S Saulnois, offiziäll Pays du Saulnois, uf dytsch Salzgau, isch e Landschaft z Lothringe (Frankrych), wu uugfehr em Arrondissement Château-Salins entspricht.
S Pays du Saulnois lyt im Side vum Département Moselle. Di greschte Stedt vum Saulnois sin Château-Salins un Dieuze (Duß). Aneri Ortschafte in dr Region sin unter anderem Marsal, Vic-sur-Seille un Delme. Wichtigi Gwässer sin dr Linderweiher (franz.: Étang de Lindre) un d Seille.
Gschicht
Im Dal vu dr Seille im Saulnois wird syt dr Hallstattzyt (750 bis 450 v. Chr.) Salz abböue. D Merowinger hän d Tächnik vu dr Saline yygfiert. Zerscht hän d Saline verschidene Abteie ghert, derno em Bistum Metz un em Herzogtum Lothringe. Bsundersch d Saline z Moyenvic, z Marsal un z Dieuze sin scho in dr Merowingerzyt wirtschaftlig wichtig gsii. S Salz isch uf dr Seille zum Stadtdail Port-Sailly (Salzhafe) vu Metz transportiert wore. Im Mittelalter isch Salz as Konservierigsmittel fir Läbesmittel wichtig gsii, abver au wäg dr „Gabelle“ (Salzstyyr).[1]
Wirtschaft un Infrastruktur
Au hite no cha mer Saline, zum Byschpel z Dieuze, un Salzsimpf wie dää vu Marsal bschaue. D Lag zwisch em Elsiss im Oschte un dr große lothringische Stedt Metz un Nancy im Weschte het s Saulnois au zuen eme wichtige Durgangsland gmacht.
Dr Regional Naturpark Lothringe (Parc naturel régional de Lorraine) wird im Oschte vu dr Ortschafte Château-Salins, Mörchingen, Fénétrange un Réchicourt-le-Château begränzt. Au s Pays des Étangs (Land vu dr Weier) mit em Weier vu Lindre bi Lindre-Basse ghert zum Naturpark.[1]
Fueßnote
- 1 2 Guides Gallimard (Hrsg.): Lorraine. Gallimard, Paris 2002, ISBN 978-2-7424-0908-2, S. 48 f.+138. (französisch)
 |
Dä Artikel basiert uff ere fräie Übersetzig vu dere Version vum Artikel „Saulnois“ vu de dütsche Wikipedia. E Liste vu de Autore un Versione isch do z finde. |