The Hitchhiker’s Guide to the Galaxy (uf Dütsch Per Anhalter durch die Galaxis oder au Per Anhalter ins All, abkürzt HHGTTG, oder H2G2) isch s bekanntiste Wärk vom änglische Schriftsteller Douglas Adams. Es handlet sich um e Mischig us Komödie, Satire und Science Fiction. Ursprünglig isch s e Hörspiilserii vo dr BBC gsi. Denn isch s as Roman internazional erfolgriich gsi, und schliesslig für witeri Medie (Färnseeserii, Kompiuterspiil, Miusicl, Kinofilm) umgsetzt worde. D Gschicht het scho früe Kultcharakter überchoo, vor allem dr charakteristisch Humor vom Autor het gfalle.

D Handlig vom erste Däil vo dr Serii, wo au The Hitchhiker’s Guide to the Galaxy häisst

D Gschicht, wo d Baasis vo alle Wersioone isch, si d Abentüür vom Arthur Dent. Dr Dent isch e durchschnittlige Ängländer, wo grad no vo sim Fründ Ford Prefect grettet wird, bevor die usserirdischi Rasse vo de Vogone dr Blanet Ärde zerstöört. Ass dr Ford Prefect en usserirdische Bsuecher uf dr Ärde gsi isch, het dr Dent nid gwüsst und au nid, ass dä uf d Ärde cho isch zum über e Blaneet z rüscherschiere für e galaktischi Enzyklopedii. Wo d Flotte vo de Vogone ufdaucht isch, zum d Ärde z zerstööre, wil si uf dr Rute von ere blaante galaktische Hyperruum-Expressrute gläägen isch, het dr Ford d Gläägehäit bim Schopf packt zum sich und dr Arthur mit Hilf vom ene „Subruum-Äther-Winker“ (Sub-Etha-Sens-O-Matik, en Art elektronische Duume) sozusääge per Autistopp oder gnauer per Ruumschiffstopp an Bord vo äim vo de Vogoneruumschiff z rette.

D Vogone si aber nid grad bsundrigs gastfründlig, und so wärde dr Arthur und dr Ford dur e Luftschlöise ins All uuse gheit. Bevor si aber dört umchömme, nimmt si in dr letschte Sekunde s Ruumschiff Härz us Gold uf. Dört dräffe dr Arthur und dr Ford die andere Hauptfigure vo dr Gschicht: dr Zaphod Beeblebrox, won e Halbgusää vom Ford und zitwiis Bresidänt vo dr Galaxis isch. Dr Zaphod het zämme mit dr Tricia McMillan (Übernaame „Trillian“), wo dr Arthur emol uf ere Party in ere Woonig z Islington kenneglert het, s Ruumschiff gstoole. Au an Bord isch dr Marvin, e depressive Roboter. Zämme si si uf dr Suechi noch em legendäre Blanet Magrathea und finden en schliesslig au.

Uf Magrathea dräffe si uf e Slartibartfass, und dä erkläärt ene, ass d Ärde äigentlig e Superkompiuter gsi isch, und ass er drbii mitgschafft het. Dr äinzig Zwäck vo dr Ärde het din bestand, en Antwort z finde uf d Froog was dr Sinn vom Lääbe, vom Universum und allen andere sig. Siibe Millioone Joor het d Ärde an dere Antwort grächnet, aber si isch von ere früenere Wersioon vom Superkompiuter Deep Thought gfunde worde, nume het dä d Froog wo gfrogt worden isch, nid chönne formuliere.

Wo d Vogone d Ärde zerstöört häi fümf Minute bevor s Brogramm abgloffe isch, wo 10 Millione Joor hät sölle laufe, häi d Ufdraggääber, e Rasse vo hüperintelligänte, pandimensionale Lääbewääse in dr Gstalt vo wisse Müüs, im Arthur si Hirni welle abchaufe, wil si s für e Däil vo dr Kompiutermatrix ghalte häi und ghofft häi, ass si din d Froog doch no chönnte finde. Dr Arthur het abgleent und d Müüse häi denn brobiert, iim s Hirn mit Gwalt wägznee. Grad denn isch die galaktischi Bolizei choo, wo dr Zaphod gsuecht het. Im Duurenander wo s denn gee het, häi dr Arthur, dr Ford, dr Zaphod und d Trillian in d Härz us Gold chönne flüchte und häi beschliosse, zerst emol go ässe. Das isch dr Übergang zum zwäite Däil vo dr Serii, The Restaurant at the End of the Universe.

In dr Hörspiil- und dr Färnseeserii isch das Ändi e chli anders: D Boliziste zerstööre e Kompiuter, wo sich d Protagoniste drhinder verstecke. In dr Explosioon wo s git wärde si dur d Zit diräkt ins Milliway's gschlöideret, und eso foot d Handlig erst bim 14. Kapitel vom Buech aa.

Litratuur

  • Neil Gaiman: Keine Panik – Mit Douglas Adams durch die Galaxis. Ullstein, 1990, ISBN 978-3-548-22272-1
Ein kleines Kompendium über den Anhalter, Hintergründe und Entstehung, sowie einige biographische Daten von Douglas Adams
  • Klaus Schmeh: Der Kultfaktor – Vom Marketing zum Mythos: 42 Erfolgsstorys von Rolex bis Jägermeister. Redline Wirtschaft, 2004, ISBN 978-3-636-01082-7
  • Michael Hanlon: Per Anhalter durch die Galaxis – im Licht der Wissenschaft. Rowohlt, 2005, ISBN 978-3-499-62097-3
  • Glenn Yeffeth (Hrsg.): The Anthology at the End of the Universe: Leading Science Fiction Authors on Douglas Adams’ The Hitchhiker’s Guide to the Galaxy. Benbella, 2005, ISBN 978-1-932100-56-3
  • Dieter Petzold: Die Lust am Untergang: Endzeitthematik und Schwarzer Humor in der (post)modernen englischsprachigen Literatur. Inklings: Jahrbuch für Literatur und Ästhetik. Band 18, Brendow, Moers 2000. S. 178–201
  • Johannes Rüster: Ein Schöpfer von der traurigen Gestalt. In: Thomas Le Blanc, Johannes Rüster (Hrsg.): Glaubenswelten: Götter in SF und Fantasy. Phantastische Bibliothek, Wetzlar 2005
  • Reinhard Gratzke (Hrsg.): Douglas Adams: The Hitchhiker’s Guide to the Galaxy. Reclam, 2008, ISBN 978-3-15-019744-8
  • Dieter Petzold, Eberhard Späth (Hrsg.): Unterhaltungsliteratur der achtziger und neunziger Jahre. Universität Erlangen-Nürnberg Universitätsbibliothek, 1998, ISBN 978-3-930357-25-3

Weblingg

Lingg uf Dütsch

Lingg uf Änglisch

Dä Artikel basiert uff ere fräie Übersetzig vum Artikel „Per_Anhalter_durch_die_Galaxis“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.