dr Hazy Osterwald 2. v. l.
Dr Hazy Osterwald (* 18. Februar 1922 als Rolf Erich Osterwalder z Bärn, † 26. Februar 2012 z Luzärn[1]) isch e Schwizer Musiker, Sänger und Orchesterläiter gsi. Zu sine bekanntiste Stück ghööre dr «Kriminal-Tango» und dr «Konjunktur-Cha-Cha»
Lääbe
Dr Osterwald isch dr Soon vom Fussballnazionaalschbiiler und Buechhalter Adolf Osterwalder gsi, wo eebefalls dr Spitznaame Hazy gha het. Vo 1940 aa isch er uf s Konservatorium und het bim Albert Moeschinger Komposizioon und Theorii gleert und näbebii Drombeete gschbiilt. 1940 het er für e Orchesterläiter Teddy Stauffer und anderi arrangschiert. 1941 het er in dr Bänd vom Fred Böhler Drumbeete gschbiilt. Bim Eddie Brunner isch er 1944 au no am Klavier gsi. Denn het er si äignigi achtchöpfigi Combo mit dr Sängere Kitty Ramon gründet und 1949 si Sextett, und het in däm Joor uf em Festival International 1949 de Jazz z Bariis gschbiilt, wo au dr Charlie Parker und dr Sidney Bechet ufdräte si.
Im Sextett si ersti Single, dr Kriminal-Tango, isch 1959 uusechoo und e Hit worde und isch 900'000 mal verchauft worde.
S Hazy Osterwald Sextett het vil im Färnseeä gschbiilt und isch bi de Olümpische Schbiil 1972 z Münche und 1976 z Innsbruck die offizielli Bänd gsi. Dr Osterwald het in de 1970er Joor si äignige Blatteverlaag und e baar Nachtklüb in dr Schwiz ghaa. Die het er denn müesse verchaufe, wo d Diskotheke bobuläär worde si. Er isch denn e Zit lang nüme ufdräte bis 1984, won er mit Hazy Osterwald and the Entertainers au as Vibrafonist ufdräte isch und wider mee Jazz het afo schbiile.
Briis und Uszäichnige
1974 het dr Osterwald dr Prix Walo überchoo, 2001 dä Ehren-Prix-Walo und am 27. Juni 2009 z Ascona dr Swiss Jazz Lifetime Achievement Award für si Läbenswärk.
Litratuur
- Hazy Osterwald: Kriminaltango. Die Geschichte meines Lebens. (mit Audio-CD), Scherz 1999, ISBN 3502185301.
- Walter Grieder: Die Hazy Osterwald Story, Schweizer Druck- und Verlagshaus, Zürich 1961
- Hazy Osterwald im Munzinger-Archiv (Artikelaafang frei abruefbar)
Weblingg
- Hazy Osterwald in de Internet Movie Database (änglisch)
- Die Hazy-Osterwald-Story in dr Internet Movie Database, alternativer Titel: «Musik ist Trumpf»
- All That Swiss Jazz, 2008 (Site cha nüme abgrüeft wärde; Suche im Webarchiv)
- Biografie
- Interview aalässlig zum Swiss Jazz Award
- Gabriela Schöb: Hazy Osterwald. In: Historisches Lexikon vo dr Schwiiz.
- Hazy Osterwald im Gsprööch mit Xecutives.net / Christian Düblin
- Hazy Osterwald Sextett – Kriminaltango (Site cha nüme abgrüeft wärde; Suche im Webarchiv) – Biografii uf de Website vom SWR
- Kriminaltango e legale Lingg zum legendääre Lied.