demit soll d Agglomeration als europäischer Wirtschaftsstandort attraktiver gstaltet un gstärkt werre. Dur die politisch Dailig vum Siidligsruum Basel het d Region suscht gegenyber Regione mit ere eiheitliche Verwaltig e Standortnoochdail.
Zahlriichi Schlüsselprojekte sin festglegt un e gmeinsams Entwickligskonzept usgarbeitet worre. Usserdem isch e Verei fer die noochhaltig Ruumentwicklig vu de TAB gründet worre.
In Bade-Württeberg isch ruumplanerisch d Region vu Wil am Rhi un Lörrach als dytscher Dail vu de TEB zu eme städtische Verdichtigsruum zämmegfasst.