Dä Artikel behandlet dr Baasler Rootsheer und Revoluzzer Jacob Henricpetri. Für anderi Persone mit däm Naame lueg do
Dialäkt: Baseldütsch

Dr Jacob Henricpetri, au Jakob Henricpetri oder Jacob Petri (* 28. Juli 1644 z Baasel, † noch 1695 vermuetlig z Wien) isch e Baasler Jurist, Rootheer und Revoluzzer gsi.

Lääbe

Dr Jacob Henricpetri het us dr bekannte Basler Buechdruckerfamilie Henricpetri gstammt und isch as Soon vom Baasler Rootheer Franz Jakob Petri und dr Magdalena Felgner uf d Wält cho. Mit vierzääni het er 1658 an dr Uniwersidäät Baael afo studiere, het 1659 dr Bakkalaureus Artium und 1661 dr Magister Artium gmacht. 1665 het er d Nöijeburgere Isabella de Thielle ghürootet. 1667 het er s Studium mit em Dokter vo dr Jurisprudänz abgschlosse. Im gliiche Joor isch er in dr Basler Groossi Root gweelt worde.

S 1691er Wääse

Lueg au dr Ardikel 1691er-Wesen

1690 het dr Groossi Root dr Chlii Root entmachdet und denn häi d Zümft brobiert, d Regierig z demokratisiere und häi Usschüss afo bilde. Dr Henricpetri het vo dr Baasler Obrikäit gsäit, si sig «pure Tyranney oder Oligarchey»[1]. Er isch im Februar zum Füerer vo de Usschüss gweelt worde, het denn aber für e Boste vom Rootschriiber kandidiert und eso s Verdraue vo de Zümft verloore, wil si gmäint häi, ass er d Site well wäggsle. Si Gusää Johannes Fatio het en abglööst und d Reforme witergfüert. Am 21. Septämber het dr Groossi Root dr Fatio aber lo festnee, het d Revoluzioon zämmedätscht und alli Reforme rückgängig gmacht.

Im Exil

Dr Henricpetri het chönne us Baasel flüchte, und so isch em s Loos vo de Afüerer vo dr Revoluzioon, wo köpft worde si, gspaart bliibe. Im Exil het er s Drakdaat «Basel, Babel» verfasst (1693)[1], won er din d Reformbeweegig vo 1691 duet rächtfertige. D Baasler Obrigkäit het en denn für vogelfrei erklaärt, si Bild am Galge ufghängt, si Drakdaat öffentlig lo verbrenne und vierhunder Thaler uf si Chopf gsetzt[2]. Dr Henricpetri isch witergflüchdet. 1694 isch er z Diessehofe und z Ulm gsi, im Joor druf z Lindau am Boodesee und schliesslig z Wien. Wo und wenn er gstorbe isch, isch nit bekannt.

Kwelle

Fuessnoote

  1. 1 2 Jacob Henricpetri, Basel, Babel, Das ist: gründlicher Bericht über den höchstverirrt- und verwirrten Zustand der Statt Basel, 1693
  2. ↑ Immanuel Stockmeyer, Balthasar Reber, Beiträge zur Basler Buchdruckergeschichte, 1840, S. 148
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.