D Gebiet vo de Markgrafschaft

D Markgrafschaft Baden-Durlach isch es Territorium, wo in de frühe Neuziit im Heilige Römische Riich Bschtand het gha un zwar i de Johr 1535 bis 1771.

Gschicht

Wappe vo Bade-Dorlach

Am Aafang isch d Markgrafschaft Bade gschtande. Durch e Erbteilig isch di Markgrafschaft im Johr 1535 teilt worde un so sin d Baden-Baden un d Markgrafschaft Bade-Durlach entschtande. Wiil de erscht Marggraf vo Bade-Durlach Ernscht gheisse het, red ma au vo de Ernestinische Linie, wo d Herrschaft z Bade-Durlach übernoh het. Im Gägesatz zu Bade-Bade, wo katholisch blibe isch, het de Markgraf Karl II. im Johr 1556 d Reformation iigfüert. Wichtig für d Markgrafschaft isch au d Verlegig ve de Residenz im Johr 1565 gsi, wo d Herrscher vo Pforze uf Durlach züglet sin. Vo 1594 bis 1622 het Bade-Durlach die oberi Markgrafschaft (Bade-Bade) zwangsverwaltet. Wo aber de Markgraf Georg Friedrich 1622 d Schlacht vo Wimpfe verlore het, isch es mit de Zwangsverwaltig vorbi gsi. E schweri Ziit für d Markgrafschaft isch d Ziit vom Pfälzische Erbfolgechrieg gsi. Durlach un Pforze sin niderbrönnt worde. Au deswäge het sich de Markgraf Karl Wilhelm entschide es nois Schloss zbaue. Ab 1715 isch im Hardtwald zwüsche Durlach un em Rhy des Schloss bauet worde un e chli spöter di noi Stadt Karlrue derzue. Im Johr 1771 het de Markgraf Karl Friedrich d Markgrafschaft Bade-Bade geerbt nach em Uussterbe vo de Albertinische Linie, wis im Erbvertrag vo de beide Linie isch vorgsäh gsi. So het d Markgrafschaft Bade-Durlach im 1771 es End gfunde.

Territorium

Zu de Markgrafschaft Bade-Durlach hei d Gebiet am mittlere Oberrhy rund um d Städt Pforze un Durlach ghört, ausserdem d Herrschaft Hachberg um Emmedinge un s Markgräflerland.

Markgrafe vo Bade-Durlach

  • Ernst I., Markgraf (1533–1553)
  • Karl II., Markgraf (1553–1577)
  • Anna von Veldenz, Regentin (1577–1584)
  • Georg Friedrich, Markgraf (1584–1622)
  • Friedrich V., Markgraf (1622–1659)
  • Friedrich VI., Markgraf (1659–1677)
  • Friedrich Magnus, Markgraf (1677–1709)
  • Karl Wilhelm, Markgraf (1709–1738)
  • Karl August Markgraf, Regent (1738–1746), (Vormundschaftsregierig)
  • Karl Friedrich, Markgraf vo Bade-Durlach (1746–1771), Markgraf vo Bade (1771–1803), Kurfürscht (1803 - 1806), Großherzog (1806–1811)

Literatur

  • Armin Kohnle: Kleine Geschichte der Markgrafschaft Baden. G. Braun Buchverlag, Karlsruhe 2007, ISBN 978-3-7650-8346-4
Dä Artikel basiert uff ere fräie Übersetzig vum Artikel „Markgrafschaft_Baden-Durlach“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.