Mitt Romney (2011)
Unterschrift
Unterschrift
Mitt Romney mit syre Frau Ann (2007)

Dr Willard Mitt Romney [ˈɹɑːmnɪ] (* 12. Merz 1947 z Detroit, Michigan) isch e US-amerikanische Multimillionär, Politiker vu dr Republikanische Bartei un ehmolige Gouverneur vum Bundesstaat Massachusetts. Ä isch ain vu dr Kandidate vu dr Republikanische Bartei fir d Nominierig zue dr Bresidäntschaftswahl 2008 un Kandidat vu dr Republikanische Bartei fir d Bresidäntschaftswahl 2012 gsii.

Läbe

Dr Mitt Romney isch z Detroit uf d Wält chuu. Syy Vater George W. Romney isch vu 1963 bis 1969 Gouverneur vu Michigan gsii. Syy Mueter Lenore het sich anne 1970 z Michigan erfolglos fir d Republikaner um e Sitz im US-Senat bworbe. Dr Mitt Romney het drei Gschwischter un isch uf di elitär Cranbrook School (di hitig Cranbrook Kingswood School) z Bloomfield Hills gange, e Privatschuel, wu zue dr Cranbrook Educational Community ghert. Dert het er anne 1965 syy Highschool-Abschluss gmacht.

An dr Cranbrook School het er d Ann Lois Davies (* 1949) chänneglehrt. Si isch 1966 zum Mormonetum konvertiert un anne 1969 syy Wyyb wore. S Baar het fimf Sihn un läbt hite in dr Nechi vu Boston.

Dr Mitt Romney isch in dr fimfte Generation Mitglid vu dr Chilche Jesu Christi vu dr Hailige vu dr Letschte Däg („Mormone“), syy Urgroßvater Parley P. Pratt isch Grindigsmitgliid vum Kollegium vu dr Zwelf Aposchtel gsii.[1] As junge Erwachsene isch dr Romney ab 1966 zwai Johr as Missionar z Frankrych gsii.[2][3] Är het an dr Brigham Young University studiert, wun er 1971 syy Bachelor of Arts gmacht het un an dr Harvard University, wun er 1975 syy Juris Doctor un e Master of Business Administration gmacht het.[4] Von 1981 bis 1986 isch er mormonische Bischof z Belmont gsii, eme Vorort vu Boston.[5] Vu 1986 bis 1994 het er d Verwaltig vu rund 4.000 Mormone im eschtlige Massachusetts glaitet.

Noch em Studium het er fir d Unternämmesberotig Bain & Company z Boston gschafft. Speter isch er Grindungspartner vu dr 1984 grindete Private-Equity-Gsellschaft Bain Capital gsii, wun er bis 1999 glaitet het. Syy Privatvermege vu gschetzt 250 bis 350 Millione Dollar[6][7][8] stammt us dr Ertreg vu syre Arbet bi Bain Capital. Ass er anne 2010 het er dr niderscht Styyrsatz fir Vermegesertreg vu 13,9 Prozänt (2011: 15,4 %) zahlt ghaa het, isch vu bolitische Gegner in dr Vorwahlperiod thematisiert wore.[9]

Anne 1994 het er versuecht gege dr Edward Kennedy in dr US-Senat gwehlt z wäre. Dr Kennedy het gwunne, dr Romney het mit 41 % vu dr Stimme s zwaitbescht Ergebnis ghaa, wu je ne republikanische Kandidat geg dr Kennedy erziilt ghaa het.

Anne 1999 isch er as Gschäftsfierer vum Organisationskomitee mit dr Organisation vu dr XIX. Olympische Winterspiil 2002 z Salt Lake City, Utah, beufdrait wore.

Gouverneur vu Massachusetts

Anne 2002 isch er vu dr Republikanische Bartei as Kandidat fir s Gouverneursamt vu Massachusetts nominiert wore. Im Novämber 2002 isch dr Romney zum 70. Gouverneur vu Massachusetts gwehlt wore mit 50 % vu dr Stimme, di demokratisch Kandidati Shannon O’Brien het 46 % vu dr Wehlerstimme iberchuu. As Gouverneur het er fir e uusglichene Huushalt vum Bundesstaat gsorgt.

Im Novämber 2004 het er versuecht d Entschaidig vum Oberschte Grichtshof vum Bundesstaat zue glychgschlächtlige eheähnlige Partnerschafte z verhindere dur e Änderig vu dr Verfassig, wu d Eh uf Mann un Frau bschränkt hätt.

Im Dezämber 2004 het dr Romney aagchindetn, er wett e Vorschlag yybringe, z Massachusetts d Dodesstrof fir Terrorismus, Massemord un Mord an Bolizeibeamte wider z erlaube. Dr Gesetzentwurf isch im Repräsentantehuus vu Massachusetts am 28. April 2005 mit 99 Stimme gege 53 abglähnt wore. Är het au syy Veto gege d Stammzelleforschig yyglait, s Barlemänt het syy Veto aber dytlig iberstimmt.

Bresidäntschaftskandidatur 2008

Am 13. Februar 2007 het dr Mitt Romney offiziäll syy Kandidatur fir s Bresidäntenamt aagchindet. Är het insgsamt 44 Mio. US-Dollar an Spändegälder gsammlet un het bi dr Vorwahle in dr Bundesstaate Wyoming, Nevada, Michigan, Maine, Massachusetts, Colorado, Minnesota, Montana, North Dakota un Utah di maischte Stimme iberchuu. Am 7. Februar 2008 isch dr Romney us em Rännen um d Bresidäntschaftskandidatur uusgstiige no syym schlächte abschnyyde bi dr Abstimmige am „Super Tuesday“.

Bresidäntschaftskandidatur 2012

Im April 2011 het dr Romney aagchindet syy Kandidatur fir d Bresidäntschaftswahle 2012 vorzberaitete.[10] Insgsamt het er gege syni Konkurränte Rick Santorum, Newt Gingrich un Ron Paul bi 41 vu 56 Vorwahle gwunne. Am 10. April 2012 het dr Santorum syy Ruckzug us em Ränne verchindet, dr Newt Gingrich am 3. Mai, dr Ron Paul derno am 14. Mai. Mit syym Vorwahlsiig z Texas am 29. Mai 2012 het sich dr Romney di netige 1144 Stimme zur Nominierig chenne sichere. Am 28. Augschte 2012 isch dr Romney uf em Barteidag vu dr Republikaner z Tampa mit großer Mehrhait offiziäll zum Bresidäntschaftskandidat gwehlt wore.[11]

Bi dr Bresidäntschaftswahle am 6. Novämber 2012 isch dr Romney gege dr amtierend US-Bresidänt Barack Obama unterläge. No dr verorene Bresidäntschaftswahl isch dr Romney als Ufsichtsrot vom Hotelbetriiber Marriott returgange i d Privatwirtschaft.

Schrifte

  • Turnaround: Crisis, Leadership, and the Olympic Games, Washington: Regnery Publishing 2001. ISBN 0-89526-084-0 (mit Timothy Robinson)
  • No Apology: The Case for American Greatness, New York: St. Martin's Press. 2010. ISBN 0-312-60980-9

Fueßnote

  1. ↑ Kandidatensuche in den USA Archivlink (Memento vom 23. Jänner 2009 im Internet Archive) n-tv, 6. März 2007
  2. ↑ Glaubenskampf ums Weiße Haus, Tagesspiegel, 7. Dezember 2007
  3. ↑ US election 2012: Mitt Romney's life as a poor Mormon missionary in France questioned telegraph.co.uk, 15. Dezember 2011, abgruefen am 5. Augschte 2012
  4. ↑ Iigschränkti Vorschau uf books.google.de
  5. ↑ auslandsjournal.zdf.de:Moderne Mormonen? Die einflussreiche Glaubensgemeinschaft hinter Mitt Romney
  6. ↑ Mitt Romney Worth as Much as $250 (Memento vom 4. Februar 2012 im Internet Archive) Fox News, 13. Augschte 2007
  7. ↑ Der Kandidat der Wall Street faz.net, 31. Dezämber 2011
  8. ↑ Romney Aides Say His Worth Is at Least $260 Million New York Times, 12. Mai 2007
  9. ↑ Wie man auf 20 Millionen Dollar 14 Prozent Steuern zahlt, sueddeutsche.de am 24.01.2012, abgruefen am 25.01.2012
  10. ↑ tagesschau.sf.tv
  11. ↑ US-Präsidentschaftswahlkampf: Republikaner schicken Romney ins Rennen bi tagesschau.de, 29. Augschte 2012 (abgruefen am 29. Augschte 2012).
 Commons: Mitt Romney – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Mitt_Romney“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.