Experimentelle Prototüp von ere 17,5 mm Dampfkanone vom Russische Riich um 1826-29

Holman Projector Prototüp (britischi Luftabwehrdampfkanone) vo 1940

D Dampfkanone isch en Artilleriigschütz, wo in dr Antike vom Archimedes erfunde worde isch. Si het im Wääsentlige us ere graade Rööre us Chupfer, wo an äim Ändi zuegmacht gsi isch. Mä het zerst e chli Wasser in d Kanone gschüttet und denn en acht Kilo schweeri Chuugele, wo ganz genau in d Rööre basst het, dri doo. Under em zuenige Ändi het me denn e Füür gmacht, so dass s Wasser uf äi Chlapf zu Dampf worde isch und dr Druck d Chuugele us dr Rööre driibe het. Dr Leonardo da Vinci het usgrächnet, ass son e Kanoone 1250 m wit chönn schiesse.

Öb mä das Gschütz vom Archimedes au braktisch umgsetzt het, wäiss mä nid. Mit modärne Noochbaute het mä aber bewiise, ass son e Dampfkanone cha funkzioniere. Dr Archimedes het also wenigstens in dr Theorii dr Wasserdampf technisch chönne usnütze.

Spööter het mä do und dört s Konzept vom ene Dampfgschütz wider ufgriffe. Im Russische Riich het mä um 1826-28 und in Groossbritannie im Zwäite Wältchrieg (Holman Projector) experimentelli Prototüpe baut, aber dr milidäärisch Nutze von ene isch seer chlii gsi.

Litratuur

Sigvard Strandh: Die Maschine; Geschichte, Elemente, Funktion. (Site 28) ISBN 3-451-18873-2

Weblingg

 Commons: Dampfkanonen – Sammlig vo Multimediadateie