Hubble-Weltruumteleskop, ufgnumme vu dr STS-82-Mission
Dialäkt: Markgräflerisch (Ebringe)

S' Hubble-Weltruumteleskop (oder Hubble Space Telescope, HST) isch e Weltruumteleskop fer sichtbares Liecht, Ultraviolett- un Infrarotstrahlig, wo d'Erde in öbbe 589 Kilometer Höchi innerhalb vu 96 Minüte eimol umchreist. S'HST isch am 24. April 1990 vum Space Shuttle Discovery uf dr Mission STS-31 im Ramme vu ere Zämmenarbit vu dr NASA un dr ESA usgsetzt worre. Es isch uf dr Astronom Edwin Hubble daift.

Dr Betriib vum e Teleskop im atmosphärlose Weltruum het grossi Vordeili, wil d'Filterwirkig vu ere Lufthülle uf bestimmti Wellelänge im elektromagnetische Spektrum, zum Bispil im Ultraviolett un im Infrarot, entfallt. Es trätte au keini Störige dur Luftbewegige uf (Szintillation), wo bi erdbundene Teleskope numme mit grossem Ufwand usgliche oder rusgrechnet werre chönne.

D'Bildqualität vum Hubble-Weltruumteleskop isch in dr erste Betribsjohre dur e Herstelligsfähler vum Hauptspiegel begrenzt gsi, wo - glücklicherwiis mathematisch exakt - falsch gschliffe worre isch.

Mer het dorum dr Fähler deilwiis rusrechne chänne. Anno 1993 het mer no im HST e "Brille" verpasst, s'sognennt "Corrective Optics Space Telescope Axial Replacement" (COSTAR) un dr Fähler demit korrigiert. Sitdem sin mit Hilf vum HST Bilder gmacht worre, wo oft e starchi Wirchig uf d'Öffetlichkeit hän, un wo zue Ergäbnisse mit grosser wisseschaftlicher Bedütig gfüehrt hän.

Gegewart un Zuechumft

D'Zuechumft vum Hubble-Teleskop isch ugwiss. Fer 2006 oder 2007 wär e Reparturflueg vume Space Shuttle notwendig, wo aber sit em Absturz vu dr Ruumfähri Columbia voerst abgsait isch. Space Shuttles müen sither im Fall vu ere verumöglichte Ruckchehr an dr Internationale Weltruumstation alege chänne, was aber ufgrund vu dr starch underschidlich gneigte Bahne bi eme Wartigsflueg zum HST nit möglich wär. D'Alternative wär e ubmannti Mission. Findet sälli au nit statt, müesst mer s'Teleskop irgendwenn um 2010 in dr Erdatmosphäre verglüehe lo.

In sällem Zämmehang isch dr am 25. Juni 2006 vermeldet Usfall vu dr Hauptkamera vum Teleskop z'sähe. D'NASA dementiert zwar jedwede Zämmehang mit dr fählende Wartig un behauptet, si hätt e Vilzahl vu Optione, doch hört sich säll ehe a wie s'Pfiffe im Wald.

Sichtbarkeit

D'Umlaufbahn vum Hubble-Weltruumteleskop um d'Erde isch numme wänig gege dr Äquator gneigt un demit vu Middeleuropa us nit z'beobachte. Die aktuell Position erlüteret d'NASA uf ere eigens defür igrichtete Internetsite.

Hubble-Noochfolger

S'Weltruumteleskop, wo 2013 d'Noochfolg vum Hubble-Weltruumteleskop aträtte sott, isch s' „James Webb Space Telescope“. Es isch e Gmeinschaftsprojekt vu dr NASA, dr ESA un dr kanadische Weltruumagentur

Dä Artikel basiert uff ere fräie Übersetzig vum Artikel „Hubble-Weltraumteleskop“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.