Roger Federer
Roger Federer 2015
Spitzname:	Federer-Express («FedEx») King Roger Maestro
Nation:	Schweiz Schwiz
Geburtsdag:	8. August 1981 (42 Johr)
Gwicht:	85 kg
1. Profisaison:	1998
Spiilhand:	Rechts, eihändigi Rugghand
Trainer:	Severin Lüthi Ivan Ljubičić
Pryysgäld:	130'594'339 US-Dollar
Einzel
Karrierebilanz:	1251:275
Karrieretitel:	103
Hegschti Platzierig:	1 (2. Februar 2004)
Aktuälli Platzierig:	46
Wuchen as Nr. 1:	310
Grand-Slam-Bilanz Grand-Slam-Titel:0 20 Australian Open S (2004, 2006, 2007, 2010, 2017, 2018) French Open S (2009) Wimbledon S (2003–2007, 2009, 2012, 2017) US Open S (2004–2008)
Doppel
Karrierebilanz:	131:92
Karrieretitel:	8
Hegschti Platzierig:	24 (9. Juni 2003)
Grand-Slam-Bilanz Grand-Slam-Titel:0 0 Australian Open AF (2003) French Open 1R (2000) Wimbledon VF (2000) US Open AF (2002)
Olympischi Spiil
Olympischi Medaille: Gold 2008 Doppel Silber 2012 Einzel
Letschti Aktualisierig vu dr Infobox: 11. Mai 2022
Quälle: offiziälli Spiilerprofil bi dr ATP/WTA un ITF

Dä Roger Federer (* 8. August 1981 z'Basel) isch än Schwizer Tennisspieler, wo meh Erfolg hät chöne verbueche als jede anderi Schwizer Sportler und vo vilne Lüt als eine vo de erfolgriichschte Sportler vo allne Zyte agluegt wird.

I sinere Karriere hät er bis hüt scho 20 Grand-Slam- und 18 Masterstitel im Einzel gune und d'Jahr 2004, 2005, 2006, 2007 und 2009 als Weltranglistenerschte beändet. Mit äm Stanislas Wawrinka zäme isch er 2008 Olympiasieger im Doppel worde. Total hät dä "Fedi", wien er vo sinä Fans gnännt wird, scho i 75 Turnier im Einzel und i 8 im Doppel putzt.

Drüü vo dä beidruckendschte vo sine unzehlige Rekörd sind sini 36 Viertelfinal-, 23 Halbfinal- und 10 Finalteilnahme hinderänand bi Grandslamturnier.

Fü sini überragende Leischtige, isch dä Federer für d Jahr 2005, 2006, 2007, 2008 zum "Wältsportler vom Jahr" gwählt worde; so vill mal hett no niemert dä Titel gholt.

I sinnere Heimet isch de Federer sächsmol zum Schwizer Sportler des Jahres (2003, 2004, 2006, 2007, 2012, 2014) gwählt worde, sovil mol wie känn andere Sportler bishär. Zuedämm hät er 2008 mit em Stanislas Wawrinka und 2014 mit em Davis-Cup-Team (gmeinsam mit em Stanislas Wawrinka, em Michael Lammer und em Marco Chiudinelli) i de Wertig Team des Jahres gwunne. Im 2003 isch er Schweizer des Jahres worde.^[1]

Siner 20 Grand-Slam Title

Zersch amau het er in Wimbledon im Jahr 2003 gwunne. Er het zwar no a chlini Verletzigspausa müesse ilege, hets aber no gschafft, rächtzitig uf z'Viertusfinau zwäg zsi. Er het im Finau gäge de Mark Philippoussis kenner grosse Problem ghäbe und isch so zu sim erschte Grand-Slam Titu cho. Churz nach däm Titu isch är o i Kampf um zNummer 1 verwicklet gsi, het aber siner Chance verpasst.

Scho as haubs Jahr später, im Januar 2004, isch är i sim nächschte Grand-Slam Finau gschtane. Dette het em Marat Safin ke Chance gla, er het somit si 2. Grand-Slam Titu gwunne. Mit däm Sieg het er glichzitig o no dSpitzi vo de Tenniswäut erklumme. Er isch sit denn sit über 180 Wuche anenand z Nummer eis vo de Wäut.

Grad drü Mönet später isch er wieder im Endspiu vom prestigeträchtige Turnier in Wimbledon gschtane. Diesmau het er gäge Andy Roddick zwar meh Müeh ghäbe, isch aber trotzdem verdient zu sim 3. Grand-Slam Titu cho.

Scho 3 Mönet später isch er uf em Wäg zu sim 4. Grand-Slam Titu nume im Achtusfinau gäge Andre Agassi in Bedrängnis cho, het aber di Hürda gno. Im Finau het er de Lleyton Hewitt i 3 Sätz vom Platz gfägt.

Im Jahr druf het er zersch bim Australien Open, denn bim French Open bitteri Niederlage müesse istecke, doch denn het er uf em Wäg zu sim Tituhattrick vo Wimbledon ke Satz abgä. Denn bi de US Open het er im Finau de Andre Agassi gschlage u isch so zu sim 6. Grand Slam Titu cho.

Denn het er bi de Australian Open, obwou es paar engi Partie debii gsi sin, si 7. Titu chönne fiire. Wiederum isch er aber bi de French Open gschiteret: Im Finau het er gäge de Rafael Nadal verlore. Defüür het er sich grad z Wimbledon für di Finauniederlag grächt: er het de Rafael Nadal i vier Sätzt gschlage.

No i däm Jahr het er si nächscht Grand Slam Titu gwunne: Bi de US Open het er wieder mau de Andy Roddick gschlage. Im Jahr 2007 het er ändlech wölle de Grand Slam gwinne. Doch leider isch es ihm nid glunge d French Open zgwinne. Aber er het a nüa Rekord ufgsteut: Er het d'Australian Open ohni Satzverluscht gwunne! In Wimbledon het er de Rafael Nadal i 5 Sätz bezwunge und a de US Open de Novak Djokovic i 3 Sätz.

2008 hät er nach Finalniederlage bi dä French Open und z´Wimbledon gäg dä Rafael Nadal am US Open mit ämä Sieg gäg dä Andy Murray sin 5. Titel in Serie gholt.

Denn im 2009 het er zum erschte mal s'French Open z'Paris gwunne, und 2010 churz drufabe Wimbledon und d'Australian Open, 2012 wider Wimbledon und 2017 wider d'Australian Open. Niemert het meh Grand Slam Titel als är.

Im Olympiafinal 2012 in London hät är sich äm Andy Murray müssä gschlagä ge.

Persönlichs

De Roger Federer isch de Sohn vomene Schwizer und von ere Südafrikanerin. Därum spricht mu o si Name englisch u nid französisch wie i de Schwiz üblech us. Er redt vier Sprache fliessend: Dütsch, Baseldütsch, Französisch u Änglisch. Därum chan er bi Pressekonferenze o ohni Problem zwüsche de einzelne Sprache wächsle.

Sii Frau isch d Miroslava (Mirka) Vavrinec. Die beide hei sech a de Olympische Spiu 2000 kenne glert. D' Mirka isch o a ehemaligi Tennisspielerin. Därum cha si ihn o us Trainingspartnerin unterstütze. Sie het aber ihri Karriere wäge rer Fuessverletzig müesse ufgä. Am 11. April 2009 hän si z Basel ghirate. Am 23. Juli 2009 sin die beide Eltere vo zwei Zwillingstöchtere worde. Die beide heisse Charlene Riva und Myla Rose. Am 6. Mai 2014 si iiri Zwillingsbuebe uf d Wält cho.

De Roger Federer het o a Stiftig gründet. D' "Roger Federer Stiftig" unterstützt vor allem armi Chind in Entwickligsländer. Si het o viu ghoufe nach em Tsunami im Winter 2004.

Er het früher o no guet Fuessball gspiut, het sich denn aber fürs Tennis entschiede. Trotzdem isch er em Fuessball immer no sehr verbunde. Er isch Fan vom FC Basel.

De Roger Federer wohnt mit sinere Familie z Oberwil BL, hät aber au e Wohnig z Bäch SZ am Zürisee.^[2]

Am 2. Juli 2023 het dr Federer aus solierende Perkussionischt mit dr Band Coldplay im Letzigrund z Züri es Lied gspiut.

Sini Finaubilanz

Davis-Göp

2014 het d Schwizer Mannschaft mit em Federer und em Stan Wawrinka Frankriich im Final vom Davis-Göp 3:1 gschlaage.

Literatur

• Markus Alexander: Roger Federer – Tennis für die Ewigkeit. Baltic Sea Press, Rostock 2010, ISBN 978-3-942129-08-4
• René Stauffer: Das Tennisgenie. Pendo Verlag, München und Zürich, 3. Auflage 2007, ISBN 3-85842-651-2

Weblink

 Commons: Roger Federer – Sammlig vo Multimediadateie

• Offizielle Internetufftritt
• Offizielle Fanclub
• Roger Federer Facts & Figures
• Änglischi Fansyte
• ATP-Profil vu Roger Federer (änglisch)
• ITF-Profil vu Roger Federer (änglisch)
• Davis-Cup-Statischtik vu Roger Federer (englisch)

Fuessnoote

1. ↑ Roger Federer ist "Schweizer des Jahres" Archivlink (Memento vom 25. Juli 2014 im Internet Archive) Tages-Anzeiger, Artikel vom 4. Januar 2004
2. ↑ Roger und Mirka: Hier haben sie ihr neues Idyll gefunden Artikel vom 3. Mai 2007 uf Blick.ch, abgruefe am 14. Dezember 2012