Dialäkt: Undermarkgreflerisch

D Lisi Mangold (* 24. April 1950 z Böckte; † 4. Jänner 1986 au deert) isch e Schwyzer Schauspiileri gsii.

Leben

D Mangold het e Schauspiiluusbildig am Bühnestudio Züri gmacht.

Vu 1972 bis 1974 het si ne eerscht Engaschmänt am Schiller-Theater Berlin ghaa un het deert Wildwechsel vum Franz Xaver Kroetz mitgspiilt. Vu 1974 bis 1983 isch si Mitgliid vum Ensemble vu dr Münchner Chammerspiil gsii. Deert het si in verschiidene Inszenierige vum Ernst Wendt gspiilt, unter anderem 1976 d Wendla in Frühlings Erwachen vum Frank Wedekind, 1978 d Rita Grabow in Lovely Rita vum Thomas Brasch un d Luise in s Schillers Kabale und Liebe, 1979 d Titelroll in s Kleists Das Käthchen von Heilbronn (mit irem Lääbespaartner Charles Brauer as Chaiser), 1980 d Titelroll in s Strindbergs Fräulein Julie, 1981 d Prinzessin Leonore von Este in s Goethes Torquato Tasso (mit em Brauer as Antonio) un 1982 d Celia in s Shakespeares Wie es euch gefällt. Derzue het si an dr Münchner Chammerspiil unter anderem 1975 d Käthe in Einsame Menschen vum Gerhart Hauptmann (Reschy: Peter Palitzsch), d Hero in s Shakespeares Viel Lärm um nichts (Reschy: Friedrich Beyer) un d Elisabeth in Glaube Liebe Hoffnung vum Ödön von Horváth (Reschy: Michael Verhoeven), 1976 d Natascha in Nachtasyl vum Maxim Gorki (Reschy: Liviu Ciulei) un 1978 d Judith in Totentanz vum August Strindberg (Reschy: Harald Clemen) gspiilt.

Zäme mit em Ernst Wendt isch d Mangold anne 1983 an s Dytsch Schauspiilhuus z Hamburg gwäglset, deert het si 1984 d Titelroll in Minna von Barnhelm vum Lessing) gspiilt. Gaschtiert het si au an dr Ruhrfeschtspiil Recklinghausen un am Schauspiilhuus Bochum.

Dernääbe het si verschiideni Rolle in Film un im Fäärnseh ibernuu, unter anderem het si 1977 d Mikaela in The Serpent’s Egg vum Ingmar Bergman gspiilt.

D Lisi Mangold isch mit 35 Johr an Chräbs gstoorbe. Si isch langi Johr bis zue irem Dood mit em Schauspiiler Charles Brauer liiert gsii.

Filmografy

  • 1977: Tatort: Finderlohn
  • 1978: Deutschland im Herbst
  • 1977: Das Schlangenei (The Serpent's Egg)
  • 1981: Trokadero
  • 1984: Die schwarzen Brüder (Fäärnseh-Segsdailer)
  • 1984: Mann ohne Gedächtnis
  • 1985: Die Mitläufer

Heerspiil

  • 1976: Jean Chatenet: Die Wölfin – Reschy: Raoul Wolfgang Schnell (Kriminalheerspiil – SDR)
  • 1981/1982: Douglas Adams: Per Anhalter ins All – Reschy: Ernst Wend (BR, SDR un WDR)

Uuszaichnige

  • 1972 Emil-Oprecht-Bryys

Literatur

  • Thomas Blubacher: Lisi Mangold. In: Andreas Kotte (Hrsg.): Theaterlexikon der Schweiz. Band 2. Chronos, Zürich 2005, ISBN 3-0340-0715-9, S. 1167.
  • C. Bernd Sucher (Hrsg.): Theaterlexikon. Autoren, Regisseure, Schauspieler, Dramaturgen, Bühnenbildner, Kritiker. Von Christine Dössel und Marietta Piekenbrock unter Mitwirkung von Jean-Claude Kuner und C. Bernd Sucher. 2. Auflage. Deutscher Taschenbuch-Verlag, München 1999, ISBN 3-423-03322-3, S. 453 f.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.