2007

2007 bi dr Wältmaischterschafte z Ōsaka

Bis vor dr Saison 2007 het d Obergföll as formuubständig un ihre komplizierte Wurfschtil as gsundhaitli problematisch gulte. Derwylscht si in vyl Wettkämpf nume gringi Wytene gschafft het, hat ai glunge Wurf eso wyt chenne fliege, ass er dytli iber dr Megligkait vu andere Wärferne glägen isch. Konkerräntine wie d Steffi Nerius hän wäg däm ihri Form, wu si nit hän chenne uusrächne, gferchtet. Bim Saisonstart 2007 z Halle het si aber zaigt, ass si an ihre Tächnik zimli gschafft ghaa het. Mit dr zur däm Zytpunkt zwootbeschte Laischtig vu ihre Laufbahn het d Obergföll mit 68,08 m dr Wettbewärb dytli vor dr Nerius gwunne, wu as Zwooti 64,74 m gschafft het. Dodermit het d Obergföll scho im erschte Wettkampf vum Johr 2007 di vun ere sälbscht gworfe Johreswältbeschtlaischtig vu 2006 vu 66,91 m iberdroffe. Au bi dr andere Wettkämpf z Kassel un z Cottbus het d Obergföll vor dr Nerius gsiigt, un am 23. Juni het si bim Lychtathletik-Europacup z Minche ihre aigene Europarekord uf 70,20 m verbesseret. Zum erschte Mol in ihre Karriere het d Obergföll bi dr Dytsche Maischterschafte 2007 z Erfurt dr Titel gwunne mit ere Wyti vu 66,59 m. Bi dt Wältmaischterschafte 2007 z Ōsaka het si glych wie im Vorjohr Silber gwunne.

2008

Im Olympiajohr 2008 het si ihre Titel am 5. Juli 2008 bi dr Dytsche Maischterschafte z Nürnberg verdaidigt. Mit 62,18 m het si im letschte Versuech vor dr Nerius gwunne, wu bis zue däm Zytpunkt gfiert het un mit 61,91 m uf dr zweet Blatz chuu isch Ihri Beschtlaischtig anne 2008 lyt bi 69,81 m. Die Wyti het si am 31. Augschte 2008 bim DKB-Cup-Finale z Elstal gworfe.^[2] Bis dert het si ne Saisonbeschtlaischtig vu 67,72 m vum Grand-Prix-Meeting z Ostrava ghaa. Do het si s ainzig Mol gege di aktuäll Wältmaischteri Barbora Špotáková vu Tschechie gwunne, wu b däm Wettkampf mit 66,91 m Zwooti woren isch.

Bi dr Olympische Spiil 2008 het si mit 66,13 m di drittbescht Wyti gworfe. Vor ihre sin d Barbora Špotáková, wu mit 71,42 m d Goldmedallie gwunne het un dodermit e neie Europarekord ufgstellt het, un d Marija Abakumowa vu Russland gläge, wu au wyter gworfe het wie dr bishärig Europarekord vu dr Obergföll. No dr noodreeglige Disqualifikation vu dr Abakumowa wäge Doping dur s IOC am 13. Septämber 2016 isch dr Obergföll d Silbermedallie zuegsproche wore. D Viertblatziert vu 2008, d Briti Goldie Sayers, het dodermit d Bronzemedallie iberchuu.

2009

Im Wältmaischterschaftsjohr 2009 het d Christina Obergföll bi ihrem erschte Wettkampf z Halle ne seli guete Start verwitscht. Si het mit 68,40 m gwunne, d Wältjohresbeschtlaischtig. No nie in ihre Karriere isch si eso guet in e Saison chuu. Bis zue ihrem dritte Wettkampf, am 5. Juni z Baunatal, het die Wältjohresbeschtlaischtig allno Bstand ghaa. Au dr Wettkampf z Baunatal het si mit 67,48 m gwunne. Bi dr Haim-Wältmaischterschafte z Berlin isch si mit 64,34 m uf dr fimft Blatz chuu un isch dodermit hinter dr Erwartige zrugblibe.

2010

2010 bim ISTAF Berlin

2010 het d Obergföll bi dr Europamaischterschafte z Barcelona hinter ihre Verainskameradi Linda Stahl d Silbermedallie gwunne.^[3] Derzue het si z Elstal mit 68,63 m dr drittwytscht Wurf vum Johr un dr fimftwytscht Wurf vu ihre gsamte Karriere ghaa.

2011

D Saison 2011 isch fir d Obergföll aafangs zimli guet verlofe, si het vier Diamond-League-Meeting gwunne un si mit ihrem vierte Siig z London dr vorzytig Gsamtsiig gsicheret. Derzue het si in fimf Wettkämpf iber 65 Meter gworfe. Dr wytscht Wurf isch ere bi dr Dytsche Maischterschafte z Kassel mit 68,86 m glunge, des isch ihre viertbescht je gworfe Wurf gsii un het ere ihre dritt national Titel un e Maischterschaftsrekord brocht. Ihre große Draum vun ere Goldmedallie bi dr Wältmaischterschafte z Daegu (Sidkorea) isch nit in Erfillig gange, mit 65,24 m isch si nume uf dr viert Blatz chuu.

2012

D Obergföll het jetz mit em Sportpsicholog Hans Eberspächer zämegschafft.^[4] Bi dr Europamaischterschafte isch si mit 65,12 m Vizeeuropamaischteri wore,^[5] churzi Zyt, nodäm si z Wattenscheid mit 65,86 m scho zum vierte Mol Dytschi Maischteri woren un aafangs Monet bim Wärfer-Meeting z St. Wendel scho uf 67,04 m chuu isch.^[6] Bi dr Olympische Spiil z London het si mit 65,16 m scho zum fimfte Mol e intenationali Silbermedalie gwunne, hinter dr aktuälle Weltrekordleri, dr ehmolige Wältmaischteri 2007 un jetz zwaimolige Olympiasiigeri Barbora Špotáková.

2013

Ab Mai isch d Obergföll bi allne Diamond-League-Meeting derby gsii, wu Speerwurf uusdrait wird. Mit Siig z Eugene, z New York un z Rom isch si schnäll an dr Spitz vum Diamond Race Ranking chuu. Au bim negschte Meeting z Paris am 6. Juli het si gwunne. Bi dr dytsche Maischterschafte ai Dag speter het si si dr Linda Stahl mieße gschlaa gee. Mit 61,74 m isch si wyt hinter ihre sunschtige Saisonlaischtige blibe. Mit ihrem fimfte Diamond-League-Siig in Folg bi dr Anniversary Games z London isch si am 17. Juli vorzytig as Siigeri vu dr Gsamtwärtig feschtgstande.

Dr grescht Erfolg vu ihre Karriere het d Obergföll bi dr Wältmaischterschafte z Moskau ghaa, wu si mit ere Wyti vu 69,05 m d Goldmedallie gwunne het.

2014/2015

Wäg ihre Schwangerschaft un dr Geburt vu ihrem Suhn het si ne Wettkampfpaus gmacht. Im Mai 2015 isch si in Sport retuurchuu.^[7] Bi dr Wältmaischterschafte z Peking isch si bim Siig vu dr Katharina Molitor mit 64,61 m Vierti wore.

2016

Noch em russische Doping-Skandal het si d Obergföll im Mai 2016 fir e Speeri vu Russland bi dr Olympische Spiil z Rio de Janeiro uusgsproche.^[8] Drotz ass si bi dr Europamaischterschafte as DM-Vierti nit derfer derby syy, isch d Obergföll fir di Olympische Spiil as aini vu drei dytsche Starterne nominiert wore statt dr Katharina Molitor, wu derno versuecht het ihri Nominierig mit ere Verfiegig vum Gricht durezsetze.^[9][10] Bi dr Spiil isch si as beschti Dytschi mit 62,92 m uf dr acht Blatz chuu. Mit eme Siig bim ISTAF Berlin het si am 3. Septämber 2016 ihre Karriere en Änd gmacht.^[11]