S Mundartfestival Arosa isch es Festival für d Dialäktkultur, wo z Arosa im Bündnerland über d Büüni goot.

Es goot vier Tääg lang, und me cha de Dichter, wo i dr Mundart schrybe, go zuelose, wie si öppis vo irne churze Verzelligen und us irne Romään lääse, Konzärt vo Naturjutz bis Rap und Slam Poetry-Uuftritt bsueche und bi Diskussioone zu dr Dialäktkultur drby sy. Dr Kursaal Arosa isch s Festivalzäntrum.

S erschte Mol isch s Mundartfestival Arosa anne 2017 im Hotäl Schwiizerhof gsi. Ufem Programm, wo vom 12. bis zum 15. Oktober 2017 ggangen isch, isch es Podiumsgsprööch zum Thema vo de Schwiizer Dialäkt gstande, wo dr Bernhard Thurnheer, dr Churer Gimma (Gian-Marco Schmid), d Leonie Barandun-Alig un dr SRF-Mundartredakter Markus Gasser sind cho rede. Am Festival sind Züri West, Liricas Analas, dr Pedro Lenz, dr Renato Kaiser, d Gülsha Adilji, dr Andreas Neeser, dr Walter Lietha, Trummer & Nadja Stoller mit Lieder vo dr Maria Lauber,[1] d Marietta Kobald und dr Christian Schmid ufträtte. Dr Schmid het sys nöie Buech Mir stinkts vorgstelt.[2]

S zwöite Mundartfestival Arosa vo anne 2018 het s Thema Mundart-Kultur in den Bergen gha. Im Programm sind gsi: d Steff la Cheffe, Knackeboul, dr Dänu Siegrist, dr Andrea Zogg, d Nyna Dubois, dr Mario Pacchioli, d Leonie Barandun-Alig und no anderi, und au dr düütsch Kabarettischt Thomas C. Breuer isch yglade gsi.[3]

S dritte Mundartfestival Arosa isch vom 3. bis zum 6. Oktober 2019 ggange. Drby sin gsi: d Stefanie Grob, dr Rolf Hermann, dr Hanspeter Müller-Dossaart, dr Dominik Muheim, dr Baze (Basil Anliker), s Trio Chäslädeli un d Fiona Cavegn. D Mundartsändig Schnabelweid vom Schwiizer Radio isch au uf Arosa cho und het diräkt usem Festival brichtet. Dr Christian Schmid het vo sym Buech Häbet nech am Huet! E Chiflete gredt.[4]

S vierte Mundartfestival Arosa goot vom 1. Oktober bis zum 4. Obtober 2020.

Fuessnoote

  1. ↑ Ischt net mys Tal emitts? Trummer & Nadja Stoller. Frutigdeutsche Lieder und Geschichten nach Maria Lauber (Memento vom 15. Oktober 2019 im Internet Archive) uf trummerstoller.ch
  2. ↑ Stimmenvielfalt am ersten «Mundartfestival Arosa Lenzerheide» (Memento vom 15. Oktober 2019 im Internet Archive) e Sändig vo dr Schnabelweid am 19. Oktober 2017 über s erschte Mundartfestival Arosa
  3. ↑ Gelungenes zweites Mundartfestival in Arosa (Memento vom 15. Oktober 2019 im Internet Archive) Artikel uf suedostschweiz.ch vom 8. Oktober 2018
  4. ↑ 3. Arosa Mundartfestival (Memento vom 15. Oktober 2019 im Internet Archive) uf hoch3magazin.ch
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.