D Gabriela Hug-Glanzmann (* 22. Juni 1979 z Bade) isch e Schwyzer Eläktroinschenieeri. Si isch Brofässeri fir Informationstächnology un Eläktroinschenieerwääse an dr Aidgnessische Tächnische Hochschuel Züri.[1]

Lääbe un Wiirke

Vu 1986 bis 1988 isch d Gabriela Hug z Würlinge uf d Primarschuel gange un derno bis 1991 uf d Primarschuel z Söuze. Ab 1991 isch si uf d Kantonsschuel z Soledurn un het dert anne 1999 d Matura gmacht. 1996/1997 isch si im Rame vun eme Schueleruusdusch fir ai Johr an d Delano High School, Minnesota, USA. Vu 1999 bis 2004 het si an dr ETH Züri Informationstächnology un Eläktroinschenieerwääse studiert un derno ab 2004 as Wisseschaftligi Assischtanti an dr ETH am Power Systems Laboratory gschafft. Anne 2008 het si dert bim Göran Andersson iber Coordinated Power Flow Control to Enhance Steady-State Security in Power Systems promoviert.[2] Parallel zue dr Promotion het si Pedagoogik und Diadaktik an dr ETH studiert. Anne 2008 het si bim Unternäme Hydro One fir ai Johr as Assistant Network Management Engineer gschafft. Ab 2009 bis 2015 isch si Assistant Professor am College of Engineering vu dr Carnegie-Mellon University z Pittsburgh (USA) gsii.[3] Syter anne 2015 isch si Brofässeri am Power Systems Laboratory vu dr ETH Züri.

Fueßnote

  1. ↑ Ernennungen und Verabschiedungen des ETH-Rats vom 21./22.5.2014 (Memento vom 15. April 2018 im Internet Archive), abgruefen am 14. April 2018
  2. ↑ Dissertation online
  3. ↑ Carnegie-Mellon University: Gabriela Hug, Adjunct Faculty, ECE (Memento vom 11. Jänner 2018 im Internet Archive).
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.