![](../I/Hans_Reinhard.jpg.webp)
Dr Hans vo Reinhard, au nume Hans Reinhard (* 20. Februar 1755 z Züri; † 23. Dezämber 1835 z Züri) isch e Schwizer Politiker zur Zit vo dr Helvetik, dr Mediation und dr Restauration gsi. Er het 1813 bi dr Dagsatzig presidiert wo dr neu Bundesverdrag usgarbeitet het.
Läbenslauf
Dr Hans Reinhard isch am 20. Februar 1755 z Züri uf d Wält cho. Si Vater, dr Johannes Reinhard, het zum Zürcher Patriziat ghört, isch im Chliine Root gsässe und Landvogt im Thurgau gsi. Si Mueter het Anna Elisabeth Greuter gheisse. Dr Hans isch am Institut vo Planta z Haldestei erzoge worde, het vo 1773 bis 1777 z Göttige studiert und denn e Grand Tour dur Europa gmacht. Denn het er en Usbildig an dr Zürcher Stadtskanzlei gmacht. 1783 het er d Martha, d Dochder vom ene Offizier in holländische Dienst ghürotet. Vo 1787 bis 1795 isch er dr Erst Stadtschriiber gsi. 1794 isch er in Chlii Root gwehlt worde. Im Johr druf het men en zum Landvogt vo dr Grofschaft Bade ernennt, wo 1798 vo dr revolutionäre Helvetische Regierig übernoh worden isch.
Dr Reinhard isch e Föderalist und gege dr Eiheitsstaat gsi und isch dorum 1799 z Basel as Geisle vom Diräktorium gestghalte worde. Wo d Föderaliste churz d Macht übernoh hai isch er 1801-1802 Regierigsstatthalter im Kanton Züri worde. As Kommunalpolitiker het er in de Johr 1798 bis 1803 verschiidnigi Böste z Züri gha, under anderem isch er 1800-1801 Munizipalpresidänt gsi. 1802 het en d Stadt Züri uf d Consulta uf Paris gschiggt.
Zwüsche 1803 und 1831 isch er eine vo de Bürgermeister vo Züri gsi, eis Johr dr erst, s Johr druf dr zweit. Und wil Züri e Vorort vo dr Eidgenosseschaft gsi isch, het er as Bürgermeister groosse Iifluss uf d Schwizer Politik gha. Zweimol isch er währed dr Mediation Landamma vo dr Schwiz gsi (1807 und 1813) und währed dr Restauration Dagsatzigspresidänt in de Johr 1814-15, 1816, 1822 und 1828. 1813 het er d Dagsatzig gleitet, wo d Mediationsakte annuliert het und am ene neue Bundesverdrahe het afo schaffe.
Dr Reinhard het d Schwiz e baar mol gegen Usse verdrätte: 1804 isch er an dr Chrönig vom Napoleon zum Kaiser z Paris gsi und er het 1814-1815 die eidgenössich Delegation am Wiener Kongräss gleitet. Ziitgnosse hai em vorgworfe, em Usland, sigs Frankriich oder spöter de Allierte, gegenüber z weich z si und z vil nochzgee.
Dr Hans vo Reinhard isch 23. Dezämber 1835 z Züri gstorbe.
Literatur
- Georg von Wyss: Reinhard, Hans von. In: Allgemeine Deutsche Biographie (ADB). Band 28, Duncker & Humblot, Leipzig 1889, S. 39–43.
- Martin Illi: Reinhard, Hans von. In: Neue Deutsche Biographie (NDB). Band 21, Duncker & Humblot, Berlin 2003, ISBN 3-428-11202-4, S. 354 f.
- Martin Suter: Reinhard, Hans von. In: Historisches Lexikon vo dr Schwiiz.