Koordinate: 47° 33′ 11,3″ N, 7° 35′ 27″ O; CH1903: 611457 / 266947

Die ehemooligi Skulpturehalle, hüte s Stadtkino Baasel
Dialäkt: Baseldütsch
S Fuäijee im Stadtkino

S Stadtkino Basel isch e nid kommerziells Chlaikino an dr Klostergass 5 z Basel, wo zum Ziil het, künstlerisch wärtvolli Film z zäige.

S Stadtkino Basel isch 1982 vom Veräin «Le Bon Film» gründet worde. «Le Bon Film» isch e Filmklub gsi, wo sit 1931 gueti Film in öffentlige Vorfüehrige in verschidnige Basler Kino zäigt het. Bis 1982 hai nume d Klubmitgliider d Film chönne go luege, denn isch s «Stadtkino Basel» gründet worde, mit dr Absicht, d Film im ene äignige Lokal z zäige, und d Vorfüehrige si für alli zuegänglig worde. As öffentligi Institution het dr Staat s Stadtkino afo subventioniere, und es het siis Aagebot chönne vergrössere. 1998 het s denn an dr Chlostergass in dr Kunsthalle im früehnere Skulpturesaal e Häim mit 99 Sitzblätz gfunde. 2007 isch s Foyer renoviert worde und het e Bar überchoo.

2003 het s dr Kulturbriis vo dr Stadt Basel überchoo für si, wie s dr Regierigsroot bim Verlei vom Briis gsäit het, Pfläg vo dr Filmgschicht und s Brogrammiere vo Film, wo inhaltlig und formal innovativ si, und wo im Verleiaagebot no käi Blatz finde.[1]

Im Johr zeigt s Stadtkino Basel öbbe 300 Film in 800 Vorstellige. Es het sid 2008 en äignigs Filmarchiv, d «Kinematek Le Bon Film», mit Hunderte vo Kopie vo bedütende Film mit em Schwerpunggt uf dütsche Film sid 1929. S Stadtkino het e Schwösterkino im «Landkino» z Lieschdel, wo äinisch bro Wuche äine vo de Film, wo im Stadtkino zäigt wärde, ufgfüehrt wird.

Quelle

Fuessnoote

  1. ↑ Regierungsrat - Medienmitteilung vom 14.10.2003: «Der Kulturpreis 2003 geht an das Stadtkino Basel»

Weblingg

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.