Dr Sergius II. (* um 790; † 27. Jänner 847) isch vu 844 bis 847 Papscht vu dr kadolische Chilche gsii.

Läbe un Wirke

Dr Sergius isch us ere adlige Familie chuu, wu insgsamt drei Päpscht druis firigange sin. Är isch in dr schola cantorum erzoge wore un het frie as wichtige Mann in dr Chilche gulte. Unter em Paschalis I. (817–824) isch er zum Kardinalprieschter vu dr Santi Silvestro e Martino ai Monti ernännt wore, un sy Vorgänger Gregor IV. het en in dr yyflussrych Rang vun eme Erzprieschter glupft. Noch em Dod vum Gregor isch dr Sergius bi me Dräffe vu dr Chilcheobere as Noofolger bstimmt wore. Dergege isch e Dekan mit Name Johannes ufgstande, wu it ere braite Volksmängi im Rugge au um dr Papschrdron kämpft het. No gwaltsame Uusschrytige isch dr Johannes in e Chloschter verbannt wore, un dr Sergius het sy Amt chenne aadrätte.

Iber dr Karakter vum Sergius gehn d Bricht ussenander: In verschidene Editione vum Liber Pontificalis wird er stark gegesätzli bschribe: In ere nume fragmäntarisch erhaltene Uusgab wird bhauptet, dr Sergius heb si lieber flaischlige Gniss gwidmet un d Amtsgschäft sym Brueder Benedikt iberloo. Derzue soll er an ere schwäre Gicht glitte haa, wu ne lybli un gaischtig stark yygschränkt heb. In dr andere Uusgabe stehn d Iberliferige in vollem Kontrascht derzue. D Wisseschaft beziet si hite mee uf sälli Editione, wu ne positiver Bild vum Sergius zaichne.

Bal no syre Ernännig isch dr Sergius in Konflikt mit em Chaiser Lothar I. grote, wu si bi dr Papschtwahl ibergange gfielt het un dodrum sy Suhn Ludwig mit ere Armee uf Rom gschickt het. Em Sergius isch s in letschter Minut glunge, dr Konflikt z entschärfe un en bewaffnete Kampf um Rom z verhindere. Go dr Fride sichere, het er dr Ludwig II. zum Chenig gchrent un em chaiserlige Beroter Drogo, em Bischof vu Metz, di päpschtli Gsandtewird fir s Oscht- un s Weschtfrankrerych verleent.

No churz vor sym Dod het dr Sergius en heftige Aagriff vu dr Sarazene uf Rom mießer mitmache. Dr alt Petersdom un d Chilche St. Paul sin schwär bschädigt wore, un nume dr verbitteret Widerstand vu dr Aawohner het d Aagryfer draa ghinderet, d Stadt sälber z verwieschte.

Dr Sergius II. isch no sym Dod im Petersdom vergrabe wore.

Literatur

• Ilaria Bonaccorsi: Sergio II. In: Massimo Bray (Hrsg.): Enciclopedia dei Papi. Band 1: Pietro, santo. Anastasio bibliotecario, antipapa. Istituto della Enciclopedia Italiana, Rom 2000, S. 720–723 (treccani.it)..
• Johannes Haller: Das Papsttum. Idee und Wirklichkeit. Band 2. Der Aufbau. Rowohlt, Reinbek 1965 (rowohlts deutsche enzyklopädie 223/224), S. 27–29 und 376.
• Georg Schwaiger: Sergius II. In: Lexikon des Mittelalters (LexMA). Band 7, LexMA-Verlag, Münche 1995, ISBN 3-7608-8907-7, Sp. 1787.

Weblink

 Commons: Sergius II. – Sammlig vo Multimediadateie

• Sergius II., In: Salvador Miranda: The Cardinals of the Holy Roman Church, online uf fiu.edu, Websyte vu dr Florida International University, abgruefen am 6. November 2011. (änglisch)

Dä Artikel basiert uff ere fräie Übersetzig vu dere Version vum Artikel „Sergius_II.“ vu de dütsche Wikipedia. E Liste vu de Autore un Versione isch do z finde.