Göran Andersson
Dialäkt: Lozärntütsch

De Claes Göran Andersson (* 7. Juni 1951) esch en schwedische Professer ade ETH Züri, Schwiiz. Er esch en Profässer för elektrischi Energiesüschtem am Departemänt för Informationstechnologi und Elektrotechnik set 2000.

Läbe

De Göran Andersson hed em Johr 1975 en Masterabschloss in technischer Füüsik vode Universität Lund becho. Er hed denne ade gliche Uni doktoriärt und sini Diss[1] em Bereich mathematischi Füüsik im Johr 1980 abgschlosse. Noch sim Doktorat heder denne als Ingeniöör bede ASEA, höt bekannt als ABB, im Johr 1980 afo schaffe. Dete heder ide Gliichstrom-Abteilig gschaffet und esch Sektionsmänäger worde. Dete esch er denne bloobe bes 1986 und är hed vor allem dünamischi und Kontrollfroge im Bereich elektrischi Energiesüschtem agluegt, mit Konzäntration uf Hochspannigsgliichstrom. Noch sinnere Ziit bede ASEA esch er denne Profässer ade Königliche Hochschuel för Technology (KTH) en Stockholm worde. Dete hed er sech vor allem um Stabilität vo elektrischi Energiesüschtem kömmeret ond hed 14 PhD-Studänte gha. Im Johr 2000 esch er denne i d Schwiiz zoge. Sidhär esch er Profässer ade ETH Züri und Chef vom Inschtitut för elektrischi Energiesüschtem.

Forschig

Sini Forschig chan in drüü grossi Bereich iteilt wärde, natürlich alles im Gebiet elektrischi Energiesüschtem:

  1. Dünamischi Aspekt und Stüürig vo elektrischi Energiesüschtem: Är und sini PhD-Studänte hend d'Möglichkeit agluegt wiä spannigsgfüehrti Konverterstatione basierte Hochspannigsgliichstrom(VSC-HVDC) chan brucht wärde um d'Stabilität im Europäische Netz z'erhöche. Anderi wichtig Arbete send zu de Vor- und Nochteil vo Hochspannigsgliichstromnetzwerk gsi, au dete hed mer Netz vode Grössi vo Europa agluegt. En ganz wiichtige Aspäkt dete esch s'Kommuniziere. Zuekönftigi Netz wärded sicher mehreri Länder beinhalte und drom muemmer undersueche wie mer so es mehrländrigs Netz chan betriebe. Äbefalls esch Zämmearbet vo mehrere Überträgigsnetzbetriiber wichtig, well die nur sehr begränzt Date mit ehrene Nochbere ustuschid. Drom muemmer das au studiere und au das hed d'Groppe vom Göran Andersson gmacht, mit em Ziil d'Sicherheit im Gsamtsüschtem z'erhöche und z'definiere was mer muess för Date ustusche. Au es wichtigs Thema, wo velli PhD-Arbete agluegt hend, send stüürbari Laschte. Äm Profässer Andersson sini Groppe hed Methode und Werkzüüg entwickled, wos ermöglichet, dass thermischi Laschte chönd Regulierigs- und Usgliichsenergie offeriere. Dete drus heds denne au es Jungunternähme gäh: Adaptricity. Ä Schlüsselgrund, wieso stüürbari Laschte immer wichtiger wärdid, esch, well sie chönd d'Integration vo erneuerbare Enrgiie unterstütze. Är hed au es Aug in Bereich vode Simulatione mit Unsicherheit und Sicherheitsbedänke gwoorfe. Dete hed är stochastischi Programm mit Glücksrandbedingige studiärt. Näbe de physikalische Aspäkt hed är au no id Seibersicherheit inegluegt vode Stüürigssystem.
  2. Strommärt: S'Ziel vo sine Arbete i dem Beriich esch d'Entwicklig vo realistische Model för liiberalisierti Strommärt, vor allem natürlich die in Europa. En wechtige Aspäkt dete eschd Modellierig vode Energiepriise, wommer natürlich gärn möchti vorussäge. Die sogennanti stündlichi Priis-Vorhärsage-Kurve esch es wichtigs Wärkzüüg i dem Bereich, drom hed är au vell Ziit dem Bereich gwidmet. Ei Aasatz esch d'Kombination vo statistische und fundamentale Modäll. Die alti stündlichi Priis-Vorhärsage-Kurve hed mer nur chönne för ei Priisregion bruche. Är hed denne zäme mit sinere Groppe Modäll entwickled, wo mehreri Regione chönd iibezie, well sie Märtverbindige chönd beröcksichtige. En andere Aspäkt esch d'Bewärtig vo Pumpspeicherchraftwerk noch Marktbedingige. Nidlineari Technike send brucht worde, um besser säsobedingti Änderige z'berächne.
  3. Zuekönftigi Energiisüschtem: Äm Göran Andersson sini Groppe hed es Konzept för en Energiihöpp im Johr 2003 entwicklet. Das brucht mer uf de ganze Welt zum Forsche und Entwickle. De Energiihöpp esch d'Basis för vele Projekt über die zuekönftige Energiisüschtem, und s'Prinzip esch natürlich au wiiterentwickelt worde und apasst för neui Ufgabe. Zuedäm hed sini Groppe mehreri Studie gmacht zur Integration vo Elektroauto is elektrische Energiisüschtem. Zäme mit de Forscher för Maschinebou und Verchehrsplanig hed sini Groppe e Verchehrsmodällsimulation entwickled, wo alli Auto simuliert, wo dööre sie fahrid und wevell Energii sie bruchid, wie vell Saft sie no ide Batteri hend. Demet hed mir denne chönne bestimme, wenn es Auto chan uflade, ohni s'Stromnetz id Chnüü z'zwinge und gliich möglichst gönstig z'bliibe und bereit zum Abfahre sie, wenn's de Bsetzer vom Auto möcht. En andere Bereich über zuekönftigi Energiisüschtem esch d'Entwicklig vom zuekönftige Stromnetz, vor allem under de Berücksichtigung vo korrigiärender Stüürig, zum Biispil vo Hochspannigsgliichstromverbindige. Ersti Ergäbnis hend zeigt, das damet düütlich Gäld chan igspart wärde. Zuesätzlich hend de Göran Andersson und sini Groppe etlichi Sache zum Thema flexible Betrieb vo Stromnetz gmacht. Das esch vor allem wichtig, wemmer vell Solarzelle und Windenergii hed, wo jo produziered je nach Wätter. Es speziells Modäll deför esch de Leistigsnoud. Das Konzept esch zemli ähnlich zom Energiihöp.

Begleiteti Diss

  • Raffael La Fauci, "Cost-Based Design of an Electric Reserve Grid Focusing on Reliability," 2015
  • Marina González Vayá, "Optimizing the electricity demand of electric vehicles: creating value through flexibility," 2015
  • Markus Christian Imhof, "Voltage Source Converter Based HVDC - Modelling and Coordinated Control to Enhance Power System Stability," 2015
  • Hubert Abgottspon, "Hydro power planning: Multi-horizon modeling and its applications," 2015
  • Tobias Winfried Haring, "On Incentive-Based Ancillary Service Markets for Incorporation of Renewable Energy Sources and Demand Response," 2015
  • Emil Iggland, "Methods for the secure and economical operation of inter-connected electrical power systems," 2014
  • Christof Bucher, "Analysis and Simulation of Distribution Grids with Photovoltaics," 2014
  • Andreas Ulbig, "Operational Flexibility in Electric Power Systems," 2014

Lehr

De Profässer Andersson esch sehr aktiv gsi im Entwickle und Erneuere vo Vorläsige im Bereich elektrischi Energiisüschtem ade ETH Züri. Folgendi Vorläsige hed er persönlich dete ghalte:

  • Iiführig in elektrischi Energiisüschtem: Die Vorläsig esch in Zämearbet mitem Hochspannigslabor gsie und hed de Studänte en erste Iiblick is Energiisüschtem verschafft.
  • Energiisüschtemnetz Analüse: Die Vorläsig hed vorallem modellierig vode einzelne Komponente im Stromnetz zum Ziil. Es geht en iiführig zude Spannige und Flöss im Süschtem und zude dünamische Aspekt und de Stabilität im Energiisüschte.
  • Energiisüschtem Analüse: Die Vorläsig esch vell breite gfasst und get en Iblick und erchlärt Wärkzüüg zum Analüsiere vom Energiiverbruch, Energiiumwandlig und Energiiflöss. Umwältaspäkt sind natürlich gnauso wiä d'Wirtschaft es Thema, drom chömid au andere Dozente i dere Vorläsig zum Zug.
  • Dünamische Phänomen und Stüürig vo Energiisüschtem: S'Dünamische Verhalte vo elektrische Maschine, Netz, Laste und anders Süschtem send do erklärt. Au wie mer es Energiisüschtem chan stüüre und überwache. Au do esch en Experte vo osserhalb auno debie.

Uszeichnige

Är hed de IEEE PES Outstanding Power Educator Award (2007)[2] und de George Montefiore International Award (2010).[3] becho.

De Göran Andersson esch Mitglied vo de Royal Swedish Academy of Sciences (1994), Fellow vo de IEEE (1997), Mitglied vo de Schwiizer Akademi för Ingeniöör Wisseschafte (2015) und Mitglied vo de US National Academy of Engineering (2016).[4]

Quälle

  1. ↑ Diss vom C. Göran Andersson, Studies in the theory of rotational excitations in nuclei, Lund Universität, URL: http://libris.kb.se/bib/217890
  2. ↑ IEEE PES Award List
  3. ↑ Electrical Engineers Association of the Montefiore Institute Archivlink (Memento vom 24. Februar 2016 im Internet Archive)
  4. ↑ Mäldig vom Departmänt D-ITET
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.