Dialäkt: Undermarkgreflerisch
Dr Lorenz Bock (links)

Dr Lorenz Bock (* 12. Augschte 1883 z Nordstette; † 3. Augschte 1948 z Rautweil) isch e dytsche Jurischt un Bolitiker (Zäntrum, speter CDU) gsi. Vum 8. Juli 1947 bis zue sym Dod isch er dr erscht Staatsbresidänt vu Wirttebärg-Hauezollre gsii.

Läbe un Beruef

Dr Lorenz Bock isch am 12. Augschte 1883 z Nordstette uf d Wält chuu. Noch em Bsuech vu dr Gymnasie z Horb un z Rautweil het er vu 1902 bis 1907 Rächtswisseschaft an dr Universitete z Münche un z Dibenga studiert. Derwylscht er studiert gha het, isch er in di katholisch Studänteverbindig K.St.V. Alamannia Dibenga yydrätte. Ä het s Referändariat am Amtsgricht Riedlenge, am Landgricht Raveschburg un bi dr Staatsaawaltschaft z Stuegert absolviert, het zum Dr. jur. promoviert un het syt 1910 as Rächtsaawalt z Rautweil gschafft. Vu 1915 bis 1918 het er as Soldat am Erschte Wältchrieg deilgnuu.

Noch em Änd vum Chrieg het dr Bock wider as Rächtsaaawalt gschafft. Speter isch er au as Notar zuegloo wore. Im Augschte 1944 isch er vu dr Gestapo verhaftet wore. Dr Lorenz Bock isch am Oobe vum 3. Augschte 1948 z Rautweil an dr Folge vun ere Darmlehmig gstorbe.[1]

Bolitik

Dr Bock isch scho vor em Erschte Wältchrieg in d Zäntrumsbardej yydrätte un isch vu 1919 bis 1933 Gmeirot z Rautweil gsi. Är het 1919 dr Verfassiggebende Landesversammlig vum Freje Volksstaat Wirttebärg aaghert un het dert e groé Aadeil gha am Entstoh vu dr neje Verfassig. Im glyyche Johr isch er in dr Wirttebärgische Landdag gwehlt wore, wun er in allne Legislaturperiode aaghert bis zue sällem syyre Uflesig anne 1933. Vu 1928 bis 1933 isch er Vorsitzer vu dr Zäntrumsfraktion im Landdag gsi.

Noch em Zweete Wältchrieg het dr Bock mitgmacht bi dr Grindig vu dr CDU im Landchreis Rautweil. Anne 1945 isch er Mitglid vum Rautweiler Gmeirot wore un vu dr dertige Chreisversammlig. Är isch syt 1946 Mitglid gsi vu dr Berotende Landesversammlig un isch anne 1947 in dr Landdag vu Wirttebärg-Hauezollre gwehlt wore, wun ere bis zue syym Dod aaghert het. Am 8. Juli 1947 isch er zum Staatsbresidänt vum Land gwehlt wore.[2] Är het derno ne Koalitionsregierig us CDU, SPD un DVP bildet. Glyychzytig het er au d Leitig vum Finanzminischterium ibernuu. Dr Lorenz Bock isch no in syyre Amtszyt gstorbe. Syy Noofolger as Staatsbresidänt isch dr Gebhard Müller wore.

Ehrige

  • Lorenz-Bock-Strauß z Rautweil

Literatur

  • Jürgen Klöckler: Abendland - Alpenland - Alemannien: Frankreich und die Neugliederungsdiskussion in Südwestdeutschland 1945-1947, S. 230, Oldenbourg Wissenschaftsverlag, München 1998, ISBN 3-486-56345-9
  • Frank Raberg: Biographisches Handbuch der württembergischen Landtagsabgeordneten 1815–1933. Im Auftrag der Kommission für geschichtliche Landeskunde in Baden-Württemberg. Kohlhammer, Stuttgart, ISBN 3-17-016604-2, S. 85.

Fueßnotte

  1. ↑ DER SPIEGEL: Die munteren Bäume der Freiheit, Heft 34/1948 vom 21. August 1948, S. 4
  2. ↑ DER SPIEGEL: Mann der goldenen Mitte, Heft 29/1947 vum 19. Juli 1947, S. 1
Dä Artikel basiert uff ere fräie Übersetzig vum Artikel „Lorenz_Bock“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.