| Dialäkt: Züritüütsch |
De Cevi Schwiiz (frz. Unions Chrétiennes Suisses) isch de Verband vo allne CVJM und CVJF vo de Schwiiz. De Cevi isch e christlichi, international usgrichteti Bewegig vo Chind, Jugedliche, Fraue und Manne und Teil vo de weltwiite christliche Verein vo junge Fraue un Manne, de YWCA und de YMCA. Er bütet Freiziitagebot für Chinde und Jugedlichi. D'Arbet wird zum Grossteil vo ehrenamtliche junge Mänsche erledigt.
Mit sibe Regione und acht sälbständige Arbetsgebiet erreicht de Cevi Schwiiz meh weder 17.000 Mitglieder und anderi Teilnähmer a de Programm.
De Name «Cevi» isch es itreits Markezeiche vom Cevi Schwiiz.
S'Leitbild vom Cevi
De Cevi isch e christlichi Bewegig und Teil vo de weltwiite Christliche Verein YWCA und YMCA. De christlich Glaube isch grundlegend und wird in vilfältige Forme glebt.
Mir trauet Gott Grosses zue
De Cevi ermöglicht i sine Agebot, Gmeinschaft z'erläbe. Er förderet Begabige, übertreit Verantwortig und unterstützt d'Entwicklig vo de Persönlichkeit.
Mir trauet de Mänsche Grosses zue
De Cevi verbindet Mänsche und unterstützt si i de gmeinsame Verwürklichung vo ihrne Idee. Er förderet s'Läbe us em Glaube a Gottes nöiji Welt.
Mir trauet öis Grosses zue
De Cevi git Chind und Jugedliche Glägeheit, sich selbst z'verwürkliche und z'lerne mit de Natur und de Mitmänsche richtig umzgah.
Regione und Arbetsgebiet
Die 7 Regionalverbänd vo de Schwiiz bütet Freiziitagebot wie Jungschar, Ten Sing, Jugendgruppe oder Sport a. Das sind:
- Oschtschwiiz
- Züri-Schaffhuse-Glarus
- Winterthur-Schaffhuse
- Aargau-Soledurn-Luzärn-Zug
- Baselstadt-Baselland
- Bärn
- Unions Chrétiennes Romandes
Die 8 Arbetsgebiet engagieret sich im soziale Berych:
- Horyzon isch die internationali Zämearbet vom Cevi Schwiiz
- Cevi Militär Service unterstützt Aghörigi vo de Schwiizer Armee
- Muet zur Gmeind ernöieret Chilegmeinde
- YPoM setzt nöiji Idee für christliches Zämesi um
- s' CVJM Zentrum Hasliberg isch es Feriedorf
- d' Genossenschaft Cevi-Hüüser betribt es Jugedhuus
- Cevi Alpin macht Aktivitäte i de Berge
- d' Villa YoYo Schwiiz bütet i verschidene Städt gratis Hüüser zum Spile für Chind.
Gschicht
- 1768 entstönd die erste Vorläufer-Gruppe i de Schwiiz.
- Am 6. Juni 1844 wird de ersti Cevi (bzw. YMCA = The Young Men's Christian Association) vom George Williams in London gründet.
- 1852 gründet de Henri Dunant die ersti Cevi-Gruppe z Gämf.
- 1855 füehrt d'Gründig vom Weltbund zu Kontakt zwüschet Gruppe i de Schwiiz und andere Länder.
- 1864 wird de Schwiizer CVJM gründet.
- Scho um 1875 gits i de Schwiiz CVJF-ähnlichi Gruppe.
- 1902 schlüsset sich d'CVJF-Gruppe us de Westschwiiz zum "Comité Romand" zäme.
- S'"Comité Romand" wott sich 1911 em YWCA-Weltbund aschlüsse. Dert werdet sie ufgno, chömed aber no keis Stimmrecht über, wil sie nur en Teil vo de Schwiiz und nur ei Landesspraach vertretet.
- 1911 gründet de Lord Baden-Powell die ersti Pfadi-Gruppe. In Genf, Bern, Basel, Züri und Sanggalle, i de Waadt und in Nöieburg baut de Cevi Pfadi-Gruppe uf.
- 1913 wird de Schwiizerischi Pfadibund gründet.
- 1914-1918 währed em erschte Wältchrieg entstaht d'Soldatearbet.
- 1918 wird de erschti CVJM-Jugedsekretär für d'Dütschschwiiz iberuefe.
- 1920 schafft de Cevi Ufethalts-, Lese- und Wärmestube für Arbetslosi und e Volkshochschuel.
- 1926 schlüsset sich die verantwortliche Fraue vo düütschschwiizerische CVJF-Gruppe em "Comité Romand" a. So wird s'zweite Gsuech um e Aktivmitglidschaft im YWCA Weltbund 1926 bewilligt.
- 1930 wird in Basel s'1. CVJF Sekretariat vo de Dütschschwiiz eröffnet.
- 1945 werdet nöiji Leiterchüürs duregfüert.
- Ab 1970 wird die hütig erlebnisorientierti Jungschararbet und e systematischi Usbildig ufbout.
- 1998 schlüsset sich drei Dachverbänd (Cevi Bund, CVJM Nationalverband, CVJF Nationalverband) sowie die selbständige Arbetsgebiet UCF Vaud und FRUC zum hütige Cevi Schwiiz zäme.
- Im Jahr 2000 gits i de Dütschschwiiz 185 Jungscharabteilige.
Wie isch es zu de Buebejungschare cho?
Wo d'Idee vom Cevi i d'Schwiiz cho isch, bestönd scho Cevi ähnlichi Gruppe. Si schlüsset sich a de Cevi-Idee a. Dank em Henri Dunant breitet sich de Cevi i de französische Schwiiz schnell us. Agregt durch d'Romands entstönd bald Gruppe i de grosse Städt vo de Düütschschwiiz. De englischi Cevi bringt d'Pfadibewegig i d'Schwiiz. Nach e paar Jahr bildet die Pfadi-Gruppene en eigene Bund. Einigi Gruppe blibet au Mitglider vo de Cevi-Bewegig. D'Chinder- und Jugedgruppe vom Cevi selber sind aber erst sit de 70er-Jahr mit de hütige Form vo de Jungschararbet gwachse. De Seuzacher Realschuellehrer (Oberstuufe) Rolf Wehrli hät die Entwicklig massgeblich prägt. Über die Ziit händ die Cevi-Gruppe mängi schweri Krise z'überwinde ghaa. Jedesmal isch d'Cevi-Bewegig gstärcht us ihne usechoo.
Wie isch es zu de Meitlijungschare cho?
1934 hät de CVJF Nationalvorstand d'Kommission "Nationali Kommission vo de Jungschare" bildet - da häts bereits Meitligruppe ggää. In Basel sind sie als d'Meitli mit de blaue Jupes und de wisse Bluse bekannt.
1967 wird d Susanne Hofer als 1. Sekretärin vo de Meitlijungschar für d'Region Basel agstellt. Gmeinsam mit Fraue us de Region Züri hät im gliche Jahr de ersti Schueligskurs für Jungschiileiterinne stattgfunde. In de nächste Jahr wachst d'Meitlijungschararbet sichtbar. Ab 1981 händ all 5 dütschschwiizer Regione (AG-SO-LU-ZG, Basel, Bern, Ostschwiiz und Züri) e eigeni Jungscharsekretärin. Es sind immer nöiji Abteilige derzue gstosse. I de 90er-Jahre sind i vilne Regione d'Chüürs überarbeitet und veränderet worde.
Weblink
 |
Dä Artikel basiert uff ere fräie Übersetzig vum Artikel „Cevi“ vu de dütsche Wikipedia. E Liste vu de Autore un Versione isch do z finde. |