De Asklepios, uf tütsch o Äskulap (altgriech. Ἀσκληπιός; latiin. Aesculāpius) isch i de griechische Mythologii e Hailheros, wo im Lauf vo de Gschicht im Kult zomene wichtige Hailgott woren isch. Siin wichtigste d Tempel isch uf de Peloponnes i de Stadt Epidauros gstande. Vo do hend d o Römer de Gott öbernoo. Siis Woorzaiche und hailige Tier isch d Schlange.
Name
De Name Asklepios isch vorgriechisch und cha nöd düütet were. Bim Homer und im ionische Tielekt luttet er Asklēpiós, im arkadische Asklāpios (Ἀσκλαπιός) und uf lakonisch Aglāpiós (Ἀγλαπιός). Z Epidauros isch er Aisklāpiós (Ἀισκλαπιός) gnennt wore, du druus isch direkt di römischi Form Aesculāpius entstande. Die alte Grieche hend de zweet Tail zo altgriech. épios "mild, hilfriich" gstellt, und vo dem Wort isch de Name vo sinnere Frau Epione entstande.
Saag
De Asklepios isch de Soo vom Apollon, sini Muetter isch Koronis. Noch de Saag vo Epidauros, isch d Koronis di Gliebti vom Apollon gsii und isch schwanger mit erem Vatter Phlegyas uf Epidauros choo. Do hett si haimlich ufem Berg Myrtion de Asklepios uf d Welt broocht und de uusgsetzt. Gaisse hend s Büebli gnäärt. Wo de Hirt Aresthanes anechoo isch und gsie hett, as Funke usem Liib vom Büebli schüsset, isch er vor Angst verchlöpft und isch eweggrennt.
Di tragischeri Version isch die, as d Koronis, nochdem si vom Apollon schwanger woren isch, sich in Ischys verliebt hett und mit dem grad ono Sex ghaa hett. D Artemis hett si wege dem miteme Pfiil töödt. Wo ere Liichnaam uf de Schitterhuufe glait woren isch, het de Apollon de Asklepios us erem Buuch grettet und de Hermes hett s Büebli zom hailchundige Kentaur Cheiron broocht, wo de Asklepios uufzoge hett und de i d Hailchunst iigfüert het.
Noch de messenische Saag aber, isch de Asklepios de Soo vo de Arsinoë, e Töchter vom Leukippos.
De Asklepios isch e guette Hailer wore. Won er e toote Mentsch wider lebig gmacht hett, hett da de Hades nöme grad guet gfunde und sich bim Zeus bichlagt und de hett de Asklepios mitem Strool töödt. De Apollon hett denn uus Raach d Kyklope töödt, wo de Blitz gschmidet ghaa hend. Wege demm hett er e Joor lang as Chnecht bim König Admetos müese tiene. De Asklepios isch as Sternbild Ophiuchus ("Schlangeträäger") versternt wore.
Bim Homer werd de Asklepios as de Vatter vo de hailchundige Helde Machaon und Podaleirios gnennt, wo im Trojanische Chrieg di verwundete Grieche ghailt hend.
Kult
De wichtigsti Kult vom Asklepios isch de vo Epidauros gsii. Da Hailigtum isch nodisnoo immer bikannter wore und vo doo uus het sich de Kult vom Asklepios immer mee verbraitet und isch vo doo o uf Room choo. Mengisch het sich am noie Kultort e Schlange zaiget, wo as Bott oder Manifestation vom Asklepios interpretiert woren isch und aazaigt hett, wo e Tempel baut were söll. E wichtigs Asklepieion isch i de Stadt Messene gstande, wo under andene o e Bild vo sinnere Muetter Arsinoë gmoolt gsii isch.[1]
Anzelnoowiis
Literatur
Fritz Graf: Asklepios. In: Der Neue Pauly (DNP). Band 2, Metzler, Stuttgart 1997, ISBN 3-476-01472-X, Sp. 94–100.