De Machaon (altgriech. Μαχάων) isch i de griechische Mythologii e Hailheros und de Feldarzt vo de Achäer im Troianische Chrieg. Er isch e Schüeller vom hailchundige Kentaur Cheiron gsii.

De Machaon isch de Soo vom Asklepios und vo de Epione, s wered aber ono anderi Neme vo sinnere Muetter aggee. De Machaoon hett d Antikleia ghüroote und isch de Vatter vom Gorgasos und vom Nikomachos. D Muetter vo sinene andere Söö isch nöd bikannt, eri Näme sind Sphyros, Alexanor und Polemokrates. Si sind ali Haiheroe, wo e Tempel för de Asklepios gstiftet ghaa hend.

Zäme mit sim Brüeder Podaleirios hett er 30 Schiff uf Troia gfüert, d Stedt wo die beede biherrscht hend sind nochem Schiffkatalog Trikke, Oichalia und Ithome. As Feldarzt vo de Grieche hett er de Menelaos ghailt, wo vomene Pfiil i de Schultere verwundet woren isch. Er isch im Chrieg vo de Amazone Penthesileia töödt wore, nochere andere Version aber vom Eurypylos. De Nestor hett denn d Tootebai vom Machaon uf Gerenia broocht und dai bistattet. De messenischi König Glaukos hett denn z Gerenia d Vereerig vom Machaon iigfüert. De Pausanias, wo im 2. Joorhundert Gerenia bsuecht hett, sait, as da Heiligtum vom Machaon Rhodos ghaisse hett.

Literatur

• Otto Höfer: Machaon. In: Wilhelm Heinrich Roscher (Hrsg.): Ausführliches Lexikon der griechischen und römischen Mythologie. Band 2,2, Leipzig 1897, Sp. 2228–2231 (Digitalisat).
• Benjamin Hederich: „Gründliches mythologisches Lexikon“, Leipzig, Gleditsch 1770 der Fürstlich Fürstenbergischen Hofbibliothek zu Donaueschingen. Wissensch. BG. (online) ISBN 978-3-89853-535-9; Reprographischer Nachdruck, Darmstadt 1996. ISBN 3-534-13053-7
• Projekt Gutenberg-DE Gustav Schwab: Sagen des klassischen Altertums Machaon und Podaleirios (Kapitel 144) ISBN 3-458-31827-5