Lägern | ||
---|---|---|
![]() D Lägere us de Luft D Lägere us de Luft | ||
Hechi | 859 m | |
Lag | Kanton Aargau und Kanton Züri, Schwiiz | |
Gebirg | Jura | |
Geografischi Lag | 669909 / 259185 | |
| ||
Typ | Faltejura | |
Gstei | Malmchalch |
![](../I/L%C3%A4gerngrat_4242.jpg.webp)
D Lägere isch en schmale, langgstreckte Bergrugge im Nordweschte vo de Stadt Züri un im Oschte vo de Stadt Bade. Er isch de öschtlichschti Berg vom Kettejura.
Geografii
De Hügelzug isch öppe zäänehalb Kilometer läng. Er verlauft vo Bade im Weschte, wo d Limet de Jura duet in ere Klus durschniide, bis uf Rägeschbärg un Tielschtoorf im Oschte. De weschtlichi Teil vom Berg ligt im Kanton Aargau, de öschtlichi im Kanton Züri. D Kantonsgränze goot übere höchschti Punkt vo dr Lägere, s Burghorn. De Bergrugge het uf de Weschthälfti en steile Grat, wo nach Norde Richtig Äredinge rasch abfallt un au uf de Südsite noch Wettige seer stotzig isch. Wäge dr Wescht-Oscht-Usrichtig vom Höhezug isch s Klima a de Lägerenordsiite düütlich anderscht wi uf de Südsite. Im Früehlig cha me de Unterschiid bsunders guet gsee, aber au d Bsidlig am Lägerehang goot uf de Südsite düütlich wyter ue wi uf de Nordsite.
Geologii
D Lägere isch in Schichte ufbauet, wo vo Norde nach Süde düent abfalle. Di oberi Schicht, wo teils us hertem, teils us weicherem Chalchstei bestoht un i d Wettiger-, d Badener- un d Wangenerschichte iiteilt wird, bildet de Grat vom Bergrugge. Drunter ligt di sognannti Effingerschicht us Chalchstei un Mergel un no düüfer Dogger un Malm.
Waldreservat
![](../I/L%C3%A4gern_Feuerlilie_0015.JPG.webp)
Viir Zürcher un zwei Aargauer Gmeinde hei mitenand es Waldreservat realisiert. Uf ere Flächi vo 159 Hektare soll 50 Joor lang s Holz ned wirtschaftlich gnutzt werde. S Alt- u Totholz, wo uf die Art als wi mee entschtoot, bildet mit dr Zyt en Läbesruum für selteni Vögel, Insekte un Pilz. D Flora vom Bärg isch uf de Nord- un uf de Südsite unterschidlich. Obe-n-am Lägeresüdhang wachsed vili chliwüchsigi Eiche un Linde, wil d Humusschicht derte dünn isch un es wägem Chalchbode seer troche-n-isch. Uf de Nordsite si zum Bischpil d Bueche bis zu zää Meter höcher, wil d Böde tiifgründiger un füechter si.
Kultuurlandschaft
Über d Lägere füert en Wanderwääg. Är isch au de öschtlichscht Deil vom länge Höewääg über e Jura, wo z Tielschtoorf afoot.[1] Bi Rägeschbärg heds au en Blaneetewääg.
D Burgruine Alt-Lägere un der Platz Hochwacht sin i dr Gschicht wichtigi Stelle uf em Berg gsi. Dr Hügel, wo d Stadt Rägeschbärg druff stoot, isch dur en chline Saddel vom Hauptgrat vo de Lägere abtrennt.
Ufem Berg träffe sech d Gmeindbänn vo vier Aargauer un sibe Zürcher Gmeinde. Bi Bade, Otelfinge, Sünike un Tielschtoorf hed me in Steibrüch dr Chalch gunne. Zmitz uf em Grat stoot e Radarstazioon vo de Skyguide.
Litratur
- Rolf Meier und Bruno Meier (Hg.): Die Lägern – eine Gratwanderung: Landschaft und Kultur eines Grenzberges. Verlag hier + jetzt. 2003. ISBN 3-906419-67-3