d Ilira Gashi z Berlin (2019)

D Ilira Gashi (albanischi Ussprooch: [iˈliɾa ˈgaʃi]; * 29. Oktober 1994 z Brienz) isch e kosovarisch-albanisch-schwyzerischi Sängeri uss Bärn. Dr Vater vo dr Ilira stammt ussem Kosovo, ihri Muetter uss Albanie, si sälber isch in de Schwyz ùff d Wält cho ùn ùffgwaggse. Si het d Schuel z Bärn bsuecht. S Singe het si sich autodidaktisch ùn spööter mit Gsangsstùnde aa de Musikschuel Köniz bybrocht. Jetz läbt d Sängeri z Berlin (Dütschland).

Im Joor 2010 het si mitem Lied „Shoku im i ngushte“ bi de 7. Ùfflag vùm albanische Gsangsfestival Top Fest mitgmacht. Im Novämber 2010 het si usserdäm am albanische Gsangswettbewärb Kënga Magjike z Tirana deilgnoo. Si isch mit em Lied „Tek“ aaträtte, het aber kei Pryys gwùnne[1].

2011 isch si zämme mit de Band The Colors im Wettbewerb zur Verträtig vo de Schwyz im Eurovision Song Contest 2011 mitem Lied „Home“ aaträtte. De Liedteggst isch ùff Albanisch ùn Bärndütsch, ùn handlet vo de Suech nooch de eigne Wùrzle ùn Heimet. Di andre Mitgliider vo de Band sin de Fabian Liechti aa de Gitarre, de Andreas Renggli am Piano, de Adrian Pasquinelli am Bass, d Annette Huber mit de Gyyge ùn de Manuel Pasquinelli am Schlagzüüg gsi. S Lied Home isch bis in s Finale cho, het es deno aber mit 13.05% vo de Stimme nùmme ùff de 3. Blatz gschafft. Verträteri vo de Schwyz isch d Anna Rossinelli mit „In Love For A While“ worde.

2011 isch si usserdäm wiider bim albanische Gsangswettbewärb Top Fest mitem Lied „Ëndërr“ ùffträtte.

Quelle

  1. ↑ www.eurovision-quotidien.com (Site cha nüme abgrüeft wärde; Suche im Webarchiv)
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.