D María de Montserrat Bibiana Concepción Caballé i Folch [munsəˈrat kəβəˈʎe] (* 12. April 1933 z Barcelona; † 6. Oktober 2018 au dert) isch e spanischi Operesängeri (Sopran) gsii. Si het as aini vu dr wichtigschte Operesängerne gulte un mit iber 4000 Ufdritt as letschti großi Operediva.
Lääbe
D Caballé het z Barcelona un z Mailand Gsang studiert un 1956 am Theater Basel as Mimi in La Bohème vum in Puccini debütiert. Derzue het si am Theater z Saarbrücken gsunge. Vu 1959 bis 1962 isch si am Theater der Freien Hansestadt Bremen engaschiert gsii. Anne 1965 isch si fir d Marilyn Horne in ere konzertante Uffierig vu s Donizettis Opere Lucrezia Borgia in dr Carnegie Hall yygsprunge un het s Publikum begaischteret. Im nämlige Johr et si an dr Metropolitan Opera z New York as Margarethe in s Gounods Faust debütiert, doderdur isch si international bekannt wore. Mer het d Caballé vylmol as Gascht bi Feschtspiil chenne here (u. a. z Glyndebourne), syter anne 1971 isch si au regelmäßig an dr Hamburgische Staatsoper ufdrätte. Derzue isch si vylmol as Kunzärtsängeri ufdrätte.
Schwärpinkt vu ihrem umfangryche Repertoires hän vor allem d Opere vum Rossini, em Donizetti un em Bellini bildet, aber au vum Verdi un em Puccini. Merkmol vu ihre lyrische Stimm sin sinnligi Scheeni un e usserordeli Piano.
Anne 1987 het si zäme mit em Rocksänger Freddie Mercury s Lied Barcelona ufgnuu, wu 1992 zue dr Olympische Summerspiil wider vereffetligt woren isch un e große Erfolg woren isch.
Anne 1997 het dr Mike Moran ihre Album Friends For Life produziert, wu Duett mit dr Caballé un verschidene Sänger druf het, u. a. Bruce Dickinson, Johnny Hallyday, Johnny Logan, Gino Vannelli un Helmut Lotti.
Anne 1998 isch d Caballé mit eme Bambi uuszaichnet wore, 2007 het si dr Musikbyys Echo Klassik fir ihre Lääbeswärch iberchuu.
Am 1. April 2007 isch d Montserrat Caballé no 18 Johr zum erschte Mol wider uf dr Bihni vu dr Wiener Staatsopere ufdrätte. An dr Syte vu dr Natalie Dessay, em Juan Diego Flórez un dr Janina Baechle het si d Party vu dr Duchesse de Crakentorp in s Donizettis La fille du régiment (Die Regimentstochter) in ere Koproduktion vu dr Wiener Staatsopere, em Royal Opera House Covent Garden un dr Metropolitan Opera New York gee. Drotz ihrem hoche Alter isch si no im Juni 2018 z Kiew ufdrätte.[1]
Am 6. Oktober 2018 isch d Caballé im Alter vu 85 Johr gstorbe.
Repertoire
|
|
Heerbyschpel
- Montserrat Caballe. Un bel di vedremo. Madama Butterfly. In: YouTube. Abgruefen am 4. November 2015.
Weblink
- Montserrat Caballé in dr Internet Movie Database
- Caballé Montserrat Caballé bi Discogs (änglisch)
- D Montserrat Caballé singt s Duett us em vierte Akt vu Don Carlos mit em Jaume Aragall uf YouTube
- www.caballe.de
- Montserrat Caballé (weberclaudia.de)
Fueßnote
- ↑ Die Schmerzen fühlen Artikel uf faz.net vom 6. Oktober 2018
 |
Dä Artikel basiert uff ere fräie Übersetzig vu dere Version vum Artikel „Montserrat_Caballé“ vu de dütsche Wikipedia. E Liste vu de Autore un Versione isch do z finde. |