D Margrit Läubli und dr César Keiser (1986)

Dr César „Cés“ Keiser (* 4. April 1925 z Basel; † 25. Februar 2007 z Züri; eigetlig Hanspeter Keiser), Bürger vo Basel und Zug, isch e Schwiizer Kabarettist gsi.

Läbe und Wärk

Dr César Keiser isch z Basel ufgwaggse. Noch em Gymnasium het er an dr Kunstgwärbeschuel Basel en Usbildig zum Zeichnigslehrer gmacht. Er het im Studäntekabaret Kikeriki mitgspiilt. 1951 het men en ans Cabaret Fédéral uf Züri gholt. Dört het er d Schauspiilere und Dänzere Margrit Läubli (* 1928) kenneglehrt und het sä 1956 ghürotet. Dr César Keiser het as Reisekorrespondänt im Mittlere Oste gschafft und as Autor bi dr Reklamefirma Cefi.

S Keisers hai zwai Söhn gha, dr Lorenz (* 1959), wo au as Kabarettist duet ufdrätte, und dr Mathis (* 1958). 1962 si dr César Keiser und d Margrit Läubli zsämme in eigene Kabarett-Broduktione ufdrätte. Dr Keiser isch mänggisch humorvoll, denn wider bissig sarkastisch oder skurril gsi, aber nie ghässig. Er het e baar Mol Uszeichnige vo de Litraturkommissione vo dr Stadt und vom Kanton Züri überchoo. 1990 hai d Läubli und dr Keiser dr grooss Cornichon-Briis vo de Oltener Kabarettdääg überchoo, 1999 dr Salzburger Ehrestier z Leipzig, 2004 d Ehre-Prix Walo vo dr Show-Szene Schwiiz für ihr Läbeswärk.

Dr César Keiser isch im Alter vo 81 Johr am ene Härzversage gstorbe. Er isch uf em Friidhof Züri Änzebüehl (FG 81182) begraabe. Zu dr blaante Abschiidstournee mit Nummere, Szene und Dialog, won är und si Frau für 2007 blaant gha hai isch s nümme choo.

Litratur

• César Keiser, Margrit Läubli: Das Grosse César Keiser Cabaret Buch. Huber, Frauenfeld 2005, ISBN 3-71931-400-6

Weblingg

• Website von César Keiser und Margrit Läubli

Dä Artikel basiert uff ere fräie Übersetzig vum Artikel „César_Keiser“ vu de dütsche Wikipedia. E Liste vu de Autore un Versione isch do z finde.