Di chinesischi Astrologie (chin. 占星術 / 占星朮, zhānxīngshù „Chunst vom Sternwahrsage“) gaht nach ere überlifereti Legend uf dr „Gäli Chaiser“ Huangdi (2698 bis 2599 v. Chr.) zrück.

Ileitig

Für sis chinesische Horoskop chönne ds bestimme, längt nid eifach ds chönne bestimme: I welem Johr bini gebore. Äs git ganzgenau 5 Pfade zum erhabene Verstoh, sprich zum perfekte chinesische Horoskop. Überau uf dr Wäut berächnet me ds Geburtshoroskop nach dr Steuig vode Planete im Ougeblick vor Geburt und wenme ä Vorussag fürd Zuekunft wünscht, so basiert sie houptsächlech uf dr momentane Konstelation vode Planete. Ds Hangwärkzüg vomene westliche Astrolog isch woubekannt: Äs si d Zeiche vom Tierkreis, d Hüsli, oder Fäuder, d Planete und ihri sogenannti Aspekte. Äs isch ferner bekannt, dass ersch ds Zämmewürke vode verschidene astrologische Faktore zumene Gsamtbiud vor Persönlechkeit füehre cha. Dr bekanntist Faktor isch ds Sunnezeiche, d. h. jene Abschnitt vom Tierkreis, i däm sich d Sunne im Ougeblick vor Geburt befunge het. Listme die tägleche oder wüchentliche Horoskop i Zititge und Zitschrifte, so chönntme zum Schluss cho, dass mitem Sunnezeiche scho aues im Bezug uf Persönlechkeit und Zuekunft erfasst isch. In Würklechkeit beziehts sich jedoch numme ufene Teu vom Charakter, äs git dr Grundton a und biudet die grobgfasste Gränze, innerhaub vo dene meh ersch zu gnauere Definitione cho cha. Dr Mond und sini Steuig im Ougeblick vor Geburt isch genauso wichtig. Us dene Date gits aus dritts dr Aszendänte, ds Stärnzeiche, wo bir Geburt am östleche Horizont ufgange isch. Dr Aszendänt seit am Astrologe aues über ds üssere Erschinigbiud, auso über jeni Site vomene Mönsch, wo är ar Umwäut zeigt, wo sich aber nid unbedingt mit sine innerste Gedanke und Zile decke muess. D Chinese hei äbe äbeso zaurichi Müglichkeite, ds Gheimnis vom Charakter und Zuekunft ds enthüeue. Abgseh vor Astrologie entwicklete sie höchst komplizierti - und nach üsem Gfüeu rächt frogwürdigi - Methodene vor Weissägig. Die äutiste und mysteriösischte si d Oraku gsi, bi dene d Zuekunft us Chnochene gläse worde si. Mi het meistens d Schueuterblätter vo Ochse oder Hirsche brucht, mängisch ou Schiudchroteschalene, wo erhitzt worde si, bis sie Risse übercho hei. Usem Muster vode Sprüng weissägte d Chinese, ob ihne ä gueti oder ä schlächti Ärnte bevorgstange isch. Bimene angere System isches drum gange, churzi oder längi Strohhaume ds zieh, was gwüssi Ähnlichkeite mitem I-Ging-Oraku bsitzt, i däm meh entweder drü Münze wärfe oder Schofgarbe-Stäbli uszeue muess. Dr Astrologie scho verwandt gsi isch äs System vo glückleche oder unglückleche Tage, wo mitde Mondphasene zämmeghange isch. Äs toucht bis zum usbruch vor kommunistische Revolution i aune Buurekaländer uf. Denn hets no thui-ming gäh, ä Schicksausberächnig, wo genauso kunstvou wie d Astrologie düregfüehrt worde isch und überraschend zueverlässigi Ergäbnisse gliferet het. D Lösig vomene bestimmte Problem ergit sich usere Glichig, bi dere meh die beträffende Tagesstunge mitde Schlüssuzahle für Tag, Monat und Johr gaddiert het. Was itz die chinesischi Astrologie betrifft, so basiert sie bi ihrne Vorussägige ufem Mond, sire Entfährnig vom Horizont und ar Konstellation zue Planete und Stärne, färner ufd Sunne, ihri Position und Farb, sowie ufde Planete, bsungers ufdr Stung, zue dere sie übere Horizont stige und i Konstellatione zunenagn träte. Schi-tschi het vor 2000 Johr gschribe: "Wen Merkur zäme mit Venus im Oste erschine und wen beidi rot und vo Strahle umgäh si, de wärde frömdi Königrich vernichtet wärde und die chinesische Chrieger wärde siegrich si." Oder ä angeri Berächnig: "Wen Mars uf Venus fougt, wärde Soudate verstört und muetlos si. Wen Mars sich ganz und gar vor Venus trennt, wärde sich d Chrieger zrüggzieh.

Dr erst Pfad: Ds Geburtsjohr

Wenme vor garnid langer Zit in Peking ä Rikscha-Fahrer nach sim Auter gfrogt hät, so wäri d Antwort gsi, är sig ä Hung oder ä Ratte oder ä Güggu. Das, was villech nachere unverschämte Replik ufene rächt ufdringlechi Frog usgseh hät, wär in Würklichkeit numme ä ganz sachlechi Uskunft gsi. Bis 1949, auso bis zur kommunistische Revolution, hei d Chinese jedes Johr mitem Name vom Tier bennetn. Dohär isches füre eifach Maa witus intressanter gsi, ds erfahre, dass öpper Has gsi isch, aus wenme ihm 1939 aus Geburtsjohr agäh hät. De jedem Johr si bestimmti Eigeschafte zugsproche worde, wo sich uf aui Ereigniss, ischliesslich dr Geburte, uswürke und mitem Tier zämmeghange si, dessä astrologischem Ifluss ds Johr ungersteut gsi isch. D Sitte, jedes Johr amene angere Tier zuedsordne, het öppe im 6. Johrhundert v. Chr. agfange und isch sithär i unungerbrochener Foug fortgsetzt worde. Isgesamt gits äs dutzend Tier, so dass sich dr Zyklus nach jedem zwöufte Johr widerhout. Nach dr Theorie besitzt jede, wo i eim vo dene Joh gebore worde isch, ganz bestimmti Eigeschafte und Atriebschräft. Äs isch eigentlech ds gliche Prinzip, wo üs us dr westliche Astrologie mit ihrem Tierkreis vertrout isch, numme bezieht sich die uf Monate, dr chinesisch drgäge uf Johr. Äs wäri natürlech absurd, ds bhoupte, dass sich aui Mönsche mitem gliche Geburtsjohr gliche. Aber äs git sicher ou Gmeinsamkeite, ähnlechs Verhaute, ähnlechs Usgseh, so wied Ching i paarne Länder die glichi Schueuuniforme träge, drunger aber usprägti Individualiste si. Drüber use söue Tiger-Mönsche vom Johr 1950 Gmeinsamkeite mitde Tiger vo 1938 und säubstverständlech ou mit dene vo 1926 ha. D Ching, wo im Johr 1974 gebore worde si, si äbeso Tiger wie die, wo im Johr 1986 ds Liecht vor Wäut erblickt hei. Wenmeh chli drüber nochedänkt, lüchtet eim dä Zämmehang i. Äs cha sehr wou Verbingige zwüsche Mönsche gäh, wo im Auter 12 Johr vonenag entfärnt si. Das isch ä ganz sonderbari Zwüschestuefe, chürzer aus ä ganze Generationsschritt (1 Generation = 25 Johr), länger aus dr normau Autersungerschiid vore Fründesgruppe. Äs isch nid ds Verhäutnis zwüsche Eutere und Ching, ou nid das zwüsche Gschwüschterte, aber äs cha ä töifi seeleschi Verbingig si, wo sich us dr Weisheit vode chinesische Tierjohr ergit. Dä uraut Reige vode Tier isch uf verschideni angeri Zititeilige übertrage worde. Ursprünglech chert är ir Iteilig vom Tag i zwöuf Zwöistundeabschnitt wider und das uf dere Ornig beruehe d Gestzt vom scho erwähnte füfte Pfad. Bis zum hütige Tag wird die Zwöuferornig uf üse eiget Tierkreis übertrage. Äs isch jedoch chli kompliziert, ä ganz genaui Überistimmig zwüsche de Stärnzeiche vo beidne System ds finge. Fürd Chinese säuber entspricht d Ratte am Widder, dr Büffu üsem Stier und sie löh sich nach däm Schlüssu die beide Kreise parallel loufä. Das verddirbt vermuetlech ds ganze ursprüngliche System, wo vermuetlich de Tier mitde Johreszite verbunge het, i dene sie sich am aktivste verhaute. Gustave Schlegel, ä Kenner vor Materie, schloht vor, dr Güggu mitem Oktober i Verbingig ds bringe, wöu dr Güggu vo Natur us äs prächtigs, aber ou sehr agriffslustigs Wäse isch und wöumeh sich im aute China immer im Oktober fürne Chrieg grüstet het. Schlange beände ihre Winterschlof im Früehlig, Hase wärfe ds erschte mau im März oder Apriu, Tiger föh ihri Wanderschaft im Mei a, Ratte si ide heissischte Tage im Juli am zaurichste und Söi hetme im Ougste usetribe, drmit sie d vo Wasser vougsogeni Ärde pflüegte und düngte. Für angeri Outore bestöh Parallenlene zwüsche dr Schlange undem Oktober-Novämber-Zeiche vom Skorpion, am Ross undem Novämber-Dezämber-Zeiche Schütz, wo jo immer ir Sagegstaut vom Minotaurus abbiudet wird, haub Ross, haub Mönsch, während d Geiss am Wiehnachtszeiche vom Steibock entspräche söu. Wägtmeh die verschidene Theorie über d Entsprächige zwüschem cinesische undem obeländische Tierkreis gägenang ab, so chame summarisch fougendi Parallelene feststeue:

Ratte sehr viu Widder Büffu gröschteteus Stier Tiger vorwiegend Löi Has sicherlich Fisch Drache am ehste Wasserma Schlange muess dr Skorpion si Ross ä extrovertierte Steibock Geiss vorauem Jungfrou Aff wöschächte Zwilling Güggu überwiegend Waag Hung erinnert a Chräbs Sou verglichbar mitem Schütz

Dr zwöit Pfad: D Joheszit vor Geburt

I aute Zite gits bide Chinese d Theorie vode füf Elemänt, wo äbeso verbreitet gsi siwie diejenige vode kosmische Urchräft Yin und Yang. D Chienese versuechte, ds ganze Läbe - vom Mönsch bis zude Farbe, vo Tier bis zu Körperteili - i füf Grundkategorie eidsteile. Das si d Elemänt gsi: Houz, Füür, Ärde, Metau und Wasser. Mit ihrer klassifizierig söt jedoch d Materie nid eifach i füf Gruppene iteut wärde, ou het dr Begriff Elemänt nid die glichi bedütig wie ir moderne Physik. D Chinese si jo vo jehär meh ade Verwandschaft und ade Zämmehäng zwüsche Sache aus a ihne säuber intressiert gsi. Ihri Theorie vode Füf Elemänt isch ä grossartige versuech, füf verschideni Müglechkeite vor lebändige Entwichlig ds beschribe. Do jedes Elemänt mitere bestimmte Johreszit verbunge gsi isch, ergits sich, dass sich i jedem ir beträffende Johreszit geborene Mönsch d Eigeschafte vom entsprächende Elemänt düe widerspiegle. Die einzigi Schwirigkeit berueht dorin, dass d Chinese die verschidenste Methodene brucht hei, um ihri Johreszite ds bestimme und dassmeh vier Johreszite mit füf Elemänt i Eiklang ds bringe het. Dahär het immer ä füfti Johreszit drzue erfunge wärde müesse. So hei sie zum Bispiu die, wo mit dr Ärde zäme korrespondierendi Johreszit, dr sächst Monat zwüsche Summer und Herbst gnennt. Ds System vom Chao Wei-pang beseit, dass jedi Johreszit us dene drei Monat, weuchi nachere Sunnewändi oder Tag- und Nachtglichi minus 18 Täg besteit. Wenmeh die füf mau 18 Tage multipliziärt, so hetme die füfti Johreszit, wo sich i regumässige Abstäng ufs ganze Johr verteut. Sit dr Erfingig vo däm System - vor 22 Jahrhunderte - het d Verschiebig vor Tag- und Nachtglichi bewürkt, dass üsi Johreszite nümme mitde aute chinesische überistimme. D Berächnig hie geit nach dr moderne Praxis vode Astrologe, auso vor Tag- und Nachtglichi us und nid nachdr siderische Umloufzit. Mi fingt auso die vertroute Afangszite vo üsne Johreszite wider: 21. März, 22. Juni, 23. Septämber und 22. Dezämber.

Dr dritti Pfad: D Doppuwuche vor Geburt

Mir hei gseh, dass d Chinese im Autertum jedes Johr mitemne Name vomene Tier und jedi Johreszit mitemne sogenannte Elemänt bezeichnet hei. I ihrem Kaländer gits aber ou, wie bi üs, 12 Monet, die jewius haubiert, auso insgesamt i 24 Teili, ufteut hei. Die einti Häufti wird chi-Zänträ gnennt, die angeri Häufti chi-Chnote. Die 24 Doppuwuchene und ihri Bedütig steue dr dritt Pfad ufem Wäg zur voukommene Säubstkenntinis dar. Grächterwis muessmeh no hinzuefüege, dass dä dritt Pfad ä ächti Ost-West-Mischig darsteut. D Chinese hei die chi numme aus Mittu vor Zititeilig brucht, sie hei nüt mit Prophezeiige ds tüe. Aber jedes chi entspricht zuäfäuigerwis immer amene habe Zeiche vo üsem westleche Tierkreis, so dass die nachfougende Intepretationä aufne woubekannte Aspäkt vo üsem trditioneue astrologische Wüsse hiwiese.

Dr viert Pfad: Dr Geburtstag

Die nöchschti Stufe zu eurer Charaktererkentnis basirt ufem genaue Tag, Monat und Johr eurer Geburt. Äs isch ds differäziertischte und dahär ds persönlichschte Teustück vom Gsamtbiud. Dä vierti Pfad hängt mitde 28 chinesische hsui oder Mondhüser zämme, wie sie mängisch trotz dr Tatsach gnennt wärde, dass sich dr Mond unger Umstäng dür keis vo dene Hüser bewegt. Die auti chinesischi Astronomie bout immer uf bestimmti himmusbeherschendi Stärne uf, die den in China immer überem Horizont ds gseh gsi si. Idäm meh dür aui dene schicksausbestimmende Stärne und düre äquatoriau Pol, wo üsem hütige Polarstärn entspricht, ä dänkti Linie zoge het, isch äs gitterartigs Liniegflächt entstange, wode Astrologe gstattet het, die gnaui Steuig vo angerne Stärne samt Sunne und Mond ds bestimme, säubst wen die grad töif ungerem Horizont gstange si. Wenmeh sich d Schibene vore Öpfusine vorsteut, wo aui vo eim Mittupunkt, am Pol, usstrahle, de si die Segment, wo sich ir Mitti vor Öpfusine, am himmlische Äquator träffe, die 28 hsui. Versuechtmeh, das aute Gittermuster vom Himmu mit üsere modärne Vorsteuig vo Astrologie und Charakterbestimmig i Eiklang ds bringe, so erhäbe sich ä Reihe vo Problem. Sitdäm die hsui oder Stärnebiuder definiert worde si, wahrschinlech im 14. Johrhundert vor Christi, het sich die Steuig vode Gstirn erhäblech veränderet. Einigi Stärne si häuer worde, angeri sie erloschä. Äs paar si vo eire Konstellation ine angeri gwanderet und was ds wichtigste isch: D Verschiebig vor Tag- und Nachtglichi het d Relationä zwüschem Sunnestang undem Himmusäquator veränderet, uf dene die Berächnige beruehe. Um zure Lösig ds cho, hetme sich für Kreis vode 28 Mondhüser ds gliche gmacht, wo die modärne Astrologe mitde Zeiche vom Tierkreis gmacht hei. Vor langer Zitöppe um Christi Geburt, hets numme ei einzige Tierkreis gäh, wo ufde tatsächleche Stärnbiuder am Himmu basiert het. Hützutags wird dä sogennant siderisch Tierkreis immerno brucht, houptsächlech im Oste. Westlechi Astrologä fougt drgäge am tropische Tierkreis, wo vo Mönsche entworfe isch und i bestimmti Abschnittä iteut worde isch, wo Johr für Johr widerchömme und sich unger Umstäng einigi Grade vom aute siderische Stärnkreis entfärnt het. Aui Zeiche vom neue Tierkreis besitze die glichi Längi, während ds aute System dodüre Verwirrig stiftet, dass aui Konstelatione verschideni Forme und Grössine bsitze und niemer genau weiss, wo die einti fertig isch und die angeri afoht. Mitde cinesische hsui isches genauso. Sie schwanke ir Grössi und mir chöi säge, ob ihri hütigi Form ou numme zirka dere vor mehrere tusig Johre entspricht. Darum hetme sie usgrichtet, loht dr Kreis jedes Johr ungfähr zur gliche Zit afoh und hofft ds beste. Äs zwöits Problem ligt ir Bedütig vode einzelne hsui. Wemeh id Zit um 100 vor Christi zrüggeit, so stosstmeh uf fougendi Vorussage: "Wen sich dr Füürplanet Mars si Wäg is hsui Chio erzwingt, de wirds zu Kämpfe cho. Wen är im hsui Fang oder Hsin steit, wirdmeh d Könige hasse. Söttegi Sätz chöi üs hüt chum witerhäufe, wöu irgendwo uf dr Wäut wird immer kämpft und Könige, Presidänte und Prömierminister müesse meistens ou mit Hass vo ihrne Wähler fertig wärde. D Persönlechkeitsbiuder, wo dir im fougende fingit, isch ä Mischig us chinesische Queuene, amene Blick uf ähnlechi indidschi und babylonischä Mondhüser einigi diräkte Erfahrige, womeh dür d Beobachtig vo Mönsche mitem Mond imene bestimmte hsui gmacht het.

Dr füft Pfad: D Geburtsstung

Das isch itz dr letscht Schritt ufem Wäg zur Säubsterkentnis. Im gwüsse Sinne isches dr entscheidend Schritt. Dir wärdets villech säubst bestätigt finge, dass dä Abschnitt, wo sich ufd Stung vo eurer Geburt bezieht, ihrer persönlichkeit am meiste entspricht. D Erklärig isch liecht ds gäh: Die früehere Abschnitte hei sich vorauem mit euiem inner Charakter und euine verborgene Motiv beschäftigt, mit dr Art und Funktion vo euine subtiuste private Gfüeu, während sich dä Füft Pfad uf euies üssere Tempramänt igeit, nämlech uf dä Teu vo euirer Persönlichkeit, wo dir i aune Autagssituationä zeiget. I bezug ufe 24-Stungezyklus wärde die gliche zwöuf Tier ir gliche Reiefoug benützt, wo mir scho bim Erste Pfad in Verbingig mitde Jore kenneglehrt hei, im grosse und ganze gäute ou die gliche Charkteristikä. Dr Ungerschid ligt numme dodrin, dass ä Mönsch, wo imene Tigerjohr gebore worde isch, die Tigereigeschafte i aune Grundzüg vo sim Läbe entwickle wird, während ä Mönsch, wo ir Tigerstung gebore worde isch, wo sich numme über zwöi Tagesstunge erstrecke, die Eigeschafte wässentlech oberflächlecher zum Usdruck bringt. Niemer cha meh säge, warum d Chinese bestimmti Tagesstunge mitde einzelne Tier i Verbingig brunge hei. Meh cha d Frog numme mitemne Glichnis beantworte: Jedes Meitli, wo sini Tugend gägene rücksichtslose Maa verteidigt, weiss genau, warum d Mitternacht aus Stung vor Ratte bezeichnet worde isch... Älogeschi Antwort wär das: Dr chinesisch Tag foht a, genau wie bi üs, nach Mitternacht und do d Ratte dr Tierkreis afüehrt, foht mit ihre ou dr Tag a. Gwüssi Lüt si dr Meinig, dä Zyklus stammi usem Vorderä Oriänt und sig im dritte oder vierte Johrhundert vor Christus nach China brunge worde. Ide Mittumeerländer lohtmeh, säusamerwis, dr Tag mitem Sunneungergang afoh. Wen auso dr Hung däm "Tagesafang" zirka am 20.00 Uhr entspricht, so entspricht d Ratte ar Mitternachtsstung. D Bedütig vode Tier hei sich im Lof vode Johrhundert hüfig verschobe und veränderet. Vor langer Zit hei sie nüt aus Unheu verchündet. D Vision vomene Ross isch äs Zeiche für Chrieg gsi. Ä doppuchöpfige Büffu het bedütet, dass dr Schii (Schrein) vode Ahne zerstört wärde würd. D Sou het ä ächti Kalamität verchündet: " Vo aune Vorzeiche für Unglück sie die di hüfigste, sie düte die perversi Verdärbtheit vomene Maa a, wo mit öffentliche Ufgabe betrout isch."

Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8