DVD (Digital Video Disc oder später au Digital Versatile Disc) heisst mä äs Spiichermedium, wo mä alli Arte vo Dateie druf cha spiichere. D DVD isch wie d CD än optische Datespiicher, het die gliichi physischi Grössi und gseht ähnlig us, het aber ä Vilfachs an Spiicherkapazitet.
Format
Es git verschiideni Arte vo DVD. Mä unterscheidet DVD wo kommerziell beschriibe produziert und vertriibe wärde und wo dr Benutzer im allgemeine nume cha läse. Do derzue ghöre d DVD-Video, d DVD-Audio, d DVD-ROM und d Hybrid-DVD.
DVD-Format, wo vom Konsument chönne ei Mol beschriibbe wärde, si d DVD−R, d DVD+R, d DVD−R DL, d DVD+R DL. DVD mit dr Bezeichnig DL (churz für Dual Layer) hai zwai Dateschichte, das heisst si chönne öbbe dopplet soviil Date spiichere wie gwöhnligi DVD.
D DVD-RAM, d DVD−RW und d DVD+RW chönne meh as ei Mol beschriibe wärde. Si si au weniger empfindlig gege Liecht und UV-Strahle as d DVD+R und d DVD-R Medie. Die besti Datespiicherig bechunnt mä mit dr DVD-RAM über, wo dank dr Sektorierig und em Defäktmanagement d Date am sicherste spiicheret und au öbbe hunderduusigmol cha neu beschriibe wärde, hundert Mol meh as gwöhnlige RW (rewrite) Medie.
Gebruuch
Dateie
Wil DVD's 4,7 GB oder au 8,7 GB Spicherplatz hei, bruches vieu Persone z. B. privat zum Date sichere. Au wen mä grossi Dateie wot brönne wo ufne CD nid möge, si DVD äs guets Medium.
Film / Video
DVD's wärde brucht, um Filme druf z brönne. Mi redet hüt zu Tag eigenlich nüm vo "ä Film chaufe" sondern eher vo "ä DVD chaufe". D DVD het d Videokassete aus Standard Filmmedium abglöst.
Games / Videospiil
DVD wärde hüt au brucht, um Spiil für Konsole und PC druf z brönne. Hüt zu tags si die Spiili so ufwendig gmacht, das e eifachi CD nümme längt um aues drufzpacke. DVD's chame au direkt fürs Game kaufä und benützä.
Software
Aktuelli Software, wo immer umfangriicher wird, wird hüt au scho uf DVDs usgliferet, wil CDs eifach zweni Platz biete.
