d Bettina Jarasch (2014)

D Bettina Jarasch (* 22. Novämber 1968 z Augschburg as Bettina Hartmann) isch e dytschi Bolitikeri (Bindnis 90/Di Griene). Si isch vu 2013 bis 2018 Mitglid im Bundesvorstand vu ire Bartei gsii un vu 2011 bis 2016 Landesvorsitzeri vu dr Berliner Griene. Syter 2016 isch si Mitglid vum Abgordnetehuuse vu Berlin.

Familiie, Uusbildig un Beruef

Ire Vater isch dr Augschburger Unternämer Helmut Hartmann.[1] No dr Schuel het d Jarasch Philosophy un Bolitikiwisseschaft an dr Freie Universitet Berlin studiert. Si het as Redakteeri, Beroteri un Autori gschafft.

D Jarasch isch mit em Schurnalischt Oliver Jarasch ghyrote, wu Abdailigslaiter bim rbb isch,[2] un het zwai Chinder.

Bolitik

Vu 2000 bis 2009 het d Jarasch as Referänti vu dr griene Bundesdagsfraktion gschafft, bis 2005 fir d Christa Nickels un zletscht as Vorstandsreferänti vu dr Renate Künast. Syter 2009 isch si Mitglid im Berliner Landesvorstand un Sprächeri vu dr Landesarbeitsgemeinschaft Bildung gsii.

Am 6. Merz 2011 isch d Jarasch zäme mit em Daniel Wesener zur Vorsitzeri vum Landesverband gwehlt wore. Si giltet as Verdrätteri vun ere realbolitische Stremig in dr Griene.[3]

Syter anne 2013 isch si Bysitzeri im Bundesvorstand vu Bindnis 90/Di Griene gsi. Iri Schwärpinkt im griene Bundesvorstand sin Familiebolitik un Religionsbolitik gsii. Si het di grien Kummission „Religionsgmainschafte, Wältaaschauige un Staat“ glaitet, wu dr Bundesvorstand im Dezämber 2013 yygsetzt ghaa het.

Bi dr Wahl zum Abgordnetehuus vu Berlin 2016 het si in eme vierchepfige Spitzeteam hinter dr Ramona Pop, dr Antje Kapek un vor em Daniel Wesener uf Lischteblatz 3 vu dr Landeslischt vu ire Barteiu kandidiert un isch iber die ins Abgordnetehuus vu Berlin gwehlt wore. Im Jänner 2017 het si aagchindet, ass si as Berliner Spitzekandidati fir d Bundesdagswahl 2017 wett aadrätte,[4] si het si bi dr Kandidateufstellig fir dr Lischteblatz 1 im Merz aber nit gege d Lisa Paus chenne duresetze.[5]

Am 5. Oktober 2020 isch verchindet wore, ass d Jarasch as Kandidati vu dr Griene fir s Amt vu dr Regierede Burgermaischter in Wahlkampf fir d Berliner Abgordnetehuuswahle 2021 ziet.[6]

Engaschmänt in dr Chilche

D Jarasch isch langjehrigi Vorsitzeri vum Bfarrgmairot vu dr kadolische St. Marie-Liebfraue-Gmai z Berlin-Kreuzberg.[7] S Zäntralkumitee vu dr dytsche Kadolike het si im Novämber 2016 as aini vu 45 Lyt zum Mitglid gwehlt.[8] Si isch am 24. Novämber 2017 zur Sprächeri vum Sachberaich „Bolitischi un ethischi Grundfroge“ im Zäntralkumitee gwehlt wore.[9]

Mit acht andere Lyt – Theologe*ne un bekannte Kadolike*ne – het si ne Uffige Brief an Kardinal Reinhard Marx grichtet, wu am 3. Februar 2019 in dr Frankfurter Allgmaine Sunntigszytig vereffetligt woren isch. D Unterzaichner*ne hän en „Neustart mit der Sexualmoral“ gforderet mit ere „verständigen und gerechten Bewertung von Homosexualität“, „echte Gewaltenteilung“ in dr Chilche un dr Abböu vu dr Iberhechige vum Weiamte un ass s Weiamt fir Fraue ufgmacht wird. Si hän an di Dytsch Bischofskumferänz appelliert, Diözesanprieschter d Wahl vu ire Lääbesform freizstelle, „damit der Zölibat wieder glaubwürdig auf das Himmelreich verweisen kann“.[10]

 Commons: Bettina Jarasch – Sammlig vo Multimediadateie

Fueßnote

  1. ↑ Polit-Karriere in Berlin; Augsburger Allgemeine, 8. Merz 2011
  2. ↑ Oliver Jarasch (rbb) | Wegweiser Media & Conferences GmbH. Abgruefen am 5. Oktober 2020.
  3. ↑ Christine Richter: Berliner Grüne nehmen sich spießiger Themen an. In: Berliner Morgenpost. 7. Merz 2011.
  4. ↑ Berlins Grüne kämpfen um Listenplatz 1 auf tagesspiegel.de, 25. Jänner 2017
  5. ↑ Berliner Grüne: Lisa Paus deklassiert Bettina Jarasch uf morgenpost.de, 25. Merz 2017
  6. ↑ Bettina Jarasch soll Spitzenkandidatin werden. Abgruefen am 5. Oktober 2020.
  7. ↑ Katholische Kirchengemeinde St. Marien Liebfrauen in Berlin-Kreuzberg: Ansprechpartner/-innen
  8. ↑ zdk.de: ZdK wählt Einzelpersönlichkeiten, abgruefen am 24. Februar 2017.
  9. ↑ zdk.de: ZdK Wahlen Sprecherinnen und Sprecher der Sachbereiche, abgruefen am 24. Novämber 2017.
  10. ↑ „Offener Brief an Kardinal Marx: Forderung nach Umbruch in der Kirche“, domradio.de, 3. Februar 2019.
Dä Artikel basiert uff ere fräie Übersetzig vu dere Version vum Artikel „Bettina_Jarasch“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.