Under ere Seebestattig verstoot mä e Bestattig vo dr Liiche vom ene Doote oder vo däm sinere Äsche uf See.

Gschichtligs

E Seebestattig bi dr United States Navy

Uf See si bis ins früeje 20. Joorhundert fast nume Persone bestattet worde, wo an Bord gstorbe si und wo mä d Liiche nid an Land het chönne begraabe. Das het us verschiidene Gründ chönne bassiere, under anderem au us Angst vor dr Verbräitig vo Süüche. Historischi Bischbil si zum Bischbil d Seebestattige vom Sir Francis Drake und vom James Cook. Noch Seeschlachte het mä die Doote vilmol im Meer bestattet, und eso si au Liiche vo Opfer vo Schiffsunglück wie däm vo dr RMS Titanic, wo uf See gfunde worde si, bestattet worde. Sältener isch gsi, ass mä d Särg vo Seelüt, wo an Land gstorbe si, im Meer bestattet het. Das isch vor allem bi deene vo dr Marine as en eerenvolli Form vo dr Bestattig aagluegt worde und isch mit eme entsprächende milidäärische Zeremoniell vorgnoo worde.

Hützudags

Sit em Aafang vom 20. Joorhundert isch in Öiropa d Kremierig mee und mee ufchoo. Gliichzitig het d Seebestattig iire Charakter as Notbestattig für sonigi, wo uf See gstorbe si verlore und d Bestattig im Meer vo dr Äsche vo Doote het sich vilerorts zun ere Alternative zur Sarg- oder Urnebestattig uf eme Friidhoof afo entwiggle.

Bischbil vo modärne Seebestattige si die vom amerikanische Astronaut Neil Armstrong und die vom islamistische Terrorist Osama bin Laden.

Weblingg

 Commons: Seebestattungen – Sammlig vo Multimediadateie

• Verwaltungsvorschrift zur Gestattung von Seebestattungen (Nordrhein-Westfalen)

Dä Artikel basiert uff ere fräie Übersetzig vum Artikel „Seebestattung“ vu de dütsche Wikipedia. E Liste vu de Autore un Versione isch do z finde.