Dr Lucius Pol (* 28. März 1754 z St. Moritz; † 2. Februar 1828 z Fideris) isch e refermierte Pfaarer und e Naturwüsseschaftler us dr Schwiiz gsi.
Dr Lucius Pol isch dr Soon vom Schuemacher Jan Tamin Pol und vo däm sinere Frou Anne gsi. Er isch z Sankt Moritz im Engadin uf d Wält cho und z La Punt id Schuel ggange. Z Neuwied het er e theoloogischi Usbildig übercho, und drno het er im Bündnerland chöne als Geistliche schaffe. Er isch z Schuders, sid 1776 z Luzein und 1780 z Fläsch Pfaarer gsi. I dr Zyt vo dr Helvetik isch dr Pol so wie au es bar anderi Püntner Pfäärer vo de Öschtryycher gfange gnoo und uf Innsbruck procht worde.
Wo dr Pol wider frei cho isch, het er 1803 z Malix und 1804 wider z Luzein und sid 1823 z Fideris als Dorfpfaarer gwürkt.
Scho 1778 het dr Pol sech mit praktische Frooge vo dr Wirtschaft afo beschäftige, won er ghulfe het d Gsellschaft vo de landwirtschaftleche Fründ z gründe. Anne 1785 isch sini Abhandlig Ueber die Käsebereitung: Fragmente, aus Erfahrungen und Auszügen meistens aus dem Prodomo dell'Abate Gerolamo Ottolini […] usechoo. Z Innsbruck het er sech i de Naturwüsseschafte wyterbildet, und zrugg i dr Heimet isch er eine vo dene gsi, wo als Pionier d Natur vo de Bündner Bärge isch go aluege. 1807 het er s Wärch Unmaßgeblicher Vorschlag zu einer Revision der Synodalordnungen und des Kirchenwesens gschribe.
Z Fideris isch er am 2. Februar 1828 mit 74 Joor gstoorbe.
Literatur
- Karin Marti-Weissenbach: Pol, Luzius. In: Historisches Lexikon vo dr Schwiiz.