dr François Couchepin (1998)

Dr François Couchepin (* 19. Jänner 1935 z Martigny; haimetberäächtigt z Martigny; † 23. Februar 2023[1]) isch e Schwyzer Jurischt un Bolitiker (FDP) gsii. Ä isch vu 1991 bis 1999 Bundeskanzler gsii.

Biografy

Dr Suhn vum Bundesriichter Louis Couchepin un Kusäng vum Bundesroot Pascal Couchepin het no dr Matura 1954 Räächt an dr Uniawersiteet Lausanne studiert. Anne 1957 het er mit em Lizänziaat abgschlosse, zwai Johr speeter het er im Kanton Wallis d Batänt as Räächtsaawalt un Notaar iiberchuu. Vu 1964 bis 1980 het er e aigeni Aawaltspraxis z Martigny gfiert. Anne 1965 isch dr in Grooße Root vum Kanton Wallis gwehlt woorte un hte däm bis 1980 aagheert, e baar Johr dervu as Bresidänt vu dr freisinnige Frakzioon. Anne 1975 het er ohni Erfolg bi dr Ständerootswahle kandidiert. Derzue isch er stellverdrättende Sekreteer vu dr Schwyzer Verainigung fir dr Root vu dr Gmaine un Regioone vu Europa gsii.

dr Couchepin bi syre Veraidigung (1991)

Anne 1980 isch dr Couchepin in d Bundeskanzlei yydrätte, as Schef vu dr franzeesische Abdailig vu dr zentraale Sproochdienscht. Im Johr druf het en dr Bundesroot zum Viizekanzler ernännt. Vu Amts wääge het er dodermit em Staab vu dr Gsamtverdaidigung aagheert. Derzue het er d Aarbetsgruppe zur Revisioon vum Bundesgsetz iber di bolitische Räächt aagheert un isch 1990 im Zämehang mit em Ufschaffe vum Fichenskandal interimistisch as Sunderbeufdraite fir Staatsschutzakte yygsetzt woore. Wu dr Bundeskanzler Walter Buser 1991 sy Ruggdritt aagchindet het, het s vier offiziälli Kandidate fir sällem sy Noofolg gee. Näb em Couchepin sin des dr Achille Casanova (CVP), dr Max Friedli (SVP) un dr Kurt Nuspliger (SP) gsii. Dr Couchepin isch schließli im segste Wahlgang vu dr Bundesversammlig gwehlt wore.

In dr Amtszyt vum Couchepin het s verschiideni organisatoorischi Änderige gee. Dr Aidgnessisch Daateschutzbeufdraite isch dr Bundeskanzlei zuegoornett woore, im Geegezuug isch di Aidgnessisch Drucksache- un Matriaalzäntraale em Bundesamt fir Böute un Logischtik im Finanzdepartemänt unterstellt woore. Dr Couchepin het d Informatisierig vu dr Bundesverwaltig glaitet, wu au dr Ufböu vu Daatebanke un Website derzue gheert het. Im Rame vu dr Friidessicherig im Balkan het d Bundeskanzlei ab 1996 no dr Wahle z Bosnie un Herzegowina un im Kosovo gluegt. Mit em Pänsioonsalter isch dr Couchepin per Ändi 1999 zruggdrätte.

No syre Pänsionierig het er z Lausanne gläbt.[1] Är isch ghyroote gsii mit dr Psychomotoriktherapeuti Anne-Marie Cottier.

Literatur

  • Michel Klaus (éd.), Quelle chance pour nos institutions? : mélanges offerts à Monsieur François Couchepin, Chancelier de la Confédération à l'occasion de son 60e anniversaire le 19 janvier 1995 = Festschrift für Herrn Bundeskanzler François Couchepin zum 60. Geburtstag am 19. Januar 1995, Schönbühl-Urtenen: M. Klaus 1995
  • Ignace Carruzzo: François Couchepin. In: Historisches Lexikon vo dr Schwiiz.
 Commons: François Couchepin – Sammlig vo Multimediadateie

Fueßnote

  1. 1 2 Ehemaliger Bundeskanzler François Couchepin gestorben. In: watson.ch. 24. Februar 2023, abgruefen am 24. Februar 2023.


Dä Artikel basiert uff ere fräie Übersetzig vu dere Version vum Artikel „François_Couchepin“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.