D Chattuarier, au Hattuarier, si e germanische Stamm gsi, wo ursprünglig wohrschiinlig im nördlige Hesse an dr Eder und dr Fulda agsiidlet gsi isch. Si si in de erste Johrhundert noch dr Ziitwändi in s Gebiet vo dr untere Ruhr, dr Lippe und em Münsterland zoge. Dr Flussname Hetter erinneret no hüte an se. Nochberstämm von ene si d Brukterer und d Chamaven gsi. Mit dene und andere germanische Stämm hai si sich im 4. Johrhundert zum Stammesbund vo de Franke zsämmegschlosse.