Dialäkt: Mìlhüüserisch
Dr Dudley G. Wooten ànna 1900.

Dr Dudley Goodall Wooten (* 19. Jüüni 1860 bii Springfield, Missouri; † 7. Hornung 1929 z’ Austin, Texàs) ìsch a àmerikànischer Jurischt un Politiker gsìì. Vu 1901 bis 1903 hàt’r dr Bundesschtààt Texàs ìm Represantàntahüüs vu da Verainigta Schtààta vertratta.

sii Laawa un Kàrriar

Dr Dudley Goodall Wooten ìsch ànna 1860 bii Springfield ìm Süüda vum Bundesschtààt Missouri-n-uff d’ Walt kumma. Ar ìsch dr Suhn gsìì vu dr Henrietta geboorena Goodall un vum Thomas Dudley Wooten. Ìn siinera Kìnderjoohra, wahrem Bìrgerkriag, hàt’r mìt siina Äältra ìns Texàs gwàndelt. Ar ìsch ìn d’ äffentliga Schüala ìn dr texànischa Schtàdt Paris gànga. Gschtudiart hàt’r bis 1875 àm Princeton College, un doo druff àn dr Johns-Hopkins-Üniwärsitäät z’ Baltimore. Drnooh hàt’r Racht àn dr Üniwärsitäät vum Virginia z’ Charlottesville gschtudiart un ìsch ànna 1880 àls Rachtsànwàlt züagloo worra. Àls Ànwàlt hàt’r z’äärscht z’ Austin ìm Texàs gschàfft. Vu 1884 bis 1888 ìsch’r doo Schtààtsànwàlt gsìì. Àb 1888 hàt’r z’ Dallas gschàfft. Ìn da Joohra 1890 bis 1892 ìsch’r doo Bezirksrìchter gsìì. Gliichzittlig hàt’r siina politischa Kàrriar ààgfànga, àls Mìtglìed vu dr Demokrààtischa Pàrtäi. Drzüa ìsch’r ànna 1897 Uffsàtzlaiter vu dr Zittschrìft Texas Magazine gsìì. Gschrìewa hàt’r àui fìr d’ Zittschrìfta Scribner’s Monthly un Century. Züadam hàt’r a vollschtandiga Gschìcht vum Texàs verfàsst, wo ànna 1898 veräffentligt worra-n-ìsch. Ìm gliicha Joohr ìsch dr Wooten Vorsìtzend’r vum Texas State Historical Association worra.

Vu 1898 bis 1899 ìsch dr Wooten Àbgoordnet’r ìm Represantàntahüüs vum Texàs gsìì. Ànna 1900 ìsch’r Mìtglìed ìm Voschtànd vu dr Nàzionààla Schtààtsbìrgerliga Federàzioon gsìì; ànna 1901 ìsch’r Delegiart’r uff dr Nàzionààla Schtiirkumferanz z’ Buffalo gsìì. Schuu-n-ìm Joohr 1898 hàt’r àn’ra nàzionààla kàrtällfaindliga Kumferànz z’ Chicago mìtgmàcht.[1][2] Noh-n-em Tood vum Àbgoordnet Robert E. Burke ìsch dr Wooten àn dr Nàchwàl ìm säckschta Wàhlbezirk vum Texàs ìns àmerikànischa Represantàntahüüs gwählt worra. Ìm Represantàntahüüs z’ Washington, D.C.-n-ìsch’r àb’m 13. Jüüli 1901 gsìì. Ànna 1902 hàt’r àls Àbgoorndet ìns Alaska graist, fìr a Schtudia-n-ìwwer d’ Bedìrfnissa vu dam Territorium màcha.[3] Dàsjoohr hàt ìhn siina Pàrtäi nìt fìr a Wìederwàhl nominiart; ar hàt àlso àm 3. März 1903 dr Kongrass müassa fàraloo.

Noh-n-em And vu siinera Zitt ìm Represantàntahüüs hàt dr Wooten uff Seattle ìm Bundesschtààt Washington gwàndelt, wu-n-’r witter Ànwàlt gsìì-n-ìsch. Ìn siinera näija Haimet ìsch’r àui mehrfàch Rìchter àm Owergrìcht gsìì. Ànna 1912 hàt’r àm Nàzionààla Kongrass fìr d’ Flìss un Haafa mìtgmàcht; ìm Joohr druff ìsch’r Delegiart’r uff’ra Umwaltkumferanz gsìì (em „National Conservation Congress“). Ànna 1919 ìsch dr Wooten Mìtglìed ìm Üüssschuss fìr d’ Fäschtleegung vu da Schtudialeehrplaan ìn siim Schtààt gsìì. Zwìscha 1924 un 1928 hàt’r juristischa Vorlaasunga àn dr Üniwärsitäät vu Notre Dame ìm Indiana ghàlta. Ar ìsch wahrend’ma Besüach z’ Austin àm 7. Hornung 1929 gschtoorwa. Beardigt worra-n-ìsch’r bii siinera Ehafràui uff’m Calvary-Frìedhoof z’ Seattle.

Ànna 1883 hàt dr Dudley Wooten d’ Ella R. Carter ghiiroota ghàà. Zamma hann sa zwai Kìnder ghàà. Wu d’ Ehafràui ànna 1886 gschtoorwa-n-ìsch, hàt sìch dr Wooten wìeder verhiirootet. Dr Wooten ìsch Taifer gsìì. Ar ìsch àui Mìtglìed gsìì ìn dr Briaderschàft Phi Kappa Psi.

d’ Biacher, wo-n-’r gschrìewa hàt

  • A noble Ursuline: Mother Mary Amadeus. The Paulist Press, 1920 (amerikanisches Englisch).
  • A Comprehensive History of Texas: 1685–1845 : 1845–1897 (= The Fred H. and Ella Mae Moore Texas history reprint series). Texas State Historical Association, 1987, ISBN 978-0-87611-082-9 (amerikanisches Englisch, Erstausgabe: 1898).
  • A Complete History of Texas for Schools, Colleges and General Use. General Books LLC, 2010, ISBN 978-1-153-36840-7 (amerikanisches Englisch, Erstausgabe: 1899).

Lìteràtüür

  • Wooten, Dudley Goodall. In: The Handbook of Texas Online. Texas State Historical Association, 1952 (amerikanisches Englisch, tshaonline.org [abgerufen am 30. Mai 2022]).
  • Wooten, Dudley Goodall (1860-1929). In: The Political Graveyard: Index to Politicians. (englisch, politicalgraveyard.com [abgerufen am 30. Mai 2022]).

Weblìnks

Ainzelnoohwiisa

  1. ↑ For and Against Trusts. In: The Weekly Argus News. 16. September 1899 (amerikanisches Englisch).
  2. ↑ Franklin Harvey Head (Hrsg.): Speeches, Debates, Resolutions, List of the Delegates, Committees, Etc., Held September 13th, 14th, 15th, 16th, 1899. General Books LLC, 2010, ISBN 978-1-150-89965-2, S. 42–64 (englisch).
  3. ↑ Congressman from Texas. In: The Yukon Sun. 31. Juli 1902 (amerikanisches Englisch).






Dä Artikel basiert uff ere fräie Übersetzig vu dere Version vum Artikel „Dudley_G._Wooten“ vu de dütsche Wikipedia. E Liste vu de Autore un Versione isch do z finde.
Dä Artikel basiert uff ere fräie Übersetzig vu dere Version vum Artikel „Dudley_G._Wooten“ vu de änglische Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.