Dr Otto Meyer (* 20. Merz 1935 z Ändinge) isch e dytsche Schriftsetzer un Dialäktdichter.
Lääbe
Dr Meyer isch z Ändinge mit drei Brieder un ere Schweschter ufgwagse. No dr Schuel het er in dr Druckerei Wild z Ändinge ne Lehr zum Schriftsetzer gmacht. In däm Beruef het er 50 Johr lang gschafft, unter anderem 26 Johr lang im Stückle-Verlag z Ättene. Wu mer aafangs 1980er Johr dr Bleisatz ufgee het, het dr Meyer anne 1981 bi dr Ändinger Firma Vollherbst-Druck aagfange un dert bis zue syre Pänsionierig anne 1999 im Korrektorat gschafft.
Im Mai 1958 het dr Meyer Hilda Dorer vu Simonswald ghyrote. Si hän zäme ne Dochter, Beatrix, ghaa, wu anne 2008 im Alter vu 49 Johr gstorbe isch. Dr Meyer läbt mit syre Frau z Ändinge.
Mer chännt dr Otto Meyer am Chaiserstuel un driber uuse as Dialäktautor, wu Gedicht un Gschicht im Ändiger Dialäkt schrybt un vordrait. Dodin bschrybt er s Alldagslääbe vu dr Räbbuure am Chaiserstuel. E Uuswahl vu sym Schaffe het er anne 1998 im Biechli „vu domols un hit“ uusegee. Zum 80. Geburtsdag vum Meyer anne 2015 het dr Roland Vitt in dr Badische Zytig iber en gschribe:
„Weit über Endingen hinaus bekannt ist Otto Meyer aufgrund seiner Leidenschaft für den alemannischen Dialekt. Seine Aufzeichnungen spiegeln die Verbundenheit mit seiner Heimat, der Kaiserstühler Landschaft, ihren Leuten und ihrer Sprache wider. Viele Leute schätzen seine Texte, weil er so schreibt, wie die Leute am Kaiserstuhl eben reden.“
Dr Otto Meyer isch au ne engaschierte Musiker. Är spiilt Zither un isch Mitgliid im Zither-Club Ändige. Derzue isch er syter anne 1948 Mitgliid vu dr Stadtmusik Ändige, aafangs het er Klarinette gspiilt, speeter isch er uf s Saxophon gwägslet. Vu 1948 bis1993 isch er aktive Musiker in dr Stadtmusik gsii, anne 1988 isch er Ehremitgliid wore. Är het di silberni un di guldini Ehrenoodle vum Bloosmusikverband kriegt un anne 1990 d Landesehrenoodle. In dr Stadtmusik isch er au vu 1971 bis 1993 Vizedirigänt gsii un ab 1972 au Jugeduusbilder un Dirigänt vu dr Jugedkapälle.
Schrifte
- vu domols un hit. Eigenverlag, Endingen 1998
Weblink
- dr Otto Meyer uf dr Websyte vu dr Muetersproch-Gsellschaft mit Täxtprobe
- dr Otto Meyer uf dr Websyte vum Harald Noth
- Roland Vitt: Musik und Mundart sind seine Leidenschaft (Badische Zeitung, 20. Merz 2015
- Adventsstammtisch vu dr Muettersprochgruppe „Rund um dr Kahleberg“ 2018. Am Aafnag list dr Otto Meyer Gedicht un Gschichtli vor.