| Jász-Nagykun-Szolnok | |
 |
 |
| Komitatssitz | Szolnok |
| Flächi | 5581,71 km² (8. Platz) |
| Ywohnerzahl | 399'200 Ywohner (2008, 9. Platz) |
| Bevölkerigsdichti | 71,5 Ywohner pro km² |
| Dialekt | Theiß-Dialäkt (Tiszái nyelvjárások) |
| ISO-3166-2-Abchürzig | HU-JN |
Jász-Nagykun-Szolnok (Ussproch: ['jaːs,nɒɟkun,solnok] isch eins vo de 19 Komitat vo Ungarn. De Komitatssitz isch Szolnok.
Nochberkomitat sin Heves im Norde, Borsod-Abaúj-Zemplén i me chleine Deil vom Nordoste, Hajdú-Bihar und Békes im Oste, Csongrád im Süde, Bács-Kiskun im Südoste und Pest im Weste.
Geografy
S Komitat ghört zu de Große Ungarische Diefebeni, s Land isch drum zimlig flach. S Chlima isch zimli troche; d Sunne schynt überdurchschnittlig vyli Stunde pro Dag.
Di gröschte Flüss vo Jász-Nagykun-Szolnok sin d Theiß, d Zagyva und d Tápió. Usserdem litt de Theiß-See im Südoste vom Komitat.
Gschicht
S historische Komitat Jász-Nagykun-Szolnok, wo's vo 1876 bis 1950 ge hät, isch im hüttige Komitat sy diräkte Vorläufer. De Namme setzt sich zämme uss dem vom Jaße- (jász) und em Kyptschake-Volk (kunok), wo uff dem Gebiet gsydelt hän, und em Wort szolnok. S letschte chunnt wahrschints vo-n-re Figur uss de Gellért-Sage.
Im Johr 1950 sin au Deil vom historische Komitat Heves (hütt Komitat Heves) zu Jász-Nagykun-Szolnok cho. Dodezüe ghöre d Stadt Tiszafüred und ihri Umgebig.
Chleigebiet
| Chleigebiet | Verwaltigssitz | Gmeinde |
|---|---|---|
| Jászberény | Jászberény | 18 |
| Karcag | Karcag | 5 |
| Kunszentmárton | Kunszentmárton | 11 |
| Mezőtúr | Mezőtúr | 5 |
| Szolnok | Szolnok | 18 |
| Tiszafüred | Tiszafüred | 13 |
| Törökszentmiklós | Törökszentmiklós | 8 |
Wirtschaft
S troche, warm Chlima vo Jász-Nagykun-Szolnok wird vo de Landwirtschaft gnutzt. Hauptsächlig werre Weize, Rys, Mais und Sunneblüeme abaut. Au wird Rinder-, Schof- und Schwynsfleisch produziert.
Im Industrysektor sin Maschineindustry un d Läbesmittelverarbeitig am wichtigste.
Tourismus
Wichtigi Touristeattraktione stelle d Thermalbäder dar, wo in de Städt Szolnok, Tiszafüred, Abádszalók, Berekfürdő, Cserkeszőlő, Jászberény, Mezőtúr und Túrkeve z'finde sin. Underchünft sin hauptsächlig Campingplatz, wo d Touriste wäge ihrer Nöchi zu de Bäder aziehn.
