| Dialäkt: Baseldütsch |
Dr Emanuel Büchel (* 18. August 1705 z Baasel; † 24. Septämber 1775 z Baasel) isch e Schwizer Beck, Zäichner, Topograaf und Akwarellist gsi und het vor allem d Botanik und d Aasichde vo sinere Häimetgegend Baasel zäichnet.
Im Büchel si Wärk isch vo unschetzbarem Wärt für unseri Kenntniss vo dr Botanik in dr Gegend vo Baasel und sini vile Zäichnige, wo zwüsche 1735 und 1775 entstande si und lääbig und im Detäi d Stadt Baasel und iiri Umgääbig zäige. D Chupferstich, wo noch de Zäichnige gmacht worde si, fasziniere au hüte no und zäige, wie die alti Stadt und d Baasler Landschaft usgsee häi. Mä darf scho dängge, ass dr Büchel äine vo de bedütendste Künstler isch, wo die Stadt fürebrocht het.
Dr Emanuel Büchel isch e Illustrator gsi, wo bi dr Stadtregierig gfrogt gsi isch. 1770 het er dr Ufdraag überchoo, dr Dootedanz, wo denn 1805 abbroche worde isch, z kopiere und uf Babbiir ufzzäichne. Er het au Zäichnige gmacht vo dr Ruine vom spootrömische Wachdurm in dr Hard z Muttez, wo 1751 widerentdeggt worde isch.
Im Baasler Dalbekwardier git s e Strooss, wo si Naame überchoo het, und en anderi isch in dr Baaselbieter Gmäind Brattele.
Weblingg
- Tapan Bhattacharya: Büchel, Emanuel. In: Historisches Lexikon vo dr Schwiiz.
- Yvonne Boerlin-Brodbeck: Büchel, Emanuel. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).
- Blään vom Emanuel Büchel im Staatsarchiv Basel-Landschaft