Dr Konrad Steffen (* 2. Jänner 1952 z Züri[1]; † 8. Augschte 2020 uf em Grönländische Inlandyys) isch e Schwyzer Glazioloog gsii. Är isch Diräkter vu dr Aidgnessische Foorschigsaastalt fir Wald, Schnee un Landschaft, Profässer am Institute for Atmosphere & Climate vu dr ETH Züri un Profässer im Fachberaich Architecture, Civil and Environmental Engineering an dr EPFL Lausanne gsii. Är het in syre berueflige Laufbahn e Raie vu Mässverfahren entwicklet, wu zum Verständnis vu dr Dinaamik vu dr Kryosphäre bryydrait ghaa hän haben.

Lääben und Wiirke

No sym Dipoloom (Dipl. Natw.), wun er anne 1977 kriegt het, isch er anne 1984 zum Thema „Oberflächentemperatur einer arktischen Polynya: North Water im Winter“ promoviert woore. Nääbe andere Posizioone isch er vu 1991 bis 1992 Schefredakteer vu dr Annals of Glaciology – Remote Sensing of Snow and Ice gsii, vu1991 bis 1999 Chairman vum Polar Data Archive Distribution Advisory Group vu dr NASA/EOSDIS un vu 1999 bis 2000 Schefredakteer vu dr Annals of Glaciology – Cryosphere Models and Validation. Vu 1997 bis 2005 isch er Profässer fir Geografy an dr University of Colorado Boulder gsii. Vu 2005 bis 2012 isch er Diräkter vum Cooperative Institute for Research in Environmental Sciences gsii. Im fimfte Sachstandsbericht vum IPCC isch er Hauptautoor vum Kapitel iber d Kryosphere gsii.

Dr Steffen het in syre Karriere iiber 100 wisseschaftligi Publikazioone verfasst.[2]

Dr Steffen isch schwyzerisch-US-amerikanischer Doppelbuurger gsii. Am 8. Augschte 2020 isch er im Alter vu 68 Joor deetli veruuglickt z Grönland, wun er in dr Neechi vu dr Baasis Swiss Camp 70 km nordeschtli vu Ilulissat im Inlandyys in e Glätscherspalte gheit isch. Är het e Frau un zwai grooßi Chinder hinterloo.[3]

Fueßnote

  1. ↑ Konrad Steffen bi IEEE Xplore, abgruefen am 10. Augschte 2020.
  2. ↑ researcherid.com. Abgruefen am 30. August 2017.
  3. ↑ Top-Forscher Konrad Steffen stirbt bei Expedition. In: 20 Minuten. 10. August 2020, abgruefen am 10. August 2020.
Dä Artikel basiert uff ere fräie Übersetzig vu dere Version vum Artikel „Konrad_Steffen“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.