Dr Karl Völlmin (* 6. Jänner 1876 z Gälterchinde; † 6. Juni 1962 z Lieschtel) isch e Schwyzer Sydebandwäber gsi. Är isch reformiert und Bürger vo Gälterchinde gsi.
Sy Härkunft
Dr Karl Völlmin isch dr Soon vom Mathias Völlmin, Buur und Posimänter und dr Eva Schaub, Posimäntere gsi. Är het in erschter E`e 1898 d Maria Aenishänslin, Posimäntere, vo Gälterchinde und in zwöiter E`e 1948 d Lisette Fankhauser vo Trub ghürotet. Är isch z Sissech in d Primarschuel. Wo är zwölfi gsi isch, isch em d Mueter gschtorbe, dorum het är dr Schuelbsuech in dr Bezirksschuel z Böckte abbroche.
Sy Bruef und sys Würke
Dr Karl Völlmin het zäme mit syner Schweschter, scho als Chind, am verweiste Posimäntschtuel vo yrer Mueter gschafft. Das isch e Wäbschtuel gsi, wo me no vo Hand het müese aatrybe. Im Joor 1892 isch är den in e Sydebandfabrik go schaffe. Är het d Gnosseschaft vo de Sydebandwäber und Heimposimänter gründet und isch als Verträter vo dere Gnosseschaft im Verwaltigsrot vo dr Elektra Sissech-Gälterchinde und dr Elektra Gnosseschaft Farnsburg gsässe. Wo är zwänzgi gsi isch, isch är in die Freysinnigi Partei yträtte. Dr Karl Völlmin isch dr Gründer und Presidänt vom Konsumverein Gälterchinde gsi. Är isch im Gälterchinder Gmeinrot gsässe.
Literatur
- Buser Erich: Aus den Lebenserinnerungen eines sozialen Gelterkinders, Volksstimme vom 15.10.1993. U.B.
Weblink
- Dr Karl Völlmin im Personelexikon vom Kanton Basel Landschaft (Site cha nüme abgrüeft wärde; Suche im Webarchiv)