Chindhait un Juged

Dr Götz George isch e Suhn vum Heinrich George, eme beriemte Film- un Theaterschausspiiler, un dr Berta Drews, wu au as Schauspiileri bekannt gsii isch. Dr Vater isch anne 1946 im Speziallager Nr. 7 Sachsenhausen gstorbe. Dr Götz George ich mit sym eltere Brueder Jan (* 1931) bi dr Mueter z Berlin ufgwachse. Är isch z Berlin-Lichterfelde uf d Berthold-Otto-Schuel gangen un am Lyceum Alpinum z Zuoz di Mittler Ryfi gmacht.

Schauspielkarriere

Sy Bihnedebüt het dr George anne 1950 am Berliner Hebbel-Theater gee im Stuck Mein Herz ist im Hochland vum William Saroyan, sy Filmdebüt 1953 an dr Syte vu dr Romy Schneider im Haimetfilm Wenn der weiße Flieder wieder blüht. Vu 1955 bis 1958 het er am Berliner UFA-Nowuchsstudio bi dr Else Bongers studiert. Sy erschti Hauptroll het er im DEFA-Film Alter Kahn und junge Liebe anne 1956 ghaa. Vu 1958 bis 1963 het er am Dytsche Theater z Göttingen unter em Heinz Hilpert gspiilt. Wyteri Engaschmänt het er am Kölner Schauspiilhuus ghaa un bi dr Salzburger Feschtspiil

Sy Durbruch as Filmschauspiiler het er anne 1959 mit Jacqueline ghaa. Eme braitere Publikum isch er bekannt wore mit Rolle in Karl-May-Film, unter anderem 1962 in Der Schatz im Silbersee.

Vu 1981 bis 1991 het er in dr Krimiserrie Tatort dr Kommissar Schimanski gspiilt un het dodermit sy greschte Erfolg bim Publikum ghaa, vu 1997 bis 2013 isch er in däre Roll au in ere aigene Serie ufdrätte.

Fir sy Darstellig vum Seriemerder Fritz Haarmann in Der Totmacher het er 1995 bi dr Filmfeschtspiil vu Venedig dr Darstellerbryys („Coppa Volpi“) iberchuu.

Privatlääbe

Dr George isch vu 1966 bis 1976 mit dr Schauspiileri Loni von Friedl ghyote gsii. Si hän zäme ne Dochter. Syt 1997 het er mit dr Hamburger Schurnalischti Marika Ullrich zämeglänt, syt 2014 sin si ghyrote gsii. Dr Götz George isch am 19. Juni 2016 gstorbe un isch im ängschte Familiekrais z Hamburg bygsetzt wore.

Kinofilm

Färnsehfilm un Serie