Der elteri Jakobus, wo öppe anne 44 noch Chrischtus gstorben isch, isch eine vo de zwölf Aposchtel gsi.
Zäme mit sim Brueder Johannes und em Andreas und em Simon Petrus isch er eine vo de erschte Jünger vo Jesus Chrischtus gsi. Mit däm het er denn au der Afang vo der Lydensgschicht im Garte Getsemani duregmacht.
Bi der Uferstehig vom Jesus isch der Jakobus au no z Jerusalem gsi. Er soll denn, wien e Legände seit, als Missionaar uf die Iberischi Halbinsle ggange sy. Spöter isch er wider im Heilige Land blibe, bis er under em Reschim vom Statthalter Herodus Agrippa öppe im Joor 44 gchöpft worden isch. Vo sim Tod wird im Markus- und em Matthäusevangelium verzelt.
E Gschicht, wo bis hütt psunders z Spanie bekant isch, seit, d Lyych vom Jakobus sig vo de andere Jünger uf eme Schiff oni Mannschaft is Middelmeer use gloo worde, und wil das Boot im Nordweschte vo der Provinz Iberie vo sälber am Strand vom Atlantik glandet sig, heig me der Dooti dört begrabe. Erscht im nüünte Joorhundert isch das Grab wider gfunde worde, und a däm sim Platz het me d Chile zur Erinnerig an Jakobus bout. Spöter isch dört z Santiago de Compostela die grossi Kathedrale hiichoo, wo eini vo de bedüütendschte Wallfaartschile vo de Chrischten isch. Und der heilig Jakobus isch scho im Middelalter der Nazionalheilig vo Spanie worde.
Was a de Jakobus-Legändene würlech dra sig, isch scho sid em Middelalter kontrovärs diskutiert worde.
Der Fyyrtig vom Jakobus isch der 25. Juli.
