Dr Schwyzer Buechbryys isch e Literatuurbryys, wu syter 2008 vum Verain Literaturfestival Basel in Zämenaarbet mit em Schweizer Buchhändler- und Verleger-Verband (SBVV) all Johr vergee wird.

Um was goht s?

Mit em Schwyzer Buechbryys wird e dytschsproochig literaarisch oder essayistisch Wäärch vu Autoor*ne, wu in dr Schwyz lääbe, dur e Fachjury uuszaichnet. D Uuszaichnig isch bis anne 2011 mit eme Bryysgäld in Heechi vu insgsamt 60 000 Schwyzer Franke (50 000 fir d*r Gwinner*i un je 2500 fir di Nominierte vu dr Shortlist) dotiert gsii. Im Johr 2012 isch d Summe uf 40 000 Schwyzer Franke reduziert woore. Dodervu chuntn d*r Gwinner*i 30 000; di iibrige vier Nominierte je 2500 Franke.[1] Anne 2018 hän di vier andere Autoor*ne, wu in dr ängere Uuswahl gsii sin, je 3000 Franke kriegt. Au 2021 isch d Dotierig esoo greeglet.[2]

Anne 2017 het dr Autoor Lukas Bärfuss, wu dr Bryys 2014 iiberchuu het, em SBVV voorgwoorfe, Yyfluss uf d Bryysvergaab z nee dur Dailnahm vu Verbandsverdrätter an dr Jurysitzige, go Autoor*ne feerdere, wu mer guet cha verchaufe. Wäge däm het er d Abschaffig vum Bryys gfoorderet.[3][4] Dr SBVV un dr friejer Juroor Thomas Strässle hän die Voorwiirf zrugggwiise un hän Wäärt druf glait, ass d Jury unhänhängig sei.[5]

Wär het dr Bryys scho iiberchuu?

JahrBryysdreeger*iTitel
2008 Rolf Lappert Nach Hause schwimmen
2009 Ilma Rakusa Mehr Meer. Erinnerungspassagen
2010 Melinda Nadj Abonji Tauben fliegen auf
2011 Catalin Dorian Florescu Jacob beschließt zu lieben
2012 Peter von Matt Das Kalb vor der Gotthardpost. Essays
2013 Jens Steiner Carambole
2014 Lukas Bärfuss Koala
2015 Monique Schwitter Eins im Andern
2016 Christian Kracht Die Toten
2017 Jonas Lüscher Kraft
2018 Peter Stamm Die sanfte Gleichgültigkeit der Welt
2019 Sibylle Berg GRM. Brainfuck
2020 Anna Stern das alles hier, jetzt
2021 Martina Clavadetscher Die Erfindung des Ungehorsams
2022 Kim de l’Horizon Blutbuch
2023 Christian Haller Sich lichtende Nebel

Fueßnote

  1. ↑ „Mäzen unterstützt Schweizer Buchpreis – Preisgeld wird erhöht“ Meediemitdailig vum 11. Oktoober 2012 uf www.schweizerbuchpreis.ch.
  2. ↑ Schweizer Buchpreis 2021: Die fünf Nominierten stehen fest, buchmarkt.de, 15. Septämber 2021.
  3. ↑ Mehr als nur ein missglückter Abend , F.A.Z.. Abgruefen am 24. November 2017. 
  4. ↑ «Schafft den Schweizer Buchpreis ab!» , Der Bund, 21. November 2017. Abgruefen am 24. November 2017. 
  5. ↑ Lukas Bärfuss hat mal wieder einen Wutanfall , Der Bund. Abgruefen am 24. November 2017. 
Dä Artikel basiert uff ere fräie Übersetzig vu dere Version vum Artikel „Schweizer_Buchpreis“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.