Das do isch en eukaryotischs Gen, wo Exons (vo ängl. expressed region, Regione uf em Gen, wo usbrägt wärde) und Introns (Regione uf em Gen, wo d Exons von enander drenne und nid usbrägt wärde) enthaltet. Im Hindergrund isch d DNA-Doppelstrange, wo zum e Chromosom kondensiert isch (in dr Wirkligkäit häi Exons und Introns mee Baasebäärli).
As Gen bezäichnet mä mäistens en Abschnitt uf dr DNS, wo d Grundinformazioone zur Härstellig von ere biologisch aktive RNA enthaltet. Bim Brozäss vo dr Dranskripzioon wird e komplementäri Kopii vom codogene Strangeabschnitt in dr Form von ere RNA härgstellt.
Es git verschiideni Arte vo RNA. Bi äim Däilvorgang vo dr Proteinbiosynthese, dr Translazioon, wird d Sekwänz vo de Aminosüürene vo de Protein vo dr mRNA abglääse. D Protein übernäme im Körper jedes sini spezifische Funkzioone, wo d Merkmol chönne usbrääge. Dr Aktiwidäätszuestand vom ene Gen und wie es sich usbrägt, cha in äinzelne Zälle verschiide reguliert wärde.
Allgemäin wärde Gen au as Erbaalaage oder Erbfaktore bezäichnet, wil si d Erbinformazioon in sich drääge, wo dur d Reprodukzioon an d Noochkomme witergee wird. Wie Gen ufbaut si, was iiri Funkzioon isch und wie si vererbt wärde, wird in dr Genetik erforscht. Dr ganze Erbinformazioon von ere Zälle säit mä Genom.
Litratuur
- Ernst Peter Fischer: Geschichte des Gens. Fischer, Frankfurt 2003, ISBN 3-596-15363-8
- Benjamin Lewin: Molekularbiologie der Gene. Spektrum Akademischer Verlag, Häidelbärg 2002, ISBN 3-8274-1349-4 (dütsch)
- Benjamin Lewin: Genes 8. Pearson Prentice Hall, London 2004, ISBN 0-13-143981-2 (änglisch)
- Inge Kronberg: Welche Gene machen den Menschen zum Menschen? In: Biologie in unserer Zeit. 34.2004,4, S. 206–207, ISSN 0045-205X
Weblingg
- vcell.de: Der lange Weg zum Gen: Meilensteine
- plato.stanford.edu: Gene Yytrag in dr Stanford Encyclopedia of Philosophy (änglisch, mit Literaturaagabe)
- Peter Godfrey-Smith, Kim Sterelny: „Biological Information“ in dr Stanford Encyclopedia of Philosophy (änglisch, mit Literaturaagabe). Pressemitteilung Universität Freiburg, 3. Septämber 2008
- Joachim Bauer: swr.de: Aus der Werkstatt der Evolution – Neue Erkenntnisse über die Gene. Vortrag in der SWR 2-Sendereihe Aula, 23. Novämber 2008 (Real Audio öbbe 30 Min. – Manuskript öbbe 6 Site)
- genecards.org: Human Gene Database (änglisch)
- Michael Stang: deutschlandfunk.de: Gehackte Gene. Deutschlandfunk, Wissenschaft im Brennpunkt, 3. Oktober 2014. Zum Datenschutz der „genetischen Privatsphäre“
 |
Dä Artikel basiert uff ere fräie Übersetzig vum Artikel „Gen“ vu de dütsche Wikipedia. E Liste vu de Autore un Versione isch do z finde. |