Dialäkt: Baseldütsch

Dr Matthyas Jenny (* 14. Juni 1945 z Basel; † 10. Oktober 2021 z Basel[1]) isch e Schwizer Verleger, Autor und Literaturaktivist gsi.

Läbe und Wirke

Dr Matthyas Jenny het e Lehr agfange imene Reisebüro, het e zitlang mit sine Chinder Caspar und Zoë uf dr griechische Insle Ios gläbt, denn im Tessin und sit 1977 wider z Basel. 1976 het er si Verlaag «Nachtmaschine» gründet, vo 1976 bis 1982 s erste dütschsproochige Poesiidelifon bedriibe, en Idee won er vom John Giorno sim Projekt „Call a poem“ im Museum of Modern Art übernoh het, und vo 1979 bis 1988 dr Daag vo dr Poesii organisiert, wo z Basel, Saarne, Lieschdel, Züri, Bärn, Sanggalle, Kassel und Hamburg stattgfunde het und wo mä drbii au no e «Baum vo dr Poesii» pflanzt het. 1997 het er s Internationale Litraturfestival Basel gründet, won er d Leitig drvo 2007 ufgee het,[2] , 2001 s Internationale Lyrikfestival Basel und het 2003 dr Aastooss gee zur Buechmäss BuchBasel.[3]

1997 het er d Idee für es Litratuurhuusbrojekt usgaarbäitet, wo denn im April 2000 vo dr Christoph Merian Stifdig Basel as «Literaturhaus Basel» realisiert worde isch. Sit 2006 het dr Jenny zsämme mit dr Ursula Wernle s kleine Literaturhaus Basel gläitet. Das isch ganz unabhängig gsii und het ihne beide ghört. Sit em 29. Mai 2007 het er die chläinst Buechhandlig z Basel, d «Bachletten Buchhandlung», elei ka.

As Autor het dr Jenny u. a. für die politisch-satiirischi Zitschrift «Der Metzger» gschriibe und für d Litraturzitschrift Gasolin 23, wo vom Jürgen Ploog, Walter Hartmann, Carl Weissner und Jörg Fauser uusegee worden isch und hüt as ‹legendär› zelt.

Dr Verlaag «Nachtmaschine»

D Nachtmaschine, won er 1976 ufdoo het, häisst eso, wil dr Jenny nume z Nacht dört het chönne schaffe, wil er underdags as Eläierziehende mit sine Chinder Zoë und Caspar zsämme gsi isch. Dr Verlaag het bis 2006 meh as 150 Ditel uusebrocht, under anderem Büecher vom Hansjörg Schneider, Prosa vom Jürgen Ploog und zwei Erzählbänd vom Jörg Fauser und vom René Schweizer.

Familie

Dr Matthyas Jenny isch dr Vadder vom Caspar Jenny und vo dr Schwizer Schriftstellere Zoë Jenny. Wo si Fründin, d Ursula Wernle, chrank worden isch, hän si ghüroote, und er het sich 2007 vo siine Gschäft zruggzooge, für zum sä z pflääge. No ihrem Dood im Früehlig 2007 het sich dr Jenny vor allem um d Bachlätte Buechhandlig und um s Chläine Litratuurhuus Basel kümmeret.

Schrifte

  • Mittagswind. Gedicht. Basel 1973.
  • Fahrt in eine vergangene Zukunft. Gedicht. GTP, Basel 1975.
  • Zwölf-Wort-Gedichte Band 1. GTP, Basel 1976.
  • Zwölf-Wort-Gedichte Band 2. GTP, Basel 1976.
  • City straight up. Short Stories. GTP, Basel 1976.
  • Traumwende. Gedichte. GTP, Basel 1977.
  • Postlagernd. Roman eines Durchbrenners. Maro, Augsburg 1981.
  • Highway-Junkie. Short Stories. Lichtspuren, Bärn 1983.
  • Alles geht weiter, das Leben der Tod. Short Stories. Lenos, Basel 1994.
  • Die Beschreibung der Tiefsee. Roman. Lenos, Basel 1996.
  • Die Ankunft der Nacht. Stories, MaroVerlag, Augsburg 2014.

Uszeichnige

  • 1977: Wärkbiidrag vo dr Pro Helvetia Züri für e Roman Postlagernd
  • 1981: Briis vo dr Autoregrubbe Olte für sini Dätikeit as Verleger
  • 1986: „Jäggi-Preis“ vo dr Buechhandlig Jäggi Basel zsämme mit em Günter Wallraff
  • 1998: Anerkennigsbriis vo dr UBS Basel/Züri für literarischi Dätikeite
  • 2009: Wärkbiidrag Basel-Stadt an Roman Durch die Luft
  • 2011: Kulturbriis vo dr Stadt Basel
  • 2011: Kulturpreis der Stadt Basel
  • 2017: Guldener Löiestärn 2017 Lions-Club St. Alban Basel

Weblingg

Fuessnoote

  1. ↑ Matthyas Jenny verstorben | Basler «Broadway»-Gründer David Schoenauer verstorben. In: Basler Zeitung, 11. Oktober 2021, abgruefen am 12. Oktober 2021.
  2. ↑ Presseportal Schweiz; vom 26. Januar 2007 (Site cha nüme abgrüeft wärde; Suche im Webarchiv) Information über e Rücktritt vom Matthyas Jenny as Läiter vom Internationale Litraturfestival
  3. ↑ Geschichte des (Memento vom 7. Novämber 2009 im Internet Archive) Buch- und Literaturfestival Basel
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.